「喂，老老實實，你地係唔係約定一齊衝線? 邊個堅係第3? 有冇內定先?」
3名外星人同時衝終點，是越野界的經典和話題 (由左至右: KC、怪獸、阿歹) 攝: Kuku
唔好講咁多，食咗花生先
週日田總舉辦的「香港山路錦標賽2022」50K，3名外星人一齊衝線片段在越野界洗版，分不到誰首先壓線，因為有片都冇真相，花生滿地，睇得人非常肉緊，同時亦關乎誰可以代表香港出戰泰國的越野世錦賽。
KC (Chan Ka Keung)、怪獸sir (Tsang Fuk Cheung) 和阿歹 (Tse Kok Wai) 沿路互片，爭奪賽事的季軍 (與第一的城武雅和第二的 Jeff Campbell 有段距離)。離大尾督終點前幾百米3人都是平排跑，直至衝過終點，晶片得出來的時間，3人竟然都是相同的5小時58分02秒，咁點算? 有說是交由大會的裁判決定，最後大會宣佈由怪獸sir取得第3名，KC第4，阿歹第5。於是好多網友找出不同角度拍攝的相片和video，開始鑑證分析，研究角度、光線、陰謀，眾說紛紜，各有各認為的真正季軍。
----- 廣告 Ad -----
誰先過終點，世紀懸案
約了KC食早餐 (see，我又識佢)，在佢想食那碗麥皮之前，我食大包花生先:「喂，老老實實，你地係唔係約定一齊衝線? 邊個係堅第3? 有冇內定先?」
「當然冇約定，最後落汀角路大斜路一段，大家都出盡力跑，其實真係同一時間衝線。」KC一貫慢條斯理地說話，與他跑步的速度相反。
讓數字說故事，睇番分段時間就知，KC同阿歹一開始已經拍住跑，守住第3第4位置，前後相差幾十米，有時會在水站一齊補水。直至烏蛟騰郊遊徑往新娘潭段，怪獸sir開始在後面趕上來，從此3人身連身，心連心，往大尾督終點衝去。
「沿途我地冇乜吹水，大家都專心搏到盡，記得係一個 CP 阿歹問過我食唔食壽司。」
「最後我地一齊衝終點確係非常難忘，走左50K，氣同力都盡，仲要加速去衝，過終點果刻，有斷氣感覺，跟住我瞓左係地下。大家都有些激動，阿歹走過來同我擁抱!」
----- 廣告 Ad -----
KC過終點後險些氣絕身亡 圖: 作者提供
同阿歹一直互片，到最後是互抱，感人的一刻 圖: 作者提供
「我一直都以為是三季軍，隔左約半個鐘，大會才宣佈名次。」
「接受自己失落季軍嗎? 會唔會上訴?」我係尋釁滋事之徒。
「會用平常心去接受，大會講左最後交由裁判去決定，應該唔會上訴。其實我更加重視我地3個人的友誼，大家都有識英雄重英雄嘅感覺，邊個攞季軍真係冇乜所謂。」 唉，我明顯挑不起事端。
誰是季軍？係愛 圖: 作者提供
KC跑之路
因為近年在數個賽事有突出表現，KC在越野界開始為人知悉，漸露頭角。之前是 nobody 的KC，如何能在週日與怪獸sir、阿歹埋身肉搏? 回到少年KC，讀書時主要打籃球，畢業後開始玩路跑，沒有什麼系統訓練。「但我好感激由康文署過來的張 sir，他帶 IVE 長跑隊，耐心教導，我獲益良多。我一直跟左佢好多年。」KC 深夜來電，特意提我加番呢段。
2018年他初試參加渣馬半馬，做1’39”。同年跟 friend 去玩柏林馬，被編在最後一批選手出發，起步後困於人群中，要左閃右避，好耐至慢慢加到速，但都跑到 3’10”。2019年參加芝馬，好想做到sub-3，但當日氣溫超凍，只有4度，經過水站，手指凍到不能彎曲去攞水，最後雖然PB 3’03”，但始終不能走進sub-3，有點失望。
柏馬是KC的初馬，幾經艱辛至殺出人群，仍做到3’10” 圖: sportograf.com
馬不停蹄，再參加內地的汕頭全馬，「汕馬賽道平坦寬闊，分段時間理想，一直保持身體狀況良好，心想sub-3 在望，怎知去到最後4K，橫隔膜超痛，要用手按住跑，好辛苦衝過終點時，看見大會時間是2’59”，真係喜出望外，超興奮。」
----- 廣告 Ad -----
汕馬跑到 sub-3，超興奮
KC 首次參加越野跑是2018年香港長跑會舉辦的「畢拉山15公里古蹟越野賽」，有一段由大潭水塘上大風坳，在那段長命斜，跑開平路的KC見到有選手在慢jog 甚至跑，覺得好奇怪，點解上斜路會跑?上完大風坳跟住落去金督馳馬徑，差不多個個都跑，他也有疑問，點解落斜路會跑? 於是他也跟著跑，感到好爽!
