通勤跑逃離交通困局 (附8條通勤路線)

張伯倫 2018-09-17

網上圖片

風暴過後，城市滿目瘡痍，街道危機四伏。政府首長叫大家「互相忍讓」，要返工就要自己諗辦法。不過港鐵停駛，巴士無車，的士排長龍，小巴200蚊位，我哋仲可以諗乜忍嘢? 好彩，大家仲有對腳! 無車搭，咪跑囉。(曲線要講明，有苦大家知，唯有苦中作樂啦)

一下子「通勤跑」變為呢個城市生存嘅必要技能，由屋企跑返工，或者由公司跑返屋企，對於有跑步習慣嘅各位諸公，絕對唔係咩能人所不能嘅特技。只要準備得好，其實係一個良好嘅生活習慣。

達仔@HNR 示範通勤跑最標準裝備: 一個合適嘅背囊，最好能放置水袋。

通勤跑的事前準備

1. 試路一次
唔少人喺要返新公司之前，都會專登試一次返工嘅路線。睇下巴士嘅班次、步行時間等等，以免第一日返新工遲到。通勤跑之前，亦最好喺放假時試跑一次返工路線，計一計大概時間。留意下中途嘅補給、廁所，令你更可以掌握返工嘅時間。

2. 衣服及裝備
跑步時要穿戴嘅裝備唔使多講，當長課咁做就得。不過開工衫、替換鞋襪，以及跑後補給食物，就可以喺之前一日放喺公司，令你通勤跑時唔使負重太多。

----- 廣告 Ad -----

3. 沖涼
公司有沖涼房當然 perfect 池啦，無嘅話就搵定公司附近有咩地方沖涼同換衫。

4. 路線制訂
唔係人人都可以由屯門跑出美孚，或者由上水跑出九龍。最初不妨以鐵路為目標，跑去搭地鐵或者由地鐵站跑返工。

立法會議員、行政會成員，以及前落選特首葉劉淑儀女士，原來都係行山返工。圖: Regina Ip 葉劉淑儀

返工路線推介

我哋當然唔會知道大家住喺邊，所以只能提供幾條跨區線，大家要自己要安排。

----- 廣告 Ad -----

短線市區線

美孚西鐵站 > 尖沙咀 (天星碼頭)

功能: 防範港鐵壞車、彌敦道大塞車
基本路線: 深旺道 > 上海街 > 廣東道
距離: 至尖沙咀 (約7公里) / 至旺角 (約4公里)
Google 步行時間: 1小時44分鐘
沖涼/更衣: 九龍公園

油塘港鐵站 > 觀塘海濱花園

功能: 防範港鐵故障; 觀塘道開源道交匯處，為東九龍交通黑點
基本路線: 大本營商場 > 茶果嶺道 > 偉業街
距離: 約4公里
Google 步行時間: 44分鐘
沖涼/更衣: 海濱花園公廁 (只適合更衣)

紅磡車站 > 九龍城廣場

功能: 沙中線通車無期，萬一路面交通有伏，雙腳就是大家進出九龍城唯一的交通工具
基本路線: 馬頭圍頭 > 太子道西
距離: 約4.5公里
Google 步行時間: 52分鐘
沖涼/更衣: 城寨公園公廁 (只適合更衣)、九龍仔公園

善用公眾設施

堅尼地城 > 灣仔稅務大樓

功能: 防範港鐵壞車
基本路線: 干諾道西 > 中山公園 > 添馬 > 港灣道
距離: 約6公里
Google 步行時間: 1小時26分鐘
沖涼/更衣: 港灣道體育館

長途跨區線

屯門站 > 荃灣公園

功能: 屯門公路為「撞車」黑點，每日都有交通意外，萬一西鐵壞車，會叫天不應
基本路線: 青山公路
距離: 約21公里
Google 步行時間: 4小時26分鐘
沖涼/更衣: 荃灣公園 / 楊屋道體育館

青山公路深井段

香港仔中心 > 灣仔稅務大樓

功能: 逃離南區困局
基本路線: 香港仔上下水塘 > 香港仔水塘道 > 灣仔峽道 > 灣仔 (含山徑，大量上落斜)
距離: 約5.5公里
Google 步行時間: 1小時35分鐘
沖涼/更衣: 港灣道體育館

沙田新城市廣場 > 牛池灣斧山道運動場

功能: 防範鐵路 + 隧道同時擠塞
基本路線: 紅梅谷道 > 紅梅谷郊野公園 > 沙田坳道 > 慈雲山 > 斧山道 (含山徑及大量上落斜)
距離: 約8.6公里
Google 步行時間: 2小時21分鐘
沖涼/更衣: 斧山道運動場

沙田坳獅子亭

將軍澳寶林邨 > 觀塘泳池

功能: 逃離將軍澳
基本路線: 寶林路 > 翠林 > 寶達 > 曉明街 > 翠屏道 (大量上落斜)
距離: 約6公里
Google 步行時間: 1小時28分鐘
沖涼/更衣: 觀塘泳池 (需付費) / 曉光街體育館

* 資料所顯示的為 Google Map 的步行時間，跑步所需時間視乎閣下之步速與能耐。
** 路線只供參考，各位可按實際情況自行更改路線

溫馨提示: 如果條路有堅固障礙物，不要強行衝過，注意安全。