左J ack 右 King 中女，完成了有今生冇來世的神奇之旅。check 過，眼耳口鼻齊
PTL (La Petite Trotte à Léon) 是 UTMB 系列活動之一 (只要求完成，不是比賽)，PTL 意思是萊昂的小漫步，有點幽默，其實是300公里、25000米攀升的「小漫步」，必入 Don’t tell my mum/wife 系列，只宜三失人士參與 – 失戀、生意失敗和失智。
官網只平實地描述為: Mental toughness, team spirit, a sense of adventure, and core mountain values are essential to experience this adventure of a lifetime, a grand tour of the Mont-Blanc as a team.
PTL 是一場與命運的綜合格鬥 MMA
沒有浮誇嚇人的字眼，卻字字精華。Grand tour 以前是指富家子弟藉著遊歷歐洲城市，作為教育一部份。以此形容 PTL，親，確是一鑊含金量好高嘅教育。
PTL 的大佬，不是那組 300K x 25000M 的數字，要考驗的是 mental toughness、team spirit、好堅嘅 adventure 和認識山的靈性。在超級漫長和險峻的山徑中，你會出現一百種狀況，每一項都迫你壓埋牆角，用電鎗電你，用布袋笠你個頭再浸落水，令你在深淵邊沿透不過氣來。5日唔俾你瞓，唔俾涼你沖、連M巾都唔俾你，淨係俾滿腳板的水泡，一對甩底的山鞋，用火燒你的四頭肌，你極度痛楚、疲累、顫抖、渴睡、只祈求上天早些接你放學。
----- 廣告 Ad -----
見你扭曲的面容，只有殘留的軀殼，命運在冷笑，暗示前無路，問:「你認輸未? 剪帶未?」
「未！」敏怡用一貫堅定的眼神回答。
結果敏怡和兩個朋友組成的 JQK team，以132小時56分40秒完成，由星期一 (26/8) 走到星期六 (31/8)。這5.5日中她瞓了不超過10小時，可以不崩潰嗎? 120隊參賽，只有57隊完成，成功率不足一半。三隊香港team中，亦只有敏怡那隊能於限時內回到終點。
命運愈不客氣、愈技安，就愈要去闖，最多帶埋頭盔
每次約敏怡訪問，她都會對我說:「阿孫，我呢次真係好多嘢想講。」又有邊次唔多。不像浩聰小強般淡定冷靜慢慢道來，敏怡是個E人，喜樂哀愁總是澎湃洶湧，20米半徑內都輻射到。在太古坊附近的一間小店，敏怡與幾位花生好友，訴說一個 A man can be destroyed but not defeated 的故事。
敏怡精選了PTL的相片製成2025年的月曆，親手贈送給我。所以今次對敏怡的描述特別正面 (其他被訪者可參考)
----- 廣告 Ad -----
前傳 – DNF 初體驗
敏怡5年前與兩位朋友組隊參加 PTL，其中一位阿 John 不幸途中扭傷了腳，到了約200公里，終於忍不住要棄賽，「佢叫我同另一隊友繼續完成，因 PTL 容許二人限時內回到終點也當成功完賽。我哋覺得一定要齊上齊落，而且參賽是 John 主力籌備，絕不能掉下他不理，於是一齊 quit。」這是「香港四徑」女子最快完成者 (57小時53分) 經歷人生第一次的DNF。
去年 John 找來了JB (敏怡的朋友) 再玩 PTL，但因天氣太差，再次失敗而回 (去年香港隊只有鷹鷹、楚健和火車的 UFO team 能完賽，因太危險他們不建議港人貿然去玩)。 2023年敏怡因參加 UTMB 在法國 Chamonix 遇上了JB，JB 即聳踴敏怡今年圓夢，想像敏怡都會口裡說不身體卻很誠實果種，怎知她用了0.5秒思考即回答:「好呀。」PTL喎? 300K喎? 咁大件事你唔洗諗番十幾分鐘扮認真考慮過咩?
