右起：飛哥、Matthew、Jacklin、Benny。這團伙，這團火，令山徑明亮，荒野有情
塵世間，除了愛情，還有什麼事情你會蝕住做，笑住蝕？人總是犯賤，辛辛苦苦賺了錢，係都要做一些蝕本嘢，到最後結算你才會覺得人生賺左。文西，我開始有啲亂。
今次訪問 V162 (Victoria 162*) 四位核心搞手，2018至今，他們舉辦了8屆賽事，每一屆都在蝕，分別是蝕得甘，同蝕得仲甘。大家都知，在香港搞山賽是挑戰命運的生命勇士。V162 還要是100英里stage賽事，簡直是自啪含笑半步釘。但截數至今，他們又覺得賺了許多 (說時冇食太空油)，娓娓道來，洋溢著歡愉的笑聲和回甘的滿足，絕不是四位怨婦在哭訴上天弄人。
大會提供5星級營幕，stage race參加者可以好好charge番電再上路
團伙包括兩位創辦人 Matthew (Race Director) 和 Philip (飛哥，Race Operations Director)，還有 Jacklin (Executive Director) 和 Benny (Image and Production Director)，咪以為起個懶型嘅 title 就唔洗做，其實他們由在天空做策劃構思指揮，到係地面搬水運蕉頒獎都係落手落腳，和四百多位義工在努力，把橫跨九個郊野公園、含24個CP、幅蓋範圍最廣的100英里賽事，在香港落地。
這次訪問源起跑班有位嬸嬸同學 Corinna (頭盔：嬸嬸這稱號因她以「逆流大嬸」從郊遊到直入UTMB | 從不可能到無限可能: 逆流大嬸贏得清邁 by UTMB 組別冠軍 的筆名寫文章，與外貌造型冇關)，參加了六次 V162 的比賽，覺得搞手好有 heart，賽道有特色，CP 食物又正，獎座、完成牌又靚仔，她說:「阿孫，你唔好淨係寫啲出名跑手去吸睛，一些有心有力嘅幕後英雄，都好值得訪問和鼓勵。」「OKOK，我安排下。」一來為了洗脫罪名，二來 V162 口碑得，聽到不少參加者都話 like，三來搏有個免費參賽名額 (我應該諗多左？)。
右起是飛哥、Corinna、Jacklin、Benny；Matthew因身處加拿大，在手機中與我們隔空對話，我哋都有問佢想飲啲乜嘢。(鳴謝Corinna安排場地，Jacklin請飲咖啡)
因睇唔過眼入廚房
搞得山賽，搞手當然喜歡跑山。Matthew 玩了八次毅行，「2014-15我同時玩了 Lantau 100 (2013年)、TNF 100、HK100和毅行四個100K，完成4 x 100 grand slam。」Matthew 好 high，不過都話 take 嘢衰硬，他覺得玩 100K 唔夠癮，開始踏足100 miles，「我差不多試過晒所有香港的 100K 賽事。我第一隻 100 miles 係2014嘅 UTMF，跟住2015玩 UTMB，回港玩埋雷利旋風160、HK168、UTHK (170K)、環大帽山越野跑 (UTMT 162K，爬升9032m)。」
Martin Mok 即係 Matthew (不過右邊位大隻男 (John Ellis) 唔係佢嚟)，完成四個 100 miles 賽事，冇死到，於是決定自己搞番個
Matthew毒癮愈來愈深，2017年食大茶飯玩埋真四徑，「我係生存者，不過果時嘅rule鬆啲，可以80小時做survivor，而家一定生存唔到。」可能當年寬鬆，所以你至可以生存到今日。
----- 廣告 Ad -----
Matthew 堅係玩過四徑 (2017)，仲生存到。留意番，果時 Matthew 頭髮未爆炸
「因為期間見到某些賽事 CP 安排做得唔係好理想，反而有份做 support FA runners (Food Angel 惜食堂，V162亦是為他們籌款) 嘅義工做得唔錯，伙食好過大會好多，於是萌生自己搞賽事嘅諗法。」
「我想香港有個 iconic 嘅 100 miles 賽事，可以去到國際水平。路線有自己特色，唔想太多重複四大徑。另外我鍾意 stage race，整個 100 miles 賽事係圍繞 stage race 概念，我哋有營地俾參加者瞓。V162是三日兩夜，由3個大地區: 大嶼、九龍、港島組成。2017與飛哥構思，2018舉辦第一屆。」說起來雲淡風輕，做起來膽戰心驚。
