[新興玩意] 一個游唔完的泳池

一到夏天，當然想落水游幾圈，但係沙灘又係人，泳池又係人。人多時，喺泳池受返幾下拳腳亦在所難免。

最近有公司引入咗一個「無邊際泳池」嚟香港，等大家可以買返個放係屋企(條件﹕有地有錢)。「無邊際泳池」的原理就係泳池前方會噴出水流，將泳者推向後，而泳者則向前游。在力量此消彼長的情況下，泳者就會原地游泳，好似跑步機一樣。

「無邊際泳池」高約1.5米，長約6米，闊約2米。整個池共分為游泳池及按摩池。游泳池每次可供一人游泳，按摩池就可以坐三個人。成個池淨重1.9噸，如果裝滿水成11噸，一般住宅樓面應該負荷唔到，工廠大廈先有可能得。如果你住村屋有個花園，又想游下水就真係考慮一下。

事不宜遲，親身試試﹕基本上可以喺游池游晒四式，游落都幾爽(因為天氣熱)。由於「無邊際泳池」有水流嘅關係，要游直線需要花一些時間去適應。幸好池底亦有一條藍色直線可以望住嚟游，等大家保持直線，避免撞牆。開始時，泳者可能需要多一些力量穩定自己身體，游多幾游，就會漸入佳境。一般來說，泳手需要5-10分鐘時間就可以適應水流並原地游泳。

如果搞唔掂，泳池亦設有一條穩定繩可以幫助穩定泳者身體。原理就係將一條穩定繩連繫在泳者及穩定桿之間，以免泳者游得太快，觸碰到前方。

由於小弟亦是一個急流救生教練，當然會著住急流裝備游一游呢個「急流池」。水流嚟講當然唔快，但可以係香港感受到急流的一點點感覺，已經好鬼興奮(因為香港無急流，除非落大雨個陣)。

「無邊際泳池」好適合有錢有地，又鍾意游水嘅人。隨此之外，現在的中小學好少有泳池，學生要上堂都要出去外面公眾泳池。學校買返一兩個，訓練返幾個有潛質嘅學生，香港隨時多幾個歐鎧淳！大學亦可以用嚟做運動科學嘅研究，物理治療中心可以用嚟做治療，所以呢個池都幾多用途！

我會唔會買？

不在乎天長地久，只在乎曾經游一游！

P.S. 久唔久用廣東話成文，都幾有本土意識。

延伸閱讀﹕
Exerbox – A Portable Swimming Pool 無邊際游泳池
標誌貨櫃屋 組合屋 Markbox