----- 廣告 Ad -----
有乜野會重要過日圓跌穿5.3、李強係理工讀過書、Do姐離開大婆台? 就係「一家人齊齊整整食飯」。「飯戲攻心」賣親情雞湯,幾萬年老字號,估唔到仲咁好賣。親情不同手機,不會用性價比量度,不求付出和回報相等,但飯一定準時開,擺明蝕水野,邊度仲會有 -「家」,唔到你唔起雞皮致敬。
同樣不是追求付出等於回報的,是做賽事 support。最近受 friend 所托,幫4男5女做50K solo山賽support,我都係 solo 一個人在 CP 做補給,有擔起一頭家的感覺。我自小行善積德的事情甚少做 (買六合彩唔計嘅話),所以唔做唔知伏。
呢頭家品流複雜
Support 呢頭家有少許難度,因為9位跑手品流有少少複雜,大女是明星級的外星人,但有些是跑 50K 山賽的新手,有4位更是我素未謀面的囝囝囡囡,不過做得 support 就要負起責任,溫習了他們的照片幾遍認住唔認識的阿仔阿女特徵,千萬不能 miss 左。
----- 廣告 Ad -----
CP 位係城門水塘燒烤場,是尾站,賽道第44K,好關鍵,跟住要打埋針山大佬至衝得線,距離終點約7K (在中途約25K有第一個 support CP,由我們的星級 supporter David 哥負責)。8點起步,家中大女應是第一個會到我的 CP,估計時間約是1230,1130在波蘿霸小巴站下車,咩一袋,手抽一袋,袋中共有2件華御結、3枝大水、4樽寶礦力、7瓶佳得樂、9條蕉 (求總重量),慢行去燒烤場,發現今日地心吸力指數係紫色 – 極高。
1200去到 support 位擺檔,心諗一枝枝水,其實冇乜野要 setup,但睇見隔離的豪宅補給站,有地蓆、小型帆布椅 (閒閒地要等3-4小時)、噴水壺(可以幫跑手降溫)、撒龍巴斯、保冰劑 (冰敷完抽筋部位,又可以雪冰凍可樂)、蚊怕水…..,而我只有怕蚊的雙腿,其他的物資都冇諗過「係喎,要個喎」,不過好快原諒了自己 (是我的強項),因為我始終是入世未深的 support 菜鳥 (乜野啫,樂悠咭持有者唔可以入世未深嘅咩)。
12時許開始有超級撒雅人的男跑手由麥六衝落燒烤場,揚起了一陣風沙。嘩,即係平均 pacing 每小時10K (乜野世界),第一次在賽道見到這些星級跑手的正面,心諗洗唔洗咁輕鬆。他們過後,開始有等著仔女回家的感覺,約1245大女出現,大聲叫住佢,驚佢一陣風過門不入,詳細介紹了補給站提供的飲料和食品,大女好簡潔講左一句:「黃色,唔該。」收到,即刻攞左枝檸檬佳得樂俾佢,她接過後即走,又揚起了一陣風沙,好有 F1 跑車埋站換車呔feel,大女加油呀!
等了一小時都未有仔女到,但要守住頭家,唔敢行開去廁所。D仔終於出現,見佢蹦蹦跳,好有貨咁,佢話因為熱到 High High,叫我幫佢淋下水。係咪呢,如果呢個時候可以用個噴壺噴霧化水珠降溫,係幾咁pro嘅一件事。可惜我只可以攞起枝大水同佢照頭淋條頸同背脊,十分大媽幫阿仔沖涼。跟住打滿了兩個水樽,D仔仲要隊晒成枝佳得樂至上路,可見非常缺水,D仔加油呀!
幾分鐘後B仔來到,係第一次見面,不過我睇過相認得佢件戰衣。他見到我超開心,原來他開始作抽,又肚餓又缺水,於是立即搣條蕉俾佢,佢一路食蕉,我一路幫佢做人工按摩,密集啄下四頭,再用暗勁鍊下小腿,雖然手勢生硬,但B仔好似十分受用,大叫正呀。臨 say bye 前,佢仲堅持要同我 selfie,扮到好感激咁,我入世未深,也有點感動。B仔加油呀!
