掛起張bib，與子偕老。我羅楚健承諾無論老抽拗柴，懷疑人生，我唔會DNF (Ida，你啲gel會放係邊?)
如果47歲，做了15年公務員，大家認定他已在 comfort zone 中心享受生活，計劃去第二次冰島，因為上次沒有看到極光。仲博? 數日子啦。什麼也不缺，除了一團火之外 – 世俗會係咁諗 (最好屈世俗，因為世俗冇反駁隊)。
但呢個人是第一屆四徑的完成者 (298K)、跑左兩次PTL (UTMB系列，300K，100%自我補給)、疫情無賽事與 Elton (吳俊霆) 於3日內登上香港最高的100座山峰 (200K，總攀升約24,000米)、台北國際超馬嘉年華48小時賽 (跑了352K)、Badwater Ultramarathon (美國死亡谷217K)、八百流沙極限賽 (戈壁沙漠400K)，這些賽事連個名都殺死人。人做公務員，佢做公務員，真心想理解楚健係乜嘢質地。
楚健是第一屆四徑完成者，可以在四徑名人堂佔一席位
----- 廣告 Ad -----
與Elton 3日內連登百峰，好難相信佢哋唔發生感情 – 對香港郊野
約楚健做訪問時，他說:「我好平庸架咋，又唔係跑得快。」典型信佢一成系列。今次難得傳召埋專家證人，楚健太太Ida 一起。我們由香港公園上堅尼地道、寶雲徑，走荷蘭徑 (個名好勁) 到灣仔峽。
同勁人行荷蘭徑，3個字，好 襯
「我細個係坐唔定，一放學就游水、跑步、踢波、打籃球，羽毛球….，總之要郁嚟郁去。」這些對白、這些童年成長經歷，差不多每次都重覆出現在越野跑手的專訪中。
「佢係過度活躍症兒童。」Ida身為照顧者兼苦主感言。
初中的楚健，單純老實樣，似唔似過度活躍症兒童？
(羅太小檔案：Ida 是政府的資深AO，做得楚健太，Ida 也是越野跑和三鐵高手，創下毅行女子紀錄 (混合組13小時44分，路線不同於去年敏怡 team 破紀錄的賽道)、與楚健組 mixed team 在韓國毅行奪冠。是KK sir (陳國強) 的 Cosmoboys 早期隊員，楚健要稱呼她為師姐，恭敬地。)
----- 廣告 Ad -----
師姐帶師弟闖江湖，呢個師弟聽教聽話，有糖食
「讀書時玩學界田徑，跑1500、3000距離，我丙組時已經跑贏甲組。」楚健係骨格精奇兒童。
「入過屈臣氏隊，同李志和、海濤一齊跑。也跟過趙碧君考路跑證書。我係果代嘅人。」
參加 Round the Island 時認識鷹鷹 (曾進傑)、火車 (林成業)、五金等，組成UFO，及後打破毅行12小時的紀錄 (楚健形容為最有成就感的賽事)，早年玩金、銀鳳凰、Greenpower、環島。當年是 KK sir 的 Cosmoboys 首席跑手，並贏得香港、紐西蘭、悉尼、日本、韓國毅行者總冠軍。
楚健、鷹鷹、火車、五金，打死不離四巴打，預左火車sir表情多多
四條中佬，仍然好索
這個 resume 打造成楚健大師兄的名銜，亦是越野跑界的一壺濃荼。今次與不慍不火的楚健嘆荼，細說香港越野跑的沿路走來、回味幾場轟轟烈烈的超馬賽事、勾起與 KK sir 的師徒情宜，當中穿插不少與 Ida 的「史密夫決戰史密妻」式的有情有趣互動 (如果大過40就唔好話自己未聽過呢套戲)。
Badwater Ultramarathon 荒漠俠侶力戰死亡惡水
「惡水超級馬拉松」在美國死亡谷 (Death Valley) 舉行，位於美國加州的沙漠谷地，為北美洲最低、最乾旱以及最熱的地區。The World’s Toughest Footrace 的外號不是浪得虛名，最殺死人的不是135英哩的距離，而是走在超過54度氣溫的地面，長時間與滾燙的熱風博鬥，呼吸困難，熱力蒸發了水份和鬥志。
