[逆走100 Rebel Walker] 大嬸的溫馨Support

大會圖片 攝: Foto Moo

「大嬸，我和表姐玩逆走100，想搵你做support。」繼上次逆之女的約定，面對男神教練情深款款的邀請，大嬸心又喜心又慌! (阿sir張祺豐是「豐山跑」越野跑班的教練)

定點 support 大嬸最有經驗，每年都在毅行CP提供各款美食、冰水噴臉服務等，再加幾句激勵振奮人心的說話，毅行 buddies 就 charge 滿電繼續上路。

大會圖片

溫馨support

「唔係定點 support，係 running support!」教練說。
「我嘅 support 都好溫馨㗎!」大嬸不明所以。
「running support 即係同我地一齊跑，主要幫表姐拎下 pole，照顧佢各方面需要!」阿sir耐心地解釋。

明晒，即係要一個快腳書僮。

教練同表姐參加 mixed team of 2，target 是做15個鐘，大嬸何德何能做書僮? 心裡冷了一截。

「我知你得嘅，靠晒你!」教練呢句說話就把大嬸冷卻了的心溶化了! 不過從那一刻開始，大嬸的腎上腺素沒有下降過!

大嬸和越野跑班中兩位同學被分派在獅子亭 (M101)，陪教練跑到水浪窩 (CP7)，約16K。

比賽當日0800起步，教練預計1530到獅子亭，我們要預備 in jelly 和華X結飯團給他們。約了兩位同學12點在黃大仙中心，時間應該十分充裕，去黃大仙廟祈個福都仲得。一路飲茶，一路 live track 住他們到CP的時間。

到了一點，打開 live track 一睇，嚇了一跳，教練頭20K開6分幾披，當路跑咁走! 1249已到了城門水塘主霸 CP4，下一個 CP5 是畢架山 (M109)，距離M101不遠。教練跑得快，其實冇古怪，對他來說游刃有餘。大嬸立即催促伙記埋單，搭小巴上慈雲山再步行上獅子亭。

狗狗也在等

獅子亭是 support team 熱點，已有不少支援隊伍陸續進駐，在那時經過的參賽者都是外星人，我們看見女子組頭三名，包括一位日本選手，她們都具備長跑身形，我們並有幸一瞻教練的師傅，毅行者先生 KK Chan 的風采。

新手Support兵團，準備了in jelly和飯團

各路Support team 已standby

出動埋 support dog

大嬸把 in jelly 和飯團放入冰袋，冰了一枝椰青水保持低溫，溶化了之後更有冰凍椰青水飲。因不知當教練來到時會否停下吃東西? 抑或邊行邊食? 又或者唔食住? 唯有預備好3個方案的食物擺設和 packing。唉，打理頭家真係唔易!

1445教練和表姐終於來到，比原定時間快了45分鐘，他們已走了50K，還氣定神閒，衣履飄逸，似乎還有好多貨係手。他們表示不停下來吃東西，大嬸連忙挽起盛載著 in jelly 和飯團的手抽，急步跟隨。

已走了50多K，教練仍步履輕盈，仲笑得出添

大嬸手挽保溫袋，似去shopping多過support

我們都是 support 新手，一切都靠臨場執生。快腳同學體能和速度最好，預佢照顧表姐，另一同學負責揹 in jelly，大嬸則負責飯團。起步沿沙田拗道上斜，大嬸剛開始仲有點氣力，總算跟到大隊。

可惜經過一輪上上落落，漸漸墮後，大嬸咬緊牙根，死跟。跑下跑下，過左基維爾營之後的萬里長城，又見番教練，仲以為自己跑快左，原來教練抝柴慢了下來。其實他早於大帽山已抝過一次，但影響不大。此時拗第二次，傷勢較嚴重，已跑不起來，改為步行。

雖然痛楚，但教練沒有停下來，面容也冇半點扭曲。他說平路和上山沒問題，落山會慢一點，說來淡然無事。我最佩服教練的心理質素，雖然抝柴，沒有哼過一句，他說不想影響團隊士氣。這樣就是專業囉!

教練拗柴的腳，賽後影的，絕冇P圖

真正的 running support

教練減速，接著的黃牛山和水牛路段勉勉強強跟到。可是表姐和快腳同學早已超前很多，不見尾燈。由於開盡比賽 mode，大嬸漸露疲態。教練突然說想食飯團，大嬸急忙送上。教練話表姐可能都想要，大嬸立刻開 turbo，追上前「默默送」。連自己都唔相信，竟然追番在前面的表姐! 大嬸終於體會到真正的running support!

表姐和快腳同學見到大嬸都有點詫異，因為自獅子亭一別，已經冇見大嬸成兩個鐘。留意到快腳同學和表姐獨處了一段時間，兩人已建立了默契，表姐不需要説話，快腳同學已懂得何時送水，表姐一個手勢即刻遞pole，非常合拍。看來快腳同學已成為專業書僮!

教練雖然受傷拖慢了，但仍然輕易拋離大嬸，不見了大嬸一會，他會問問另一同學:「唔知大嬸會唔會 miss 左啲路牌?」他見大嬸在後面追得辛苦，還鼓勵說:「大嬸，頂住呀! 落埋呢段好快到水浪窩啦!」教練窩心的打氣說話，令大嬸大為振奮。咪住! 打氣說話應是做 support 嘅份內事，sorry sir，係我失職!

開左比賽 mode，終於在5點35分到了水浪窩，比原定時間早了很多完成16k的 running support。成功護送教練到達，大嬸開心過自己贏左比賽，仲趕得及返屋企煮飯。

水浪窩的 CP 雖然美食豐富，有冰涷可樂、熱朱古力、飯團、蛋糕……等等，但表姐只去了廁所，很奢侈地花時間飲左杯可樂，沒有休息，隨即踏上極之艱辛的麥徑3段，挑戰令人聞風喪膽的雞公山! 此段只有快腳同學緊緊跟隨，大嬸與另一同學退下火線了。

水浪窩 CP7 是補給大站，也是大嬸任務終結之處 攝: run-pic

CP7 頗多美食和飲料 攝: run-pic

香港人始終鍾情維他奶

大嬸正整理行裝預備撤退之際，突然收到快腳同學電話，說表姐好想飲維他奶，因全程都在飲 TailXXXX 能量補充液，感到口 we we，很想有維他奶的滋潤 (好似在做植入式廣告咁)，叫我地急送上山。

大嬸即時飛奔去汽水機，可惜掃勻幾部機都冇，唯有派同學速遞綠茶上山頂住先，隨即聯絡將會在北潭拗接更的 support team 成員，買定維他奶到會合點。幸好她們都成功送到。

在疲累的歸程中，大嬸想起教練說如何操練長距離賽事，他會建議走一些高強度的跑山訓練 (tempo trail run)，強度會較比賽高少少，但距離要較比賽短。簡單來說，就是要用快過比賽嘅速度完成短過比賽嘅距離。

今天大嬸做到了，原來教練用心良苦，多謝教練邀請我做support，讓（其實係迫）我實踐佢嘅訓練理論。真的要感激教練，招募大嬸入伍!

後記

我們一班 support team 和同學仔在比賽期間一直 track 住教練進度，晚上約11點，在 WhatsApp 群組傳來喜訊，教練和表姐獲得 mixed team of 2冠軍，衝缐後相擁一刻的短片，洋葱味勁濃，我們都好感動!

越野山跑的魔力，非一般潮語可形容，但你懂的!

教練和表姐完成100K的神奇旅程 攝: Sanders Wong

慎入，有洋蔥 攝: 柏攝 Pat’s Photography

Fitz連結: https://fitz.hk/?p=116162