----- 廣告 Ad -----
![](https://i0.wp.com/fitz.hk/wp-content/uploads/2022/10/一家人齊齊整整返CP-2.png?resize=1200%2C829&ssl=1)
我的按摩B仔好受用,不過亮點是佳X樂
5分鐘後二女到,她在跑班是開3分尾披衝圈的女一,但跑50K山賽還是第一次,但見她輕輕鬆鬆,體力充沛,不用任何補給,交低個吉水樽,二話不說,飛奔向前。她身形雖然嬌小,但 turbo 強大,二女加油呀!
17分鐘後三女到,三女其實是50+的嬸嬸,而且長途山賽的經驗不多,想不到竟然與二女可以拉得咁近,而且沒有半點疲態,鬥志旺盛。加了寶礦力,取了蕉,沒有停下來休息,又往前衝上山,無論她的 look 和鬥心,與塵世間的嬸嬸拉不上任何關係,三女加油呀!
10分鍾後T仔到,也是未見過他的,只牢記著他在起點著件tee的顏色,可是他途中把上衣脫掉,赤著上身走過補給站,我miss左! 幸好腦海有一個hidden file突然被打開了,就是那副粗邊眼鏡,應該係佢啦。於是大叫T仔,他回頭過來相認,那一刻好像終於搵番一位失散了多年的親人,好開心。俾左條蕉同佳得樂 (唔明點解呢班來自唔同原生家庭的仔仔女女,都好一致要飲佳X樂),T仔加油呀!
![](https://i0.wp.com/fitz.hk/wp-content/uploads/2022/10/一家人齊齊整整返CP-3A.jpg?resize=936%2C709&ssl=1)
有胸肌冇肚腩的當然唔係我,David哥是星級supporter,可變身泰佬按摩
12分鐘後L仔到,個樣好生意失敗,原來在半程他已經腳痛,但佢冇下台,堅持走下去,雖然途中仲俾三女嬸嬸鎅埋,但佢受得起這份打擊,堅持走下去,終於走到我的面前。我扶他坐下,密集啄他的四頭,當想摸下他的小腿時,他立即大叫: 唔好,因為堅痛,估計是拉傷了筋肉,於是只輕輕按摩。吃了蕉,飲左佳得樂,休息了數分鐘,回魂過來。我拍拍他的膊頭,俾左個任務佢:要完成! L仔點點頭,俾左OK手勢加堅定眼神 (好鬼man),L仔加油呀!
其實最令我記掛的,是四女和五女,都是我不認識的年青女生,她們少玩山賽,50K是初體驗,目標不是做時間,是完成。她們一直都落在大後方,她們在中途 David 哥的補給位已經好攰,擔心是否能夠完賽。幸好分別在20分鐘和30分鐘後都安全到達補給站,雖然疲累,但精神飽滿,見有攝影哥哥,也識得高舉雙手扮「我無野」。因為是女生,我特別用心鼓勵她們,她們吃過蕉,飲過佳得樂,甜美的笑容又回來了,四女、五女加油呀! (呢次用真感情)
一家人齊齊整整返CP
最後大女攞冠軍是意料中事,三女嬸嬸在組別也得第一名,成績理想。其實最重要的是9位仔仔女女都順利衝線完賽,他們也十分生性,在群組交足感激戲,L仔更說,冇你地就冇今日嘅我,雖然浮誇,但踫巧我也是膚淺的人,受晒,令我有被需要的感覺。
![](https://i0.wp.com/fitz.hk/wp-content/uploads/2022/10/一家人齊齊整整返CP-4.png?resize=500%2C881&ssl=1)
有被需要的感覺好正
原來我在補給站不經不覺站了3小時,但一點也不覺得累,做 support 的,最開心的是見著一家人齊齊整整返到 CP,吃蕉和飲佳得樂,給力後,「打開門,行出去,去遠啲!」
----- 廣告 Ad -----
彩蛋
渣馬取消是命運,東馬抽中是緣份!
![](https://i0.wp.com/fitz.hk/wp-content/uploads/2022/10/一家人齊齊整整返CP-5.jpg?resize=696%2C685&ssl=1)
圖: enjoymovie.net