[巔峰山記] 首戰個人賽揹水一戰

絕對領域 2019-04-03

毅行者後反思

自從上回係毅行者完敗俾三位40+，對腳酸咗足足一星期有多後，心入面覺得自己能力有點弱。而我亦知道運動係無捷徑，所以毅行者後亦有反思自己實力上不足嘅地方。除咗經驗不足呢項不能控制嘅範疇外，亦有兩個自己能力可控制嘅原因，分別係里數不足同強度不足。而為咗彌補呢兩項，我決定閒時上山親近大自然。所幸嘅係小弟住沙田，上山可以話係四通八達，所以係屋企附近搵到條路上山，路線來回大約係15k。

還記得那一天，在那一天，初在山上堂～

那一天路線: 一起步，就要跑約2.5k先到達沙田坳獅子亭，原本想jog住上獅子亭，可惜山徑路段實在太辛苦，能力不足之下要邊行邊休息。初次自行上山，覺得個心肺已經要爆，聽到心跳聲，呼吸急促，上山 jog 住 chok 手亦覺得好似舉梗重咁。獅子亭後，係3K多嘅斜路，所謂成功需苦幹，捱過咗我就贏，所以呢段路我就算幾慢，我都 jog 住上，慢到隔離嘅行山客行都快過我……心諗自己真係弱到極點。過後係落東洋山再上番黎，俾幾K上山路段虐待過後，上東洋山用左我足足半個鐘 (悟空恩講過佢最快係20分鐘左右)，亦可能我實力只係值呢個時間。東洋山過後就係原路折返，時間係兩個幾鐘。但我同自己講，呢個將會係呢條路線最慢嘅時間，隨住每一次既堅持，堅持亦係時間上回應我。

初報個人戰．揹水一戰

透過堅持，慢慢進步，我終於有番小小信心 orz，亦喺悟空恩既游說下，報咗揹水一戰30K個人賽，而佢就同另外三位組成經典隊岀戰30K四人團體賽 (經典隊真係好經典，容後再講)。賽前其中一項重要環節就係試路，而百里駱駝亦加入今次試路。路線一起步係3公里斜路攻上山頂，百里駱駝二話不說就 jog 住上，心諗自己都苦練過一段時間，就跟住百里駱駝尾跑上去，結果係小弟再次完敗俾年近50歲既百里駱駝，過程完全無拉鋸，而係距離越拉越遠，心裡有點不甘。又係個句，明明我年輕一大截，但羅馬都並非一日建成，所以唯有繼續堅持。話番轉頭，當日試足30K既路，百里駱駝只係中途飲左罐汽水，而我地其餘人都各飲左約2L水。百里駱駝呢個名果然吾係流!

首場個人賽上演

同場重有公司其他職員參賽，左下:布歐BUG，右下:絕對領域(筆者) 左上至右: 特警卓、坦克銓、郭負城、悟空恩、大眼LO、世紀大懶人

當日到達起點後，由於我哋過份專注整理個竹籃，所以遲咗到起點而要係人龍中起步，起步後要係人龍中左穿右插過番啲人都咪話唔辛苦。因為係首戰個人賽，所以只求唔抽筋而十名內完成，亦因爲經驗不足，比賽沿途我都拎住個水樽跑用嚟補給，非常唔習慣。更要不斷左右手交替拎水樽，又係搞到雙手好似舉重咁累。因為人龍中起步，唔知大約排名，所以見路就跑，去到中後段開始追極無人就大概知自己排名應係前十。正當滿心歡喜諗住可以達成目標之際，抽筋大師係呢個時候嚟拜訪我，可能經驗不足，見路就跑，無俾自己回過 (簡單黎講係能力不足)，所以後段放慢咗跑，而上完最累嘅長樓梯後，終於不敵抽筋大師，最終要邊行邊跑邊拉筋不斷循環咁跑番終點。值得開心嘅係喜獲季軍。

----- 廣告 Ad -----

喺終點拉筋過後，搵到原本想睇我衝終點嘅領域美人，因為小弟表達能力差，令美人未能及時到達終點睇衝線，之後美人話以後比賽要同我一齊岀門睇起步同衝線，人生得此美人，夫復何求?

抽筋前夕 (photo by Yau Gor)

幸好頒獎時有領域美人一齊影相

講番轉頭，經典隊亦勇奪團體第四名，佢哋起步時每二人拎一支藥膏以備不時之需，可惜其中一支被時任最強最經典成員坦克銓壟斷 (曾經坦克銓抽筋程度嚴重至藥膏差點需要內服)，最慘後面三位要相依為命共享一支藥膏仔，佢哋感受係抽筋輪迴，四位成員再次相遇就係終點前等齊人，四人一齊過終點，過後三位發現坦克銓支藥膏未用過。