![[超實用] 旅遊保險唔保參加馬拉松](https://fitz.hk/wp-content/uploads/2015/10/超實用-旅遊保險唔保參加馬拉松-1024x576.jpg)
更新日期：2017.10.23
有保險已推出保障業餘馬拉松、登山活動等「高危活動」之旅遊保險，詳情可到此參考。
出國跑海外馬，唔只要練跑，仲要有更多嘅準備。
----- 廣告 Ad -----
越來越多人遠赴海外參加馬拉松比賽，有跑友就遇到問題，話「旅遊保險唔保參加馬拉松」。
我哋隨即向幾位持牌嘅保險顧問查詢，究竟事實係點？
旅遊保險保障啲乜？
- 財物損失：即係話喺旅遊期間唔見嘢、被盜竊，或者係身上物品因意外而損壞，都可以得到賠償。
- 行程延誤：通常都係飛機航班延誤（因天氣、航班取消），而影響行程。
- 海外醫療：因意外而要入醫院，有啲旅遊保險更有保埋你喺旅行時染病，睇門診嘅費用。
保險公司對於旅遊保險，絕大多數都會例出一大堆免責條款，即係話有好多情況，保險係唔會適用。最明顯例子就係打仗、戰爭，或者遇上恐佈襲擊，同埋參加極限運動或危險活動。譬如話，你參加激流划艇，而中途整壞咗個相機，保險公司就有權唔保嘞。而你去攀石而跌傷，亦唔會得到保障。
而所謂「保險唔保跑馬拉松」，就係有旅遊保險喺免責條款裏面，例出一項叫「參加競賽活動」。
「參加競賽活動」其實亦見於部份嘅意外保險。唔好講參加六大馬拉松比賽，就算學校嘅運動會，有啲意外保險都係會唔保嘅 。
----- 廣告 Ad -----
只保非職業同非競技（non-professional and non-competition），即係唔保參加馬拉松比賽。
咁咪好似好無保障？你可以咁講。不過正所謂「有求必定有供」，所以有啲保險已將條例定得無咁緊，而喺「競賽活動」之下，加多兩字，變成「參加專業競賽活動」。即係你本身唔係專業運動員（呢樣嘢好易證明），而去外國參加馬拉松比賽，亦可以買到旅遊保險嘞！（注意，大家買保險時只係要睇到單張列出嘅「主要『承保／不承保』項目」，咁有無咩唔係主要，但係又關你事呢？真係要買之前當面問下保險公司）
不過有保險顧問提醒，跑馬拉松最需要保險都係遇上意外，要睇醫生。而一般旅遊保險提供嘅醫療險障未必好高，所以反而了解自己份意外保險，有無「參加競賽活動」呢一類條款，就更加重要。而跑友如果有份適合嘅意外保險，平時喺香港跑馬仔都有保障。
大家跑海外馬，唔係剩係留意賽會嘅時間限制，仲要留意保險條款。
呢個寫法（保障一般業餘及消閒活動），真係要向保險公司查詢。
呢份講明唔保職業體育活動，照道理你業餘去跑馬拉松都會有保障。