介紹V162的理念和賽事特色短片，Matthew說他喜歡歷史和舊事物，睇個背景就明白
「100 miles 有24個 CP，有啲係山旮旯，點樣做物流、補給、卡板等，好彩有飛哥睇住，至會順利進行。」呢腳橫傳，睇得出刻意，但漂亮，輪到飛哥帶波上。
「可能因為我做開廠，有做物流經驗。」飛哥除了玩了幾次毅行 (2015年做到超級毅行者，18小時內完成)，他由第一屆 HK100 開始，一直參加至今，從未間斷。已是 HK100 的 VVIP，由第四屆開始，他已不用抽籤便可參加。
「有一年 Matthew 參加某個香港的 100 miles 比賽，其中有 CP 竟然冇工作人員當值，因為要 mark 時間，跑手唯有自己係張紙上紀錄時間。下一年此賽事已停辦。我同 Matthew 傾不如我哋試下去做，補番呢個位，而且要有代表性，所以 Matthew 用 Victoria 呢個命名代表維港，也有諧音『圍住香港』嘅意思。」
路線要有特色，V162 加插很多小路，不過申請漁護署批准會遇到困難。「2015年漁護署收緊左，好多唔係佢哋維修管理嘅就唔會批。有些路段今年批，下一年又會唔批，不同辦事處又有不同嘅準則。例如麥徑4段萬里長城底有段大腦古道其中有一小段，以前批，到左2018又唔批。每年都在 trial and error。」文西，你亂唔亂？
「希望政府係批路線政策上靈活和寬鬆啲。如果賽事好似搞到四徑咁出名，可以吸引更多國際級跑手來港，對香港和越野跑都是好事。」這是飛哥的心願。
Matthew 補充:「我覺得漁護署已是不錯的部門，法規方面比較清晰，申請程序、回覆時間明確和高效，都好幫到手。」我應承 Matthew 一定要記名紀錄他這個意見。
----- 廣告 Ad -----
CP美食摩天輪
V162 其中一個口碑就是 CP 食物豐富、多元、有地區特色。100英里會跑經許多不同地區，例如有個 CP 在元朗河背，會令人諗起老婆餅，於是首創 CP 有老婆餅；為食的搞手們陸續豐富每個 CP 的美食，沙田有雞粥，城門有砵仔糕、大澳有茶粿、川龍有點心、東涌有碗仔翅、大潭有雞尾包、灣仔峽有魚蛋米….等，建構成一個美食摩天輪。
把地道美食融入賽道，夠邪惡，又墮落，不過我鍾意
魚蛋米、雞尾包、燒賣粉果，唔好怪我造唔到時間
原來美食團背後的統籌主要是 Jacklin，她說:「那時於賽事做 FA runners 嘅 support，我哋提供嘅食物可能好過大會，吸引到其他跑手走過嚟，以為我哋才是大會的 CP。」
「在加入 FA runners 前已認識飛哥，俾佢騙入局，話跑步可以減肥。我見佢哋幫緊惜食堂，建議不如搞個組織籌款。也可以幫弱勢社群和低收入家庭，試過幫殉職消防員籌款。」V162 一直把越野跑聯系到社區關懷，帳面蝕硬，但溫暖人心，回報率高。
而 Benny 是做 design 和搞 event，玩開路跑同踩單車 (環過台灣)，他加入團隊令活動各方面的設計都專業、靚靚和具特色，包括賽tee、完成牌、獎座和彩旗等，都令人眼前一亮。
「我唔係玩開越野跑，當初 FA runners 搞私房賽搵我幫手做 logo、banner 等，較為簡單。後來佢哋話搞 V162，我問係乜嘢嚟？佢哋話 100 miles 走3日、裡面有7個賽程、5次起步、朝早係大嶼山，半夜會到東涌，跟住係荔景同油塘，仲要有24個 CP 24小時運作。人手就係得我哋四個。我叫佢哋唔好咁衝動，諗清楚先，希望勸退。後來佢哋話係堅，出年3月就會搞，但而家已經10月。」Benny 話自己係冷靜理性型，好不幸，佢識啲 friend 唔係，誤 friend 損友，咁就一世。
Benny 的精美設計，令成件事升le
「V162 件賽tee我哋研究同揀過好多，最終搵左最輕、透氣，同印上去啲 graphic 係最 sharp 嘅質料，見好多參加者都會翻著我哋件tee。第一屆果件仲著住出街 (咪高興住，唔排除當中包含霉友如我)。成本會高，早期人數只得幾百，好貴，而家參加人數已過千，成本會平啲。」
蝕住做，唯有啃老
「好多人都話搞賽事冇可能賺到錢，咁 Matthew 你係唔係富二代？」
「我肯定唔係。我哋背後亦冇大 brand 做 sponsor，除左報名費，冇其他收入來源，所以肯定我哋賺唔到錢。如果我係富二代我唔會搞呢啲嘢，如果我係富二代，我個富一代老豆唔洗企喺田夫仔……。」老豆企喺田夫仔？
