年青人去做叫體驗，嬸嬸去做叫瘋狂，我去做叫找死
到了某個年紀，身體、行為、思維會慢慢產生變化，男的叫佬化，女的叫嬸化。體型與地心吸引的長期對抗戰中宣佈落敗，面部、胸部、臀部及腹部下塌。「算把啦」心態成為核心晶片，對自己的要求大幅降低，反正熱血在愛情與事業兩大戰場早已下架，職場搏下？算把啦 (又唔係等錢開飯)；執番靚少少出街? 算把啦(又唔係要去獵物)；落運動場跑下 keep fit? 算把啦 (又唔係玩港隊)，結果自己團火自己冚熄!
挑戰? 夢想? 熱血? 都50+啦，咪玩! 咁，人生就提早完結，雖然你仍有呼吸!
May 姐是較資深的樂悠咭使用者，Rebecca 是樂悠咭菜鳥，她們就是趁著仍有呼吸，放低嬸嬸標籤，勇於去挑機自己。她們在4月初前往摩洛哥參加撒哈拉沙漠馬拉松 (Marathon des Sables Legendary，MDS)，參賽者須自攜重逾10公斤裝備，分7天 (6個stage) 於沙丘、山徑和乾涸河谷奔行250K。MDS 被稱為地球上以雙腳參與的最艱苦賽事 (都係加番之一穩陣啲)。
----- 廣告 Ad -----
今年是第39屆MDS，較少人參加，好多跑手都留quota明年的40週年
「我第二日開始食乜嘢都嘔番晒出嚟，直至到第六日都冇食過嘢，我冇照鏡，但我見到肋骨都突晒出嚟，感覺原來真係會死。」她們可能覺得人生太短，今次出手好重。
三重意義: 訪問、聚舊 (「三嬸一叔」創會的三位嬸嬸: 右起 May、Rebecca、Corinna)、並與教練KFC慶生。唔講得笑，呢度閒閒地幾百張嘢
前傳
兩位嬸嬸跑100K山賽和造攀升紀錄的案底壘壘，Rebecca 更於前年朝聖了B仔 (UTMB的100 miles)。當她感到口淡淡之際:「我之前一年跟公司去約旦公幹，愛上了這個城市和沙漠。於是去年決定報名。」好似突然想去赤柱行下咁隨意。去沙漠喎，自然預好友May姐一份。
「Rebecca 叫我去，我話痴線啦。」明，等於選港姐，一定係損友聳恿。
「我諗 MDS 未必完成到，不過一直都好想去一次撒哈拉沙漠，果度夜晚嘅星空會好震撼。」May 姐把這個夢想一直埋在心裡，其實最重要有人陪，Rebecca 主動提出，驚動了夢想。她亦渴望一會這被稱為 life changing 的活動。
夜空喧鬧的繁星，驚動了夢想，揭開了一場life changing挑戰的序幕
「物資方面有乜嘢要注意?」
「我哋帶錯晒囉!」May 姐說來有些激動。「大會規定每人每天要有2千卡食物 (因CP只會提供水和醫療支援)，我哋大包細包才湊夠數，仲要帶煮食用具，塞到個背囊成11、12Kg。但看見其他選手背包只有一半重量，原來佢哋一包食物已差不多有2千卡。佢哋拆晒包裝減輕，有些更冇帶爐具，用凍水開。我哋冇經驗。」兩位，原諒自己吧。況且錯誤係進步嘅 pacer。
----- 廣告 Ad -----
「大會規定要有兩粒雞精作鹽湯補充，因為有七天賽事，以防選手進食太多鹽丸，對身體造成傷害，不過用雞精開水超難飲。有次CP位醫生要我飲鹽湯，我飲咗啖即刻嘔番晒出嚟。佢知我好想飲可樂，氹我說如果飲晒鹽湯就俾多杯可樂我，於是我咪下咪下飲晒，其實因為粒雞精溶唔晒，湯冇咁惡飲。」為了杯可樂，乜嘢做唔出。
指定裝備還要有實體指南針、地圖，因賽道沒有gpx提供，要識使用地圖，沿途有旗仔指標，不過茫茫沙漠中不易看到。May 姐速度不高，未必跟到前面選手，約8至10K會有CP。另外要有刀和打火機，若迷路待救援時可以燒著火光，令救援隊知道位置。「有跑手話我哋背包太重，為了減磅我哋要棄置一些裝備，替換衫都不留。」
