上星期葵青運動場舉辦了別開生面的100K超級馬拉松繞圈比賽，一眾熟悉的跑手都有參加（如陳國強KK，而盧松昌盧SIR更以簡便赤足鞋參戰），但奇怪係，比賽完畢後，不太看到跑手談論這次比賽。直到幾天後，讀到盧SIR分享的一則評論，就明白了為何跑手都不願多談了。
這則評論發表於「香港長跑網」，原文標題為《一個好垃圾的比賽主辦單位!》。
文章重點如下：
- 「當日大會晶片計時出錯，地氈常detect唔到，計少咗圈，小叻40圈之前跑多咗起碼1次，61圈跑咗2次，88圈跑咗起碼3次……明明好多人跑多咗，但大會唔認數，亦都唔想辦法補救……據聞有前列跑手跑多咗20個圈, 勉強計佢完成!」
- 「當日有選手在選手自行補給區偷咗我半支保礦力和半支可樂，我放咗入自己no.和名的袋入面，仲要有個盒裝住…… 個賊仔飲晒剩返2個空樽喺隔離位，超級無品… 如果係下午好熱時, 我無晒野飲真係死得……」
- 「旁邊仲聽到有花生友觀眾話，橫掂你地都係百幾二百個圈係咁跑㗎啦，跑多咗有咩所謂~ 我即時講，你跑丫笨?!」
- 「第二日幫公司跑接力……正當小叻最後加速，追緊前面對手時，喺200米果度，有個裁判突然截停我地……於是即刻落返跑道，行返終點，但一來蝕咗時間，二來我無過200米地氈，依大會講果個圈唔計~」
而盧松昌盧SIR話佢最少畀人計少兩個圈（即係多跑800米），佢亦留言話：
「批評葵涌超級倉鼠賽的一篇賽後感想，作者小叻話:“一定唔會再參加”……據本人之接觸，有同感者不止作者。……」
網友Bowling68話：「應該超過十個被數少圈，兒戲到跑手自己 show 手錶紀錄都得，哈！」
----- 廣告 Ad -----
實情係點，我唔喺現場真係不便評論。不過跑手千辛萬苦跑足50、100K，主辦單位又有無認真看待過？搞長跑比賽嘅主辦單位，往往視跑手為一堆數字，渣馬如是，超馬亦如是……
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」