飛哥緊接解畫:「Matthew 出私伙，搵老豆做 CP 義工，但去田夫仔 CP 條路開車都好 kick 下，係河背同深井去都好遠，揸車都要成半個鐘，要上好多斜，義工更加要步兵一粒鐘入去。」
----- 廣告 Ad -----
「我去到田夫仔見到 uncle 包住晒個頭，因為好凍同大風。」Jacklin 補充情節。相信世伯身體雖在顫抖，但內心卻是溫暖。Yes，仲有生仔都係蝕住做。就算阿仔做埋啲唔等洗嘢、蝕水嘢，只要阿仔 call 到，老父仍會兩脇插刀，堅守著田夫仔，因為 V162 means a lot to Matthew，世伯係笑住蝕。
左一是 Matthew 爸爸，田夫仔 CP 義工似係樂悠咭啲 friend，Matthew 話係 uncle 拖馬包站
原來 uncle 是 Matthew 以前的毅行隊友。「係我玩毅行先，跟住踢左佢落疊，但後來佢仲泥足深陷，玩左16、7屆，我只係佢一半。」原來 uncle 才是癲一代。
堅持至見到希望
「2018年第一屆約400人報名，第二屆有600，累積兩屆口碑，愈來愈多人報名，2020年已去到700位，但跟住因疫情無奈要截。記得一月份仍可以玩 UTMT、HK100，我哋個期係二月尾，二月頭開始封關，但賽事物資已經嚟晒。我哋首當其衝要取消賽事，亦係極少數可以保留全額報名費嘅賽事。到了2023年復賽，有700人報名，參加者大部份是2020的保留名額(約500)，不用再交報名費，但我哋要買過晒物資，真係蝕到喊。」大家都發出千舟已過的笑聲。
Covid 是沉重一擊，V162 團伙滴著汗，動用跑 100 miles 的鬥志和毅力撐住。
「到了2024年，有約800人報名，今年已去到1070人，十分鼓舞。」都係果句，堅持至會見到黎明出場。
Corinna 報名L57 (2020)，可惜後來因Covid取消，大會不單保留名額，還把物資和為賽事訂造的口罩送回參加者。感動嬸嬸親自出post點讚
「一般漁護署嘅政策係新賽事單日最多容許500名參加者，見唔到佢哋會放寬，所以我哋會好快到頂，要再諗未來係點樣發展？我想知跑手點睇，因為市場話俾我知好似係短途賽多人搞多人報。」
Corinna 以跑手身份作供:「我絕對唔可以代表香港跑手，以我個人而言，都以短途為主，冇能力去到 Matthew 那些外星人距離。不過若以商業角度，短途確有較高成本效益，因為若以每K的報名費計算，短途普遍貴過長途，100K 賽事的報名費不會是 20K 的5倍，但短途的物資和人手要求都少於長途好多。而且具短途賽能力的跑手會多於長途賽，所以短途賽往往較快爆滿。」嬸嬸的觀察和精算果然厲害。
V162 想望國際賽的尾燈
「你會點比較香港越野跑賽事同國際水平？」
「國際賽事通常以 100 miles 為標準越野跑賽道，例如 UTMB、UTMF，反而 100K 不算主流，普遍分50 miles和100 miles。所以舉辦 100 miles 賽事是我哋枝標竿。不過國際大賽都會提供不同賽道選擇 (UTMB有100K/50K)，V162也有不同賽道 (例如L57、H25、H50等)，(另外會舉辦較有特色的路線，例如「飛越荷蘭徑」、「青梅竹馬」和「維多利亞城界石」)。」
一睇張海報，夾硬堆砌，又中又英，就知背後班友冇嚟正經 (小朋友，曲呀)
「香港最大問題係地方細，物流貴，好難舉辦大型越野跑盛事。睇番國內賽事嘅水平已經超越香港，佢哋嘅硬件做得好好，賽場同 CP 好靚好大，有好多義工。市政府又配合，出人力維持秩序，可能 tie in 經濟有關。國際大賽例如 UTMB，可以租成個體育館或公園做賽場，有直升機 standby 救援，可以吊個玻璃箱去山坳做 CP。」Matthew 分享其豐富的國際賽事經驗。
「不過香港係軟件方面都不弱，例如落標、義工訓練、應變能力等，我覺得香港做得唔錯。」
前望，除了把賽事更臻完美和參加者人數繼續增長外，Matthew 希望可以有更多的國際選手參與，並把 V162 的特色，例如賽道設計和 CP 美食等，copy and paste 在外國發揚光大，起初總是一小步一小步，但只要肯 chok 手提腿，就跨前一大步。
外國選手享受過CP的優質服務，也交戲俾like，仲出埋IG (有冇知日文寫乜嘢?)
