[讀者來料] 渣馬跑手用假印搶頭位?

傳聞用假印章排頭位的女跑手

有跑友向Fitz.hk報料，話上個月嘅渣打馬拉松，有「偽造假精英印」疑雲。據講，有人疑似用號碼布上假嘅「精英起跑區」蓋章，成功喺較前位置出賽，最後仲隨時攞埋獎金。

根據渣馬嘅做法，各組賽事嘅起點，會喺前排劃出「精英起跑區」，大會會挑選成績突出嘅跑手，喺號碼布蓋上「精英起跑區 Elite Start Zone」嘅印章，即係有個印就可以排前啲出賽，而據講，選手係收到號碼布先知有無得排前啲。（如大家知道更準確之安排方法，煩請指正）

報料人話，有位馬拉松挑戰組嘅女跑手，用咗一塊印住「精英起跑區 Elite Starting Zone」印章嘅號碼布，成功進入「精英起跑區」，最後仲喺3個半小時內完成全馬賽事，有資格拎到$1000達標獎金。

懷疑係假嘅印章(號碼布右上角), 隱約見到 “Elite Starting Zone” 字樣。

報料人仲話，有人曾經向田總投訴呢件事，但田總並無任何行動及回覆，所以唯有將事件公開。

我哋亦喺網上公開嘅相薄，搵到呢位女跑手嘅相片，亦證實相中嘅號碼布，真係印上「Elite Starting Zone」嘅印章。而隨機找出嘅三位跑手，號碼布上嘅印章就顯示「Elite Start Zone」。而渣馬賽事手冊入面，亦係用「Elite/Priority Start Zone」呢個寫法，係無「ing」尾。表面證據顯示，「Elite Starting Zone」呢個寫法係有問題。

渣馬賽事手冊裏面，都係用 “Start Zone” 呢個term。

當然，香港實行普通法，而且係法治社會（應該仲係），唔係大清啲下三流衙門，疑點利益歸於被告，即係就算印章有錯字，亦唔可以一口咬定佢係偽造，可以係大會擺烏龍都得。而呢位女跑手，亦未必知道呢個印章嘅真偽，俾人整古都有可能。

我哋隨機搵出幾名精英跑手，當中包括Fitz Blogger SpeedPurple0 (右)

三名精英跑手嘅號碼布放大之後，見到印章係 “Elite Start Zone”。 (按圖放大)

----- 廣告 Ad -----

左：疑似假印；右：真印 (按圖放大)

1. 如果咁簡單用一個錯嘅印章，就可以進入「精英起跑區」，咁即係前面可以無端端多咗人，對後面嘅跑手唔公平，間接影響成績；
2. 如果印章可以造假，咁號碼布都可以係假，百萬人起跑絕對不是夢。田總喺號碼布嘅防偽上面，又做過啲咩功夫？當然號碼布之外，仲有樣嘢叫「晶片」，但除非起點有人check，否則係杜絕唔到嗰啲唔care成績/證書嘅跑手上線。
3. 今次呢位女跑手，如果喺疑點重重之下，最後拎到$1000達標獎金，田總係咪應該回應下其他跑手嘅投訴？

2016年渣馬喺舊年爆滿之後，淘寶即刻有名額出售。

再拉闊少少，諗諗下呢單嘢仲有好多問題：

1. 任何比賽都要講求公平公正，渣打香港馬拉松貴為IAAF金級賽事，應該有更高標準。係咁意”CUP”個印仔就做精英嘅做法，似乎兒戲咗啲喎。
2. 號碼布完全唔覺經過仿偽處理，令人諗起，之前淘寶有渣馬名額賣 (見《淘寶$1800人仔賣渣馬名額 打救香港同胞》，隨時可以係大規模造假活動。而號碼布設計十年如一日，簡單連比賽年份都無，呢方面係要改進下呢？
3. 大會係咪應該要檢討一下只憑掛上號碼布，就可以進入起步區嘅做法？正如上面所講，係咪可以喺起步點check check跑手有無晶片？(例如喺指定入口位擺放機器/踏板）

我哋會將上述問題去信田總，希望可以盡快釋除大家疑慮。

（更新：我們2月19日早上11時35收到公關方面回覆，指查詢已轉交大會處理）

(按圖放大)

更多：
Fitz.hk Facebook專頁
[渣馬] 我無上巴士 你唔好屈我
渣馬專區＠Fitz.hk
[渣馬數據分析] 一張圖睇下你跑成點
Fitz Running 跑步