去年敏怡玩B仔時，與JB的約定，今年上演PTL復仇記
「可能因為 PTL 係我2024年9月7日前唯一的DNF賽事 (因敏怡在9月7日的 World Skyrunning Champs 2024 嘗到第二次的DNF)，這場未完嘅賽事一直埋藏在我心裡面，我要復仇!」都話女人記仇。
敏怡與 JB 及另一朋友 Anthony (An King) 組成 JQK team 報名，她說 Anthon y與 JB 都是實力雄厚的民間高手，相信能與敏怡成為 teammate 不可能是地球人類。
要在300公里的山頭度過百多小時，你點樣計算和準備裝備?」
「除左帶 Mandatory gear，只係帶少少自己鍾意食嘅嘢，因為大約每30-40K會經過大會指定山屋作為補給和休息，有前菜主菜飲品甜品，可以用大會提供嘅四張餐券換取，近似餐通常用20歐羅可以買到。意大利的山屋食物質素最好，有千層麵同慢煮豬扒。」冇想像中要啃好頹嘅杯麵同罐頭。
山屋不單提供重要補給，也是精神支柱，令人感覺仍然生存
一念天堂，一念地獄，好唔好味，自己決定
PTL 魔鬼和天使賽道深度遊
「路線方面，主要是環繞 Mont Blanc，比 UTMB 海拔高一個level，我哋每日都在2-3千米的山徑上上落落，UTMB是逆時針走，PTL 順時針。其間會經過一些 UTMB 的 check point，可以補給。
----- 廣告 Ad -----
「整條路線冇 marking，但有 gpx，有些山徑有鐵鍊輔助，指定要穿 harness (攀爬束套) 同頭盔，移動一定要落扣，我覺得路段其實不是太危險，只要小心點可以不落扣，因不停落扣解扣較麻煩。但如果是在地圖的黑線路段不用 harness 和落扣會被 DQ，有工作人員在監察。」
黑線路段，必須穿上harness、落扣和戴頭盔，行動緩慢，也是塞車黑點
「地圖上的黃色路段是沒有特定山徑，只有方向，要自己搵路，闖過草堆。經常要連續攀升或下降好長的距離，而且十分陡斜，還要孭住5-6公斤背囊，可跑性極低。氣溫變化好大，日間可以好熱，晚間和早上只有零至幾度，要著晒所有衫。今年的天氣狀況算好理想。」
「頭三四日啲山徑較 technical，因為有力，冇用pole。過左第四日啲路開始善良，不過我都開始攰，要開 pole。第三日要上和落一段好長嘅石河，估計係鳳凰山條虎哮石河三、四倍長，不過我鐘意爬呢啲石。」我在香港見過敏怡落 technical 的山徑，她好唔俾面啲石頭，完全當佢哋冇到。
跨過無盡的石河，唔係見到日出至堅持，係堅持至見到日出
「去到第67K的 Cabane du Trient，要爬上3000米的山峰，需要用 harness 和落扣，我哋朝早去到，有工作人員在監察，我哋跟番用 harness，有另一香港隊晏晝到，冇工作人員駐場，佢哋冇落扣，點知去到頂嘅時候，有個負責人親自監督，鬧佢哋唔用安全設施，DQ佢哋，搣左個bib。」
「係呢度要行一段好長嘅冰川，超靚。不過天氣好熱，曬到皮膚紅晒，我啲隊友唔夠水，冰川好長，行極都未完，有山窮水盡 feel，捱到去山屋時好滾動。」
「行冰川跣唔跣? 大會有冇規定要用冰抓?」
「其實唔係好跣，我哋著山鞋都可以，冰抓是 mandatory gear，但冇規定要用。」
漫長的冰川，一步一腳印
「去到122K的 Fionnay，有一個好巨大的水塘，風景優美，環塘路開鑿了一些隧道穿過座山，像長長的山洞，當中有些窿窿透光，可以行人和行車。穿過隧道就慢慢上山，是很特別的景點。」
彩霞喧鬧，驚破寧靜的水塘。實景，唔係AI。
----- 廣告 Ad -----
環塘設有隧道入口，穿過後上山
「當我哋去緊意大利的 Courmayeur 時，在路上發現野生藍梅，不是太大粒。但我哋忙於採摘來吃。又睇到日出，好開心。」難得地球上還有這些畫面，十分 AI。我數年前旅遊行過 UTMB 路段，也發現有野生藍梅，食到口腔和舌頭都變成深紫色，像吃了含笑七步釘 (我呢啲掃興友真係反浪漫)。
見唔見呀？香港都有它的近親叫「山棯」，個名爭少少，冇咁浪漫
新鞋甩底驚魂，竟然係呢個牌子
