[撒哈拉超馬] 第二日: 沉重的背囊

張思縈 2016-05-03

大會指定每個參加者嘅背囊至少要有 6.5kg重，以確保參加者沒有貪輕便而無帶足夠裝備及食物

負重所帶來嘅虛耗確是不能小覤；御下背囊後身體雖然不算十分勞累，然而肩膊嘅酸痛也真一直痛得要命。我自恃有兩年參加揹水嘅經驗，嚟撒哈拉之前沒有刻意做過什麼負重訓練, 結果到呢一刻，確係要「找數」了。

「死火，第一日已經咁痛，第二日仲要跑長 D ，真係都唔知頂唔頂得順……」

第二天早上，我地好早就已經起身作準備。望住放響地上嘅背囊，我真的有一份「未到最後一刻都唔係好想揹起佢」嘅感覺。

呢日嘅賽距比第一日還要更長，共 41.3km，但是 cut off 嘅時間只係比第一天多 30分鐘，叫我地不禁捏一把汗。起步嘅時間，天氣還算清涼，路段亦較平坦，我不敢怠慢立刻爭取時間 jog 了好一段路程。很奇怪地，背囊又不如自己所以為那般沉重；其實細心一諗，每日比賽完後返到營地同第二日起步之間都會消耗左兩餐嘅食物，背囊係會一天比一天輕。我提醒自己唔好比昨日嘅陰影嚇親自己，每日都係一個新開始，每一日，都要讓自己身體重新去感受。

呢日比賽嘅路程大致都算平坦

----- 廣告 Ad -----

山雖然唔高，但有點 technical, 炎熱嘅氣温更令攀越難度增加

上午整體感覺都還算輕鬆，只係一到中午開始沒有風，猛烈嘅太陽高高地懸掛，我開始覺得有點熱到透不過氣。CP1 後，時間尚算鬆動，我開始放慢一點腳步以急步行代替慢跑。未幾前面就要越過一個山丘；山丘不高，應該不過 200米；但是悶熱嘅氣溫令我舉步為艱，腳仿似有千斤墜著。當時都有一點點擔心，如此酷熱嘅天氣，還有20多km 嘅路程都唔知應唔應付得來。我同自己講：慢慢行吧，一步步嚟……慶幸越過呢個山後，大部份嘅路段都係一些碎石平路，縱然都有沙丘，但因為有用行山仗，加上沙丘較細少，感覺上比起之前那天易應付。由 CP 2至 CP3 之間疏疏落落行過幾個小村莊，有不少村落孩子響路旁向我地跑手打招呼，之後就向我地示意想要我地身上面嘅物品。雖然我明白佢地生活貧困，然而乞憐，卻並非脫離貧窮線嘅最佳方法。我向佢地報以一個微笑，心裡默默祝福佢地要振作，希望佢地他日能夠有機會得到學識，這相信是個更好嘅方法去改善佢地嘅生活環境。

沿途有不少孩童向你打招呼，但亦要求想要你身上嘅物品

返到終點，又是無比興奮，又完成左一日嘅賽事，時間比第一日還要快，那時我就發現，每日大會所定嘅時限不多不少反映左路程嘅難度。呢日真的好熱，返到營幕我趁住其他 tentmates 未返，匆匆地抹過身及沖洗一下衣物。沙漠氣候乾爽，只用濕毛巾抹身也好感覺都算乾淨，衣物亦一下子就乾透。Tentmates 陸陸續續回來，大家睇落仍很精神，只是不約而同都大嘆一句：「好熱呀！」呢日終於真真正正體驗到沙漠嘅熱度，但睇嚟並無打擊到大家嘅鬥志。梳洗及煮食過後，大家就盡早休息，抖足精神準備迎接第三日嘅賽事。

返到營幕總是叫人興奮，跟住就要趁tentmates 未返前趕快梳洗

----- 廣告 Ad -----

圖片來源：張思縈

張思縈

任職社工，從事戒毒服務已有十八年, 也是一名運動愛好者、旅者以及攝影人；喜歡嘗試新事物，並相信透過參與、實踐更能體驗人生。於 2015 年遠赴北極參加馬拉松，希望以克服極地環境之挑戰，宣揚「走出局限，奔向夢想」之康復訊息，鼓勵康復群體抱緊信念，努力跨越康復道路上所經歷之障礙，堅守康復方向，繼續追求人生所訂立之目標。