為了模擬沙漠操練，出發前特別負重在淺水灣踩下沙。後來發現淺水灣同撒哈拉相差了兩個地球
五天吃不到人間煙火
兩位嬸嬸懷著既興奮又緊張的心情 (這種心情隨著年紀愈來愈少有，要珍惜)，於4月2日抵達摩洛哥有「沙漠之門」之稱的 Ouarzazate，再搭6小時巴士到起點。那裡搭建了百計的帳篷，供1009位參加者分6個stage，渡過七天：
- Stage 1: 32k (20 miles)
- Stage 2: 40k (25 miles)
- Stage 3: 32.5k (20 miles)
- Stage 4: 82.2k (51 miles)
- Stage 5: 42.2k (26 miles)
- Stage 6: 21.1k (13 miles)
賽道和距離分佈每年都不同，不過必有全馬、半馬和超過80K的long day。
簡陋的帳篷，承載著豐盛的生命
並不是每人一個的帳幕，是開放式的帳篷，只靠幾枝木柱支撐著，約6、7位跑手擠在一起。晚上好大風沙，成身都在磨沙。大家都忙於固定帳篷。May姐第一晚就是被吹倒的營柱打中膊頭受傷，好痛，Rebecca 給了粒痛博士撐住。餘下的日子都要負傷背著重甸甸的背囊上路，走路時側埋一邊，十分虐老。
原已要負重10多公斤，但上天加辣，第一日May姐已被塌下來的營柱重挫了肩膀
第一天的賽事用了約6小時，順利完成。但第二天May 姐出現狀況，不能進食，消化系統拒收任何入口貨物 (為了平衡貿易逆差?)。缺乏熱能和補給，只能飲水和可樂，但每天大量體能消秏，情況不妙。而且晚上又要與風沙和鼻鼾聲博鬥，睡不好，非常乏力虛脫。輾轉反側的May 姐望著身旁呼呼熟睡的Rebecca:「公平咩!」
咁得戚歡樂擺pose，應該都係出發前影
----- 廣告 Ad -----
「因為工作人員都知我不能進食，每到CP都要我篤手指，量血氧。我冇帶gel，醫生又開恩准我飲可樂作補充 (可樂是貴重物品，義工不能提供給參加者)，這幾天只能靠可能維生 (某可樂一定要搵May 姐做代言)。
「你哋有冇得沖涼?」另一位嬸嬸 Corinna 最關心此一環節。
「大會每人每日配給5公升水，你自己決定點用。不過唔會攞嚟沖涼，去到CP都有水任你淋降溫，唔洗點沖涼。」
點滴是生命，在此最能體會到
MDS髮型，很多女跑手都把頭髮結紮成辮，以防風沙藏在髮間
「頭幾日我都唔係最後一個回來，好多跑手到了半夜會在CP會瞓下覺先，因為還有有充裕時間回終點。所以隻駱駝都唔洗成日睇住我㗎。」大會有隻駱駝做掃尾。
The Longest Day
好不容易熬過頭三天的104.5K，真正的考驗是第四天 Long Day 的82.2K，兩位嬸嬸都出事。Rebecca 在去第二個CP途中，聽到近半月板附近突然pop一聲，唔係好痛，但感到腳軟一軟。「入到CP，有位跑手覺得我好可憐，送了些tape俾我，貼左後又繼續行。」
Rebecca 出名捱得，經常都說 OK 我冇嘢喎仲行得唔洗理我，相信要將她報告的痛楚同辛苦程度乘大兩倍才會接近真相。過了CP4向終點進發時，有位大會攝影師訪問 Rebecca，她說:「I don’t know what I’m doing，I just want to go home」
令人諗起 KK Chan 在 UTMB 想 call Uber 返沙田，其實意志如鋼的 Rebecca 意思是返大本營