「第一個 CP 是41.3K的 Vallorcine (走了13:58:59)，攀升3867M，天陰少雨，好舒服，全部人都行得快，我哋隊 team 在中上游位置。到了廿K的時候，竟然發現左腳的鞋甩了後半截的鞋底，揈下揈下，搣又唔係唔搣又唔係，呢對仲係新鞋。」
「吓，咁都得!」、「有冇搞錯！」、「係邊對型號? 乜嘢牌?？」眾花生友最想知道元兇是誰。
「係XXXXX???? #囉。」自己破解啦，唔好pm/拷問我。(以後不要再中標題黨的伏了)
「好彩臨出發前阿媽俾左好多橡筋我，於是用橡筋穿過 Vibram 底嘅窿，再箍落前面綁帶嘅地方，頂住先，其實都會甩下甩下，行行下又會歪左。不過慢慢就會適應到，就係咁行左廿K到CP1。」
顧及對鞋嘅私隱同感受，要厚格馬賽克
「由於後備鞋放於 drop bag，要到CP2至可以攞到，於是問人有冇萬能膠，當然唔會有。又好彩我帶左強力膠紙，於是嘗試去黐。CP 內有位外國人見我咁慘情，他太太是參賽者，多帶了後備鞋，可以讓俾我著，但比我著開的size細左半個碼。由於唔知我對鞋會捱到幾耐，於是我接受佢嘅好意。」
幸運遇上兩位斯洛伐克跑手，慷慨「把鞋遺在路旁」，無言感激
「礙於大會有不能提供支援給參賽者的規例，不能直接把鞋給我，佢問過工作人員，可以把沒有用的東西棄掉 (明嘅就明系列)。」同樣，提議敏怡跌番一定數量嘅錢落地下。
「太太與另一女隊員是斯洛伐克人，先生來為佢哋拍片。佢哋勁好人，反而覺得一些歐洲大國的國民不太友善。後來在 IG 找到她們，其中一位靚女原來是當地的明星，也是當地越野跑的 KOL，我就係著左明星對鞋。」敏怡發達啦呢次。
仗義出鞋的 Lenka Poláčková 是斯洛伐克明星，也是山界KOL，IG有15.6萬粉絲 Lenka IG
「對鞋細左半個碼，起初上山沒有太大問題，但落山時腳趾會往鞋頭踫撞，腳趾公好痛，一定要收慢。終於捱到有drop bag的CP Orsières (92.9K, 8778M)，已經是第二日夜晚 (37:20:00)，即係著住頂趾鞋走了50多K。」
學術討論 (一): 你寧願勉強自己與一對頂趾鞋相處，換取較好的保障，還是與自己合得來的甩底鞋，浪跡天涯，但不知何時它會離你而去?
「腳趾甲出晒瘀血，好彩有帶指甲鉗，即刻做手術剪腳甲讓瘀血流番出嚟。」
「以為呢個CP有涼沖，原來冇，只能夠抹身。開始feel到有水泡出現，但未出到嚟，於是塗定凡士林。由於有 drop bag 有衫換，我哋大休左4小時54分，係我第一次瞓覺，不過我只係瞓左個幾鐘，因為都好多嘢搞。我哋策略係每個CP瞓少少，好過一次瞓好多而其他唔瞓」
「第三日起身可以睇到日出，好靚。呢日對腳係最開心，因為有 drop bag 可以換番自己對鞋。」返番屋企，住番原本實用面積，不用做擠迫戶。
水泡災難
「第三日晚發現前腳掌位開始起水泡，左膝又有少少痛，上落樓梯都好辛苦。係室內地板行嘅時候，感覺啲肉會黐落個地度，拎起隻腳時好痛。
「你以前會唔會起水泡?」
「有，呢次一時疏忽，冇做任何防禦措施。我嘗試督破一些，不過沒有大分別，唯有忍住痛繼續行。不過水泡痛也有好處，令我忽略了左膝痛。」原來每次只能痛一樣都有好大好處。
「去到186.8K的 Saint Rhemy，是第二個亦是最後一個有 drop bag 的 CP。我又忙於處理水泡的困擾，用凍水浸下會舒服點。但兩隻腳指公腫到周圍出水，可能有啲真菌感染，要剪破放啲水出嚟。」這些我們要咬住條毛巾至敢做的手術，見慣大場面的張醫生是小菜一碟。
瘀甲、水泡、黑邊、磨損，請不要嫌棄這雙喪屍腳，它們燃燒自己，成就了你的夢
浸下冰水，希望雙腳重新做人。亦希望呢個煲不要再用來煮公仔麵
遇上睡魔和親戚的追撃
「我搞呢堆嘢已經用多咗好多時間，加上我食嘢慢，所以冇乜時間瞓。而且我多數係最遲，搞到大家遲左起步，好唔好意思，感激大家體諒。」
「行夜路時，發現係深水埗買嘅18650電竟然入唔到頭燈內，而後備燈又壞左，只好用隊友支燈，但唔係好夠光。加上我十分眼瞓，行得好慢，靠枝 pole 撐起個人。最後都要係山頭瞓左15分鐘。因為如果瞓得耐會好凍。有時會輪到 JB 眼瞓行得超慢，反而 Ah King 瞓得夠，水準穩定。」
