續上篇:《點解鍾意跑步? 一步一腳印，勝在夠公平》
“跑步” 同 “ 跑下步 “ 嘅說法源自消失咗嘅 C 先生，個分別就係嗰個 “ 下 “ 字，” 跑下步 “ 嘅意思意味住對呢件事唔係好認真做，或者佢會靦靦腆腆尷尷尬尬咁話 : “ 我呢 …… 係跑，不過唔係跑你嗰啲囉，跑下咁囉。” 但對於 C 先生同叔叔嚟講，跑步只有一種，就係 “ 跑步 “ ！
一個設計師唔會話佢嘅職業係 “ 設下計囉 …. “
一個建築師唔會話佢嘅工作係 “ 起下樓囉 …. “
一個電影導演唔會話佢嘅專長係 “ 拍下戲囉 …. “
一個Michelin Chef 唔會話佢日日 “ 煮下餸囉 …. “
就係個 “下” 同個 “囉 ”!
正如 C 先生所講，跑步係一件好廣闊嘅事，可以容納塵世間不同嘅跑者，你有你熱熱烈烈咁跑，我有我冷冷靜靜咁跑，各有各嘅方法，各有各一套方法去享受跑步嘅過程。
----- 廣告 Ad -----
跑步者大致分為兩種，參加比賽同唔參加比賽，參加比賽嘅通常都對自己點都有啲要求，希望跑快啲又 PB 又 BQ 又四大又乜又物，但唔參加比賽嘅唔代表無熱誠去跑同無要求，只係覺得我有我鐘意跑，使鬼同人比較咩，根據亳不科學亦無乜說服力嘅數據顯示，唔參加比賽嘅比參加比賽嘅跑步者多，但就係因為成個跑步嘅氛圍，令到唔參加比賽嘅覺得老尷，於是自認係 “ 跑下步囉 “ 而唔係 “ 跑步 “ 。
其實跑步同做其他運動一樣，唔理你一個禮拜跑十零 K 定百幾 K ，每次 Easy Run，LSD ，Long Run ，Interval 還是尻跑，每次跑嗰陣享受陽光維他命D，户外嘅空氣，運動嘅安多芬，唔理你著 AdiZero 定 Nike Vaporfly 3，ASIC Magic Speed 3 還是 New Balance X Bule Bottle 嗰對，甚至李寧或者白飯魚，重點係享受跑步，你有你要跑到夠數，我有我跑到唔舒服就停下腳步。
跑步其實係一種生活選擇，無論你係想跑半馬全馬超馬，還是輕輕鬆鬆跑三五七K，出身汗爽一爽，自自然然就會瞓得好啲，自動自覺食得健康啲，對自己嘅身體認識深啲，只要你願意作出呢啲選擇嘅，你都係一個跑步者，並無高低優劣之分。
所以，只要出得嚟跑，跑得高興跑得舒暢跑得爽嘅話，大家都係跑步者，如果下次有人問你有無做運動，咪鬼再話 “跑下步囉 “ ，挺起胸堂充滿自信望住對方對眼，笑笑口四萬咁答佢 “我跑步 “!
----- 廣告 Ad -----