惡山惡水，被善良溫柔的楚健征服
「2013年報呢個賽事，只有100個名額，50俾新人，其餘俾舊人。新人要寫篇野俾大會，睇下你嘅aspiration 同經驗至決定俾唔俾你玩。加上成本昂貴，所以好少香港人玩。」文書嘢當然由 Ida 提供服務。
----- 廣告 Ad -----
「據我所知，極少有香港人參加，他們在香港會穿羽絨在30度氣溫操練。」
明白，是生意失敗+被女神飛+買左5千蚊黃牛飛睇美斯才會做出的行為。
由 Ida 主領的支援車隊(要用兩部車和三位當地義工) 沿途已不停為楚健灑水降溫，但當賽事來到一半，楚健意識開始低迷，惡心和不停嘔吐，無法吃下任何東西，體力直線下降，舉步為艱，滴答滴答，光看著時間一分一秒地流逝。
「離我的目標時間越來越遠，心中的挫敗感非筆墨所能形容，難道我半年以來的艱苦訓練都要付諸流水?」賽後楚健和 Ida 在一篇文章中憶述當刻的忐忑。
又來到留得青山在那怕 DNF vs 咁多人撐你唔係切咁衰仔牙嘅心理關口。
另一邊廂，在旁憂心忡忡的另一半卻陷入人生交叉點，「我知道楚健是個有着鋼鐵般意志的人，對自己想做的事從不輕言放棄。但亦是這份執着，令我擔心他會不顧身體的警號，勉強繼續。」Ida 此刻不知應進入妻子的角色去保護楚健，抑或越野跑手的世界鼓勵他去堅持。
「在等着補給楚健的空檔裏，我想着想着，終於忍不住伏在駕駛盤上哭了起來，直至我發覺一邊的隱形眼鏡已「隨水漂流」，才立即止住眼淚，以保住剩下的一邊眼鏡，單着眼繼續駕車補給。」Ida 的理性與感性。
有你同行，再難也可以熬過
楚健明白不要讓太太擔心比任何事情更重要，他終於願意走進醫療站檢查，並休息了個多小時，體力和意志覆call回來了。楚健恢復不少，順利完成其後的賽段。當他帶着香港區旗抵達終點，一向低調的楚健沒有太多說話，只有被他擁著的 Ida 才會感覺到那份激動。
「你講到咁艱辛，你去之前都知情況，點解覺得啱自己玩?」
「佢冇諗過啱唔啱，一聽到有乜嘢未試過，只要夠難，就會去玩。」Ida忍不住要出手，Ida冇不滿，只不過陳述事實啫。
「其實後生唔識死，最緊要覺得好玩，好似而家聰sir咁，試呢度試果度。」
楚健要拉個同謀合伙人，以合理化自己行為，相信聰sir已被不同人利用過好多次。
----- 廣告 Ad -----
48小時倉鼠跑冇時間懷疑人生
楚健的超馬案底累累，包括完成了美國著名的 Grand Slam of Ultrarunning (2015)，在3個月跑4個100miles 的山賽 (包括 Western States, Vermont, Leadville Trail, 和 Wasatch Front)。3個月之間往來香港美國數次，Ida 說 time lag lag 到暈。楚健的長跑路線是張世界地圖。
Western States 100miles 是越野跑的 signature event
能完成美國滿貫是踏入越野跑光明頂的門檻，亮點是首位華人，難怪要著型爆戰衣領獎
「我見中國福州有12小時繞圈跑超馬 (2013)，因為唔知係乜嘢概念，想試下，主動問大會可唔可以玩，佢哋又俾我參加，走了133K。後來覺得24小時仲好玩，參加粉嶺『香港哥爾夫球會超級馬拉松慈善賽』24小時組，我贏了3次，最長試過跑了212K (2017)，在日本、台灣都有玩。最後挑戰48小時至有feel，玩了兩次『臺北國際花博公園48小時超級馬拉松』，最長跑了352K (2016)。」同楚健一起，Ida 會煮少好多餐飯。