眼瞓話嚟就嚟，唔洗申請，冇預先通知，一嚟到你就要熄機，冇得駁咀
「另一香港隊被 DQ 的原因，就是因有一名隊員太眼瞓，係個山上面瞓左好多個鐘，過了 CP 的 cutoff time。」眼瞓就是身體要熄機，同大腦無任何商量餘地。
還有另一件事殺敏怡措手不及的，是過了 Courmayeur 之後，M親戚竟然提早到來，「以往都是有遲冇早，預計應該在9月初才找上門的。」怎知就在沒有百X、沒有萬X的3000米山頭突然來訪，令主人家手忙腳亂，教訓就是意外總是發生係冇準備嘅人身上，一定要記住梅菲定律。
Courmayeur 之後是上坡，要打的大佬仍然是滿腳趾滿腳掌的水泡，「上坡有一些好大級嘅石，踩中水泡真係超痛，我忍唔住係度爆粗。」理論上爆粗效果好過咬毛巾，前者是進取式宣洩，後者是防禦式忍受。(學術討論(二): 兩公婆不和起衝突，應爆粗定咬毛巾忍左佢? )
「用凡士林處理水泡已經冇乜效果，我諗到一個方法，就係盡量搣爛晒水泡，再用黐鞋底嘅膠紙密封隻腳，令水泡不能變大，也起到保護作用，我決定捱到去終點前都唔會再處理啲水泡，case closed。」對抗命運，但我永不怕捱，過去現在，難題迎刃解。
當地跑手推介呢枝防磨膏，十分有效，敏怡即入
搞喊了敏怡
「最尾果日要上二千幾米嘅山，落坡時右腳四頭肌超痛，應該係早前拉傷引致。要用左腳做主力，其實左膝本身都痛，但而家已經是微不足道。後來右腳連上山都痛，再到落山時真係頂唔順，要喊出嚟。」
「其實之前出現好多唔同嘅痛，我冇乜同佢哋講，雖然趷下趷下，但盡力跟。不過呢一刻真心 enough，我同JB講我好痛，於是佢幫我孭埋個背囊，我再用膠紙紮住個大髀。如果冇佢幫，有可能剪帶。去到後段的平路相對善良，我可以孭番自己個袋。」朋友總比大耳窿好，因為大耳窿只能借錢，借唔到膊頭。
「最後50K我哋原本諗住要用24小時，結果用左15個鐘，由朝早6點行到夜晚9點去到 Chamonix 衝線。」三人衝線後沒有倒地激動大叫，只來個深情擁抱，一切盡在不言中。背囊盛載著滿滿的回憶，留待日後慢慢傾瀉回甘。
所有痛苦的經歷都一一跨過，因為同行是最大的力量
「回想整個過程，PTL 令我認識了自己嘅 limit，我成日以為自己嘅四頭同膝頭好強，但當持續長時間上落山，左膝可以完全用唔到力，拒絕開工。」
「同眼瞓搏鬥係最辛苦，另外就係持續嘅痛楚，第一次玩四徑時，最後鳳徑70K隻腳好痛，但痛完70K就完結。但 PTL 係要痛好多日，日夜都繽紛痛。不過我有強大嘅意志一定要完成，因為大部份都只係皮肉之痛，用意志可以捱到。」請問意志如何入貨? 可以淘嗎?
「每日都有一個新嘅難題，迫我要 quit，可能係個性問題，大多數我都冇講出嚟。但始終冇諗過 quit，因為體力OK，只係痛啫 (只係痛啫，簡直唔係人話)。今年天氣實在太好，係千載難逢嘅機會，一定要完成。」對，只要堅持目標，世界就會配合。
當命運對你不客氣，敏怡沒有出 post 鬧爆冇打1823冇報東張，反而看見烏雲邊緣的銀線，更能感恩一切善良的際遇，包括在路上遺下了山鞋的斯洛伐克人、帶多了的橡筋、令人精神抖擻的日出壯麗美景、當然還有兩位情義兩心知的隊友。
雖然敏怡好多嘢講，但你好難唔覺得上天對她確有點偏心。
彩蛋
我和幾位花生友約了敏怡在餐廳做訪問，她入來時短褲跑鞋，滿臉陽光的笑容，在門口已好用力和我們揮手，好似好高興見到我哋。
「你今日唔洗返工咩?」
「要呀，放工去左做gym。今日只要我睇晒症就可以準時走。」
「你好似做緊件工計嘅工廠女工咁。」
「係呀，我今日睇症 pacing 快，平均有8 EP per hour。我諗我平時跑山都有1x EP per hour，點解我睇症唔可以咁快?」
「有啲病人好長氣㗎。」、「特別係啲老人家。」、「但係有啲淨係要張病假紙。」
花生友紛紛總結經驗。
「其實純為攞病假紙係少數。遇到要講好耐果啲病人，就好似 trail running 到左上山同石級，預左要放慢，冇得急。但到左平路同下山，你就要加速追番時間。」
下次睇醫生遇到敏怡，你要同敏怡講:「張醫生，我係針草帽，唔係引水道，你唔洗急，可以慢慢講。」
捉著青春的尾巴，追趕自己的彩虹