回想，V162 開始時沒有人認識，搵贊助好困難。當做出成績和建立了口碑，會陸續取得贊助商的信心。不過目前都只是 product 贊助，香港難有金錢的贊助。
「我雖然唔係富二代，但我都係做金融，知道要有金錢資助才可以 sustain，唔可以一直虧蝕下去。在不用 compromise V162 理念同特色嘅情況，當然歡迎有金錢贊助。希望你篇訪問稿出街後有公司見到，可以俾錢贊助我哋。」Matthew 你會唔會諗多左?
「啲汽水凍㗎」背後溫暖人心的故事
「你哋有幾多位義工？點搵佢哋番嚟?」
「我哋約有400多位義工，好多都要靠碌張人情咭，好似田夫仔呢啲 CP，我唔叫老豆去有邊個去。」Matthew 有呢張終生免年費白金咭真幸福。
「Matthew 啲人面真係好勁。有人講搵義工你肯俾錢就得啦，但如果佢哋只係為錢而冇心，夠鐘就會走，跑手要乜至俾乜，更加唔會去好吊腳嘅 CP。我哋收到好多參加者 feedback，都讚義工熱誠和窩心。有啲自己第一日比賽完，跟住即刻就嚟當值，真係無言。」飛哥說來動容。
夜靜的燈火，照樣感覺美麗，因有你們堅守崗位，給跑手帶來力量和鼓勵
「好多義工本身跑山或者第一屆開始幫手，佢哋好認同 V162 嘅理念，而且知難搵人，會主動幫手四周圍招募，自己星期日要比賽，星期五都嚟頂一更，真心感激。」
「曾幾何時，早期的 CP 如果有汽水，跑手已非常滿足，但而家佢哋會話點解汽水唔凍嘅。今年聽到參加者話啲汽水凍㗎。」他們不知道「啲汽水凍㗎」呢句說話背後，係動用了龐大的物流和步兵團隊，由落貨點將一包一包冰和一枝一枝汽水，用腳用手運去 CP，包括那荒涼的田夫仔 (又諗起貯立寒風中的世伯)。
CP 有水有杯麵有生果，同埋啲汽水凍㗎，背後多得他們的 elite 物流團隊
「我哋今年係 CP 站牌上，會介紹番個 CP 義工團隊，印埋義工人名。個 design 落左幾個笑哈哈，希望跑手會嚟同義工 say 個 hello，俾番 credit 佢哋。」連冷靜的 Benny 也覺滾動。出年大家跑到 CP 時記住向義工們 (和田夫仔的世伯) 講聲 thank you 和打咭。
有義工名字的 CP 站牌，如果唔係太趕時間嘅話，下次記住埋去講句thank you同打咭
「有時賽事有些缺失，例如 CP 有物資唔夠，跑手投訴，我哋會好上心，好唔開心。」Matthew 和飛哥都有同感。
「如果跑手去到 CP 發現汽水已經冇晒，會勁失望，就算賽事其他方面搞得有幾好，都會扣晒分。我哋唔可以容許呢啲情況出現。我哋想跑手來到CP有被照顧嘅感覺。」
Jacklin 表示他們有時會為預計食物數量而爭論不休，預鬆少少 vs 唔好浪費，永遠冇一個令人放心的標準，OKOK，一人少句。明白這個團伙的認真態度和考慮周詳。
彩蛋 – 嬸嬸有被照顧嘅感覺
作為用家的 Corinna，第二度出庭作供:「我分享番最近參加L57嘅經驗，當日去到鳳頂已經凍到僵硬晒，手指都屈唔埋，曾經擔心會唔會凍到甩左隻手指（睇得 National Geographic 太多）。好不辛苦落到昂坪 CP，義工見到我一條冰條咁嚟到，即刻推介飲薑茶，但我一方面驚唔夠熱，另一方面又驚熱得滯飲唔到，義工話調教過，啱飲啦。果然溫度啱啱可以入口，即刻由外面暖到入心。」
「衝線後，在終點嘅香港遊樂場協會東涌營休息，坐低一陣即刻有義工主動埋嚟問我要乜嘢，好似去到間茶記，伙記問你要飯定要麵，咁我要個粥啦，個粥仲扮到即叫即煮咁。落 order 後一會兒，「伙記」即端上熱騰騰嘅海鮮粥 (堅有蟹肉)，好大滿足。冇幾耐 Matthew 仲親自行埋嚟，話更衣室有熱水沖涼，真不敢相信。」真不敢相信，香港山賽幾時變成咁…..溫暖有愛！
不用致歉，I know that feel bro。經歷萬水千山，感激你哋冇剪帶就真!
