[撒哈拉超馬] 第三日: 無盡的沙漠

每日都睇倒旭日初升，象徵著生氣勃勃

每天比賽時間，大約都係響早上八時半左右出發。我地通常天未光約清晨五時就已經起身作準備，因為好早就已經有大軍殺到要拆掉營幕，然後輸送到下一個 end point 再重新起營等待我地嘅到埗。每一個早上，看著天空由漆黑一遍，逐漸一點一點的變得光亮；旭日從山邊徐徐升起，晨曦嘅陽光逐漸照遍大地，感覺，盡是充滿著朝氣。

road book，會詳盡地形容當日比賽路線

第三日了！出發前，我十分認真地研究handbook 所形容今日嘅路況。因為下一日係 long day，還要一口氣走八十多公里嘅路，今日必須要好好步署一下如何分配力氣，留一點以應付明日更艱辛嘅挑戰。結果睇倒的，就是重覆地不停出現「enter dune」及「sandy」等字眼，真係不禁叫人「滴汗」。

「嚟沙漠比賽，就當然係不停行沙㗎啦！唔係做乜要嚟沙漠呢？」

今日嘅賽距比昨日短，總共要完成三十七公里。頭七公里總算可以慢跑，我就繼續採取之前所用嘅策略，趁住早上天氣還有點清涼就 jog 一下。七公里後，就開始了漫長嘅沙域地帶，有些係沙丘，有些係較平嘅沙地，總之就盡是沙、沙以及還是沙。其實在沙面行走真的唔容易，每步嘅支點都不穩，每一下踏步都要好用力，同一時間太用力又會將腳插入沙中插得很深，所以力度真的要拿捏得恰到好處。有些沙地，看上去好像係實地，然而踏下去卻是好鬆，這個情況就更令我不時仆倒。曾經有人教過，最好踩著前人嘅腳印，因為腳印位已經表示沙被壓得較實；然而實際情況又不盡是這樣，我試過好幾次刻意踏過腳印位，結果腳印位即時散開令我嘅腳陷得更深，要更用力將腳抽回出來。所以最後還是要「見步行步」，靠感覺再去反應。慶幸今日所行嘅 sand dune 不算很高，加上自己有帶行山仗多左一份支撐，慢慢地沙域地帶總算是逐步逐步走過去。

有著行山仗嘅輔助，行過沙丘區也顯得無咁困難

今日嘅賽道有九成都係充滿著沙

到十一時左右，陽光越來越猛烈。今日比昨日更熱，我發現無包著嘅皮膚位置如頸部、膝頭背部開始有燙傷那份疼痛嘅感覺，人也很快口渴需要不停飲水，喝過後不夠五分鐘又要再補一次。 接近正午， 烈日當空，連呼吸嘅空氣都仿似有份燙熱，全身都有沸騰嘅感覺。每日中午十二時至三時嘅時間真係最為吃力，人就如響一個蒸爐入面走動一樣。不過有了早一天嘅經驗，自己知道要保持安靜嘅心靈去渡過呢個時段。其實自己身邊不時有其他選手經過，因每個選手身上前後都有掛上號碼布及列有名字，佢地從後走過時都會呼喚你嘅名字叫你繼續加油。最後慢慢地，又見倒終點在眼前了。不經不覺，原本又完成左一日嘅賽事了。

雖然完賽嘅時間仍然係好熱，但仍會一口氣飲晒杯熱茶，精神為之一振

----- 廣告 Ad -----

每次返到終點，大會都會提供一杯熱茶給參賽者；呢杯熱茶可以能令人有 relaxation 及 calm down 嘅作用，甜甜的，相當好喝； 不過大會有點吝嗇，每個參賽者每次只可以飲一杯；喝過熱茶稍為提一提神後，接著就是全日最艱鉅嘅環節。大會每日都會在參賽者過終點後即時派發 3支 1.5 公升嘅水，我們就要捧著共4.5公升嘅水由終點拱門返回自己營幕。終點與營幕雖然距離唔算好遠，然而一天賽事後體力已經耗虛左不少，加上拿著行山仗及揹著背囊下還要捧著三支大水，其實也真的是另一番嘅鍛鍊及挑戰呢！

4.5公升嘅水重量其實一點都唔輕

更多：
Fitz.hk Facebook專頁
[撒哈拉超馬] 第二日: 沉重的背囊
[撒哈拉超馬] 第一日: 34公里的挑戰
張思縈@Fitz.hk
Fitz Hiking 行山