Mid summer越野賽初嘗勝滋味 圖: XTE
2019年他一口氣報了三場 mid summer 短途山賽，城門賽道組別第2，全場第5；香港仔賽道組別第2，全場第3；大帽山賽道組別第1，全場第1。愈跑愈好，更發現越野跑變化多端，而且在山徑奔跑，感到自由自在，在山之巔，看見遼闊的山線，無底的藍天，進入了另一個世界，從此熱戀越野跑。
在山之巔，我就是生命的主人
2020年 KC 參加 Hoka 訓練班，透過教練 KFC 加入了豐山跑 ，接觸到很多山友，更重要是認識了匈牙利藉女跑手 Eszter (今年UTMB全場女子第5名)，兩位精英跑手經常約操，其實也只有 KC 和少部份男快腳有能力跟到 Eszter 的 pacing。他們在疫症期間，結伴參加了不少 virtual 比賽，包括 HK100賽事，也獲獎無數。其實 KC 的英文不太靈光，需要透過 Eszter 的司機翻譯做聯絡，跑山期間則透過手機google translate 溝通，十分有趣。不過現在 KC 經常與外藉跑手操練，相信用英文溝通再也難不到他。亦見到他強大的適應力。
與國際級跑手 Eszter 是 running partner，亦只有他至陪到操
KC人生之路
KC 目前沒有固定的全職工作，只有part time job 和品牌贊助，大部份時間都專注於操練。「其實你在越野跑有什麼目標?」
「我希望可以進入香港越野界的精英行列，也想在國際賽事爭取成績。」不過大家都知越野跑在香港仍是小眾運動，政府批准搞賽事已經是皇恩浩蕩，更遑論有什麼支援。品牌贊助只限於產品使用，甚少有金錢上的援助。
KC 面對著來自家庭和經濟的壓力: 點解唔正正經經搵份野做? 其實真係好難解。KC 回應:「做運動員的生涯十分短，只想趁仍有能力的時候去爭取和發揮，有些事情錯過了就不能回頭。」KC 拿青春賭明天，瀟灑走一回，chill，但代價和風險高，值得嗎?
「我讀書的時候是左耳入右耳出 (可能連左耳都未入過)，沒有什麼事情撻得著我。」
----- 廣告 Ad -----
「但當我接觸到跑界，成個人好似 high 左，感覺有一股源源的動力，我經常上網睇書搵資料，增進知識，糾正錯誤，提升技巧，也願意捱苦去操練，十分享受過程。」
輕快的感覺飄上面，可愛的一個初戀。
KC 有句說話經常掛在口: 跑步時要聆聽你的身體。而對於前途、人生，他選擇 follow your heart!
You dare to dream?
按: 標題括號內文字為編輯所加