May 姐較現實:「原本我諗住係 Long Day 會撒，行得幾多得幾多，唔會覺得自己可以捱到一個通宵。」May 姐早已有plan Q(uit)。「當天我去到CP，醫護人員總會排晒隊招呼我夾手指量血壓等。唔知點解有位醫生除左我對鞋，原來想幫我處理水泡，怎知發現我一粒水泡也沒有，感到十分驚訝。」May姐可以做埋鞋和襪的代言人了。
可能配合劇情需要，CP4之後天氣惡劣，出現狂風驟雨，又有風沙，好凍。Rebecca 憶述:「踩每一步都好似踩落豆腐，好討厭。」May姐聽聞 Long Day 約有三百多名參加者過不到cut off time。
「可能大家以為我是年紀最大的參加者(大會資料更把May 姐的年齡誤寫為75歲)，當天有不同跑手都主動陪我走。在CP有位英國跑手 Mathew 在旁，聽到我的情況，覺得我好癲。我離開CP時腳步浮浮，他一直陪住我，我叫佢行先，佢堅持要陪我返到終點，我哋係最後回來嘅跑手。」May 姐側著身軀(因一邊膊頭受傷)、一柺一柺走回來，差不多所有參加者和工作人員都走出來列隊鼓勵，超滾動！
----- 廣告 Ad -----
英國跑手 Mathew 拖著比他年長得多的 May 姐返回終點，參加者和工作人員都出來鼓掌喝彩，他們全都是上天派來的天使
此短片有28萬view，成為國際焦點
「在港好多親友家人見到這個 video 都十分擔憂，紛紛 text 問候。」大會也把這短片放上媒體，到目前有超過28萬個 views，雖然 May 姐在自己的FB 寫這天柒出國際，其實短片成了國際焦點 (加上被報大了10歲)，正正唱好港嬸。
「真心感恩在路上遇到的跑手、醫生、護士、工作人員、和好多是大學生的義工們，靠他們的支援、關懷和激勵，才有力走下去，都是上天派下來的天使。」都說如果你好想達成一件事，整個宇宙都會聯合起來幫你。
在六天的stage 5 (42.2K)，May 姐仍晨早摸黑起身，雖然背囊已輕過10公斤，卻負著滿身的疲累和傷痛，一步一腳印往CP走。跑了22K，好不辛苦登上135米的沙丘 (是沙丘，每踏向上一步，你會跣後3步)。「我以為我會完成 stage 5，不過到了26K的CP，法國醫生check 到我體溫過高，必須立刻送我去 medical tent 降溫。醫生說如果浸 ice bath 都無法降溫，就會call直升機送去醫院。」
「我好冷靜地跟醫生走 (因為要交「我冇嘢」戲)，冇諗過 ice bath 先係人間地獄。泳池底下是冰床，全是大舊大舊的冰塊，兩三分鐘後我覺得快要結冰。足足浸了15分鐘才降到正常體溫，終於唔使叫直升機!」冰浴完，好神奇地所有肌肉酸痛和膊頭嘅疼痛都消失了，厲害過小龍女的寒玉床。
May 姐雖然未能完賽，不過比別的嬸嬸完成了更多
May 姐也在此退賽，Rebecca 在餘下的兩天仍苦撐著，最後用了63小時44分完成了整個250K的沙漠賽事。她在訪問當天還喊著雙腳痛，轉過頭於5月10日在印尼峇里的BTR Ultra 30K越野賽中，以6小時10分勇奪 Master 組別亞軍。或者，我們要接受地球總有些現象是解釋不到。
兩位打不死的嬸嬸，You’re the legends，致敬!
無論幾大，都要把生命活得美麗！
“What am I doing here?
Searching my best self, the best version of me.”