福州是首場12小時超馬，對楚健是小菜一碟。咁好玩，一定預埋巴打火車
其實要幾變態，至會去台灣玩48小時倉鼠超馬？
提議楚健向薛西弗斯挑戰，看誰48小時內推最多次石頭上山。
「其實48小時不停在跑係點樣過? 唔悶嘅咩?」
「唔悶喎，我要不停看錶計算步速，如果目標是做300K，每小時要達到什麼距離，如果快左可以慢落嚟，如果慢左要提自己每1K要快番幾多，要計住條數。又要諗每個圈點樣補給，幾時休息。跑下跑下又一個鐘，跑下跑下又一個鐘。」但係呢句要講48次。
「有跑手瞓覺，但我冇瞓，就係趁佢哋休息時超過佢哋，可以超前6、7個圈。」楚健有時幾有鬥心。
「我又試過在跑步機上連續跑左12小時。好似係為左預備 Badwater 的操練。當時是S記的市場推廣活動之一，在 Overlander 安排了兩部跑步機，另一部俾friend陪跑，12小時除了去廁所不落機，一路跑一路進食。」
「你係唔係一個有鬥心嘅人?」
「我係一個有經驗嘅跑手。我會依照我個計劃去做，要好相信自己是做得到。」答案迴得好靚。
「係乜嘢支撐住你不停去挑戰紀錄?」
「其實我唔係想做什麼名次，我係想知道自己可以達到什麼的水平，例如你做到某個水平，咁你即係達到國家級，再上一級是國際級，呢種認證就係證明自己有某種能力。名次只係錦上添花。」但點解楚健次次都可以有呢朵花嘅。
八百流沙極限賽 – 最接近死亡邊緣的賽事
「八百流沙」是出自《大唐西域記》，賽道長400公里，參考「玄奘之路」(唐三藏) 取西經之路線而設計，經過戈壁沙漠、甘肅酒泉三個縣市、瓜州、敦煌及肅北。路況超複雜多變，包括沙漠、丘陵、鹽碱地、峽谷、冰川、河流、高山草原。其實沒有指定賽道，主要靠GPS、指南針及地圖，限時150小時，極度挑戰參加者的體能和適應力。「據我所知未有香港人玩過，聽講聰sir今年可能玩。」都話聰sir是benchmarking。
不蕪之地，滿佈comfort zone外的足跡
「每個CP相隔20-30K，要自己揹著20-30 litre mandatory gear，睡袋太輕會DQ，因夜晚體感是零下幾度，但日間又會去番30多度。要租衛星電話，仲要帶煙霧彈預備求救用。在沙漠不會走到最短的直線，中間多次迷路，我總共走了442K，花了4天9小時20分多完成 (2016)。」
當年唐三藏冇咁多gear，只靠悟空、八戒同沙憎沿途running support，真係得?
「我 check 楚健個 GPS，見到佢成晚在幾百米的地方不停轉來轉去，形成一個線球，即係被困在一個結界，但我哋又冇衛星電話，聯絡唔到佢。」Ida 回想起來仍心有餘悸。
「我應該困在一個山谷裡，GPS 訊號混亂，在全黑的山徑困左9-10個鐘，兜來兜去搵唔到出路，氣溫是負數，已經開晒救生毯。大會見到我的狀況，text 我問洗唔洗協助，因驚太危險，會派人去搵我。不過如果接受，就會DQ。否則自己找方法搵路。我死都唔制，而且就快天光，相信會搵到條路。」
有命返嚟，又會諗下次，你咪話我話
「其實大會都唔建議跑手入黑後行該路段，因地形複雜。不過楚健啱啱夜晚至到。而家諗番轉頭，應該用啲時間嚟瞓覺，到天光才繼續。」Ida 賽後檢討。
「我冇聽大會建議，因果時我應該lead緊第一位，想爭取時間。我一直與第一名果位選手同行，入CP時我較快離開，故我head住佢。但我行錯路去左結界，最終以第8名完賽。」又話視名次如浮雲，我當然係攞嚟挑機，對於具實力的選手，比賽就係要努力爭勝，是股正能量。
