[郁民教室] 快乾衣物點除汗味?

時下運動衣物功能多多，可以排汗、除臭，甚至有啲仲話有「冰感」。不過，有唔少人打理不善，反而會積咗啲汗臭味，就算洗乾淨，著去跑步一出汗就會散發一陣臭味。

想好好打理快乾衣物，可試下以下方法：

1. 首先要明白，衣物嘅臭味，就源於你汗嘅細菌而發出。而如果清洗得唔好，細菌會依附喺衣物上。到你下一次做運動，一出汗，細菌散發嘅嗅味就會湧出嚟！
2. 所以，做完運動，出完一身大汗後，返到屋企，就算唔會即刻洗衫，都第一時間將運動衫褲襪，搵水浸一浸。
3. 市面上一般洗衣粉其實足夠洗走臭汗及其細菌，如果效果唔好，可以採用梳打粉 (有洗衫專用嘅Soda ，其實用整蛋糕嘅Baking Soda亦得)，將衣物浸一至兩小時。
   
4. 買衫嘅時候售貨員一定有提你唔好用柔順劑！記住，柔順劑會破壞快乾物料嘅纖維，件衫變咗唔再快乾！
5. 洗完應該點晾？太陽曬又得，吹乾都得，最緊要係「通風」嘅地方！
6. 市面上有啲專洗運動衣物嘅洗潔劑，台灣跑友就推介「Sport Wash」，外國網站又介紹「Win Detergent」，我未用過，唔知效果係點。

圖片來源: mommypotamus.com