話說前幾日係某跑步谷見到，有人唔洗1粒鐘跑完 10K 然後話自己慢腳問人係未跑得慢，引來其他跑友不滿。呢個世界總係有人跑得快過你，又有人跑得慢過自己，咁代表咩呢?
其實無意思架。有人話自己 10k 47mins 都唔夠快，咁唔通我因為個個都跑得快過自己就唔跑步? 跑步呢樣野，明明就係一個人嘅事，就算比賽都唔會因為你一個人屎波就會輸，又或者你擁有神一樣嘅隊友就會贏。跑步，隻腳係你自己，你自己可以控制自己嘅能力，唔需要同其他人鬥快鬥勁。每個人心入面都有一個屬於自己嘅目標。PB 也好玩大斜路又好，今次做唔到，搵出自己不足之處，針對自己不足個方面努力練習，先係至勝之道。
跑步從來都由自己隻腳踏出第一步開始，聽聞有部分全馬嘅會睇少玩半馬嘅，又有半馬會取笑玩10k。跑步唔係一開始就已經係42公里，每個人都經歷過自己3K，5K、10K咁走上去，經歷過幾多 PW、跑唔郁、腳痛胃痛橫膈膜痛……如果取笑人地，其實同時你都取笑緊過去嘅自己。跑步，練到嘅唔單係自己嘅耐性，點樣挑戰自己，更加係一種修行，面對人與路嗰種謙卑嘅心。有人向自己請教，未當經驗分享一下，如果對方試過唔得，未大家一齊再研究下，總好過收收埋埋又要同人較量又要笑人地丫。
呢個世界，人外有人，路外有路，斜仲更斜，天外有天。做好自己，唔好得把口話人地快過自己，坐係到又唔郁，最緊要係對自己有信心，行動著起對跑鞋先係實際。跑步唔洗同人比較，要比較嘅係昨日嘅自己。正所謂，要嬴人，先要贏自己。
----- 廣告 Ad -----
講到尾，Personal Break，就緊「逼」自己啦，唔通「逼」其他人咩。
其實，我都係想簡簡單單跑個步啫，你估依家賽馬次次都同人鬥?
Fitz Facebook專頁
愈跑愈孤獨
紐約馬拉松名人榜
Fitz Running 跑步
青藍
青藍 -- 成日「也文也武」，也文方面喜歡寫網上小說與散文，也武方面鍾愛跑步與行山，相信每場比賽都有每種感受。