賽完黑到Ida都唔認得
另一個令楚健覺得十個險的賽事是去年的 PTL，他與鷹鷹和火車sir組隊，牌面是鑽石級陣容，但原來是另一集死神又來了。
「PTL 冇一條正式賽道，你會經常迷路。又下雨又下雪。所有山路都鋪滿雪，又凍又跣，每人都跣低過愈百次。每一步都踏進厚厚的雪堆裡，而且你唔知下面是否一個深淵，一踩落下隨時踏空。試過有隊員一直瀡落長長的斜坡。最後完成率少過一半，我唔建議香港人去玩，自己都唔會再去玩。」楚健你去民政署辦理宣誓先。
咁好笑容，應該是出發前定完成後？
「楚健你做左公務員咁多年，一般人都覺得公務員追求穩定，無驚無險又到星期五。但你成日都挑戰呢樣挑戰果樣，add死神做friend。」
「我都覺得同一般公務員幾唔同，佢哋大部份唔太喜歡運動，行兩步都喘氣。」
「咁點解你咁鍾意走嚟走去?」
「因為我鍾意食野，食左嘢就要做運動去減番，否則會暴肥，是我的家族基因。我食野唔節制，所以要keep住做運動。」咁都唔洗不停跑48小時咁變態啩。
「咁你覺得肥有乜問題?」我好無恥地問。
「唔得呀，肥唔靚仔!」Ida在旁立即插口，驚我帶壞了楚健。
Ida 當時在芬蘭玩世錦三鐵 (果然係大師姐)，完賽後飛去 Genève，用五日時間去享受 UTMB 整條路線，然後接楚健放學。她當然想接番個靚靚仔仔的老公。
細說香港越野跑發展
「你咁多年跑齡，香港越野跑早期的入和賽事，有那些是具代表性?」
「根據我所知，郭華根應該是早於 KK sir 的越野跑手，跟住是KOTH (King of the Hill山野之王) 的幾位外國人，與 KK sir 好積極策劃和推廣香港的越野跑。」
「除了毅行者 (1981) 和 KOTH (1998) 外，其他signature 的賽事有「苗圃挑戰12小時」(1998)、金鳳凰 (整條鳳徑)、銀鳳凰 (半條鳳徑)、Green Power『綠色力量環島行』是我第一場贏的比賽….」
「Green Power 應該有成30屆。」Ida 隨即補充。我上網搜尋，環島行真的是30年前 (1994) 開始舉辦，不愧是香港越野跑的 wikipedia。
「仲有『樂善盃』(2001)，係我好鍾意玩嘅賽事，因為以前要跑上蚺蛇尖，什麼越野跑元素都齊備，好多高手都玩，由尖頂碎石路跑下去，好刺激，好鍾意呢種感覺。」幸好在旁的 Ida 露出笑容，沒有反白眼。
早年的樂善盃要上蚺蛇尖，此情不再
「樂善盃」的網頁 (Careaction)、報名表格、獎品等，都好有懷舊feel。
「因為危險，樂善盃後期沒有再上蚺蛇尖，我就冇玩，因我唔係太鍾意路跑。」
「金、銀鳳凰那個年代的賽事較 primitive，也缺乏有系統的訓練，到了 KK 成立 Cosmosboy (1997)招收學員，揀選精英參加毅行，才開始有系統的越野跑 training，亦多了很多本地人玩山，不過仍然是隊際，長距離賽嘅個人賽事唔多。」Ida 身為AO，擅於梳理資料。
Ida 繼續課堂:「到了 Janet 搞嘅 HK100 (2011，Janet Ng 是HK100的創辦人及賽事總監，也是國際越野跑協會 ITRA 的主席)，是香港越野跑的分水嶺。HK100 具國際 standard，吸引了很多國際高水平跑手來香港，近年更邀請得國內頂尖選手落場，競爭激烈 (大家每年都想睇向付召同敏怡的龍爭虎鬥)，對推廣同提升本地越野跑水平好有幫助。是一個達到國際標準的長途山賽。HK100之後，本地多了長距離賽事，例如 Salomon 100、Translantau等。」
敏怡與楚健，兩代星級跑手，努力把香港越野跑推向國際
「Janet 有好好嘅 international connection，將 HK100 成為 UTWT 世界越野跑巡迴賽每年首個分站賽事 (2014)，巡迴賽包含好多經典賽事，例如 UTMB、Western State、Marathon des Sables、Lavaredo、Mount Fuji…等二十多個大賽。將香港推上國際台階。HK100 更成為 Western State 嘅qualifying race。」Ida 娓娓道來，就是活本字典。
Janet曾與楚健並肩作戰 (Moontrekker)，好打得下
「未來越野跑應朝住將等級標準化，達致某些距離同攀升需要幾多時間，你去到什麼時間就係某一級嘅選手。」
「越野跑要係比賽同訓練標準化，不過唔同田徑，越野跑難標準化，同一距離但大家的山徑路況唔同。而家開始嘗試做緊呢方面嘅工作，例如 ITRA 將賽事計分。越野跑需要有共同嘅國際舞台或者world champ，先至可以互相比拼較技，至知水平去到邊。」Ida 擅長做政策分析與發展。
對，要打造一個越野跑光明頂，只要出到個張無忌，不單小鳳姐會到，家長會熱切送仔女上山學藝，以取得證書報學校，才可邁向普及化。
(講開越野跑世錦賽，話題又自然轉向香港某體育總會，跟住大家又自然激動了10分鐘。)
彩蛋 – 只要夠愛
「你哋結左婚幾多年?」呢條問題對男方有風險，可能弄出命案。
「2008年。」楚健安全達陣。
「佢點會唔記得，結左婚幾日之後就掉低我自己跑去北京。」Ida 呢條傷痕似乎未埋口。
藍天白雲，波頂為記，一家四口，笑意盈盈，隔住個mon，幸福都流瀉出來
「因為果時幫 KK 搞為汶川地震籌款活動 (開始時是為中國運動員基金等)，由香港跑上北京，2500公里，每日keep住要跑一隻馬拉松，跑左兩個月，籌左百幾萬。」辯方有合理辯解，做慈善就算過佢啦。
「其實你哋兩個點識?」我要轉話題。
「係 Cosmoboys 識。」Ida一定記得。
「你算唔算係 KK 第一代弟子?」
「唔係，Gone Running 嘅 JoeJoe 早過我，楚健遲一兩年至入嚟，所以佢要叫我師姐。」
「我係樂善盃贏左，KK 發掘我，佢話不如試下衝出去海外玩，可以 sponsor 我，從此就跟左佢學越野跑，參加左好多海外嘅毅行者。」難怪我訪問KK時，問他最有印象的學生是誰，他即時就說楚健。
「因為我聽話，做到佢要求嘅嘢。」
步履一致，是深厚的師徒情誼
「你同期有邊啲人? 仲有冇係山界?」
「同期有海濤、小葉等，不過已經再冇玩山，阿孫好似你話齋，跑山好勞累，操練好辛苦，好孤單，又成日出左去外面，唔夠鍾意，就會唔玩。」
「我仲有玩山，你要叫我聲師姐，唔該尊重下我。」Ida 好有威嚴咁講。
「可以可以!」
對，只要夠愛，什麼也可以。
師姐說不要強勁的臂彎，只想能承載人生起起落落的膊頭
後記
數年前初初玩山，聽聞 Altra 的山鞋是zero drop，當時完全唔認識咁即係點? 但zero drop 個名好似好型咁 (男人係膚淺），唔想成日著H記，山上個個都係。於是上 Gone Running 試下 (當然扮有誠意買)，同店員吹水之際，旁邊有位靚仔哥哥搭訕，話 zero drop 最大好處係有腳感，起初著小腿會有些攰，但好快會適應到。 呢位哥哥溫文有禮又誠懇，唔似打手，重要係只要你夠靚，就會信你 (呢樣嘢男女都膚淺)，於是入了對 Timp 2，以後亦成為賣飛佛。
後來才知該位哥哥是楚大俠，而我對靚仔 (包括靚女) 信得過的信念沒有動搖過。
