上針山途中，總會遇上幾個生意失敗的人
越野跑經常受傷，除了肉體，更多的是來自心靈，重災區是那樽鹽，還有不忿、好勝、怕輸、唔想蝕底、最驚樣衰…..。這些脆弱心靈，不知為什麼總在山徑間碎到一地都係。
下面的創傷事件係唔係我嘅經歷? 傻的嗎! 全部都係我啲 friend 嚟㗎!
1. 賤物鬥霉友
想入對山鞋，揀左好耐，終於搵到間鋪有 Speedgoat X 賣8折，滿心歡喜即入。2日後發現 Cam X 做7折而且可以用$50 coupon，Action X 仲災難，5折，雖然係斷碼貨，但你發現竟然有你個碼，你打電話去 Action X 投訴:「又話斷碼? 點解連US9號半都有架，你知唔知咁樣好 hurt 架，離晒譜!」
唔聲唔聲做5折，知唔知好 hurt 嘅啫
2. 鎅人莫回頭
在賽道上跑呀跑，衝呀衝，聽到後面有腳步聲慢慢迫近，你開快少少想擺脫他 (冇可能是「她」掛)，但腳步聲照跟，不特止，佢仲大番你少少，再追近些，你又再加快，佢再迫近些，去到聽見呼吸聲的距離。你開始感到存貨不多，但好勝心戰勝了理智，還要踩盡油門鍊過，可惜存貨即時耗盡，眼尾見有一團黑影在你左邊擁至，步大力雄地鎅你，之後黑影回頭望望你。看見師姐咀角掛著的微笑，你今世都不能忘懷。
----- 廣告 Ad -----
鎅人莫回頭
3. 爆林是命運，2XU是緣份
跟班 friend 操山，路線由他們設計，你閱歷深，知道凡事只要死跟，唔會出事，可以解決世界上大部份問題。但你疏忽了一個人生定律 – Murphy’s law，每次當你著條新的 2XU (舊的沒有這個效果) 或全屋最貴果條 tight (cheap 的也沒有這個效果)，那次一定遇上勁爆林，可能是條路線經過，可能是行錯路，anyway，勾到條戰褲爛晒，或者俾舊石磨穿，每次總是喪屍般回家。
事後找 friend 晦氣:「爆林又唔早嚮，次次都係咁!」
「咁你又唔早問！」佢回。
要爆林又唔早嚮，次次都係咁
4. 誰人笑到最後
你最唔喜歡 Virtual 賽，但實在餓賽太久，終於有一次說服自己，俾錢報名了一個冇補給零條蕉唔見衝線帶的山賽，下星期一中午截止上載成績。趁週未去跑，好不辛苦終於完賽，上載成績後，發現排名第三，head 住第四名有成7分鐘，非常萬分超級高興，諗定點出呢個獲獎 post。怎知星期日夜晚睇番排名榜，原本第四名的竟然去跑多次，比你快了1分18秒，季軍夢碎。你好想星期一早上請假去做次復仇之戰，但星期一新方丈到任，最後你好理性地選擇了事業為重，雖然心中淌血。
----- 廣告 Ad -----
5. 說好了的杯麵呢?
疫情前你參加100K山賽，好不辛苦經歷幾許滄桑，不知多少次懷疑人生，終於捱到去最後的一個 CP，超開心，諗住食杯麵嘆可樂補給完撐埋返終點，點知發現只有清過清明節的清水供應，說好了的杯麵和可樂和寶礦力和壽司和香蕉呢? 義工說:「唔好意思已經派晒。」
「係我後面好似仲有成3個參加者噃。」
「佢地都好似剪晒帶!」
6. 女神約操山，一定有古怪
女神 pm 約你操山，你覺得好夢幻，而且女神懇求你要好好照顧她，而且女神沒有遲到，而且女神有少許化妝，而且女神雙眼特別明亮雙腿特別修長，而且女神仲介紹她的 boy friend 俾你認識，而且佢對男友說:「我呢個 friend 跑山好得，佢好熟路，我地係後面跟住佢就唔會走錯路!」
你同女神去過操山，才明白女神總是可以帶好少野的原因 圖: HK01
7. 虛則實之，實則虛之
2019報左個比賽，因社會運動取消，你選擇保留至2020，2020因疫情延期，2021年變虛擬，你最憎 virtual，其實有邊個 like，在決定 refund 一半報名費或保留名額之間，你選擇保留下來，畢竟這是你喜愛的山賽。到2022終於可以搞實體，但鬼掩眼，你竟然忘記了自己報左名，再俾錢去報名，事後收到大會叫你可以用去年名額報名的電郵才知低能左。可能由2019到2022年，經歷了太多事情，原來的山賽已變了樣，變到你已經不再認得了，這才是最大的創傷!
(上述劇情純屬虛構，不知塵世間是否實體出現過未?)
創傷彩蛋
激發我寫這篇文章，就是呢次的經歷。跑班的外星男一有次在平日玩 virtual 山賽，竟然搵我做 running support 一段，做下遞水呢個複雜動作，已感到無限光榮 (知嘅，其實只因為得我平日得閒，就讓我自high一下得唔得先?) 在柏架山道某個位等著，手中穩穩拿著一枝寶礦力，開定蓋，男一來到，我迅即遞給他，他一路跑一路飲:「阿孫，跟住我。」「哦。」
緊緊跟男一跑左約400米斜坡，我扮無野，盡量把喘氣聲壓低。跟住要上畢拿山石級，男一竟然全 jog，jog 石級? 你有冇理過我係後面的感受。上到一半，佢想反手遞番枝寶礦力樽俾我，奈何我力已盡，點踩油門都加唔到速，男一見成2秒都冇人接，於是將個樽放係地下等我執番，跟住揚塵而去，呢個創傷我要10分鐘至走得番出嚟!
越野跑要操的，除了心肺體能，更重要的是選用強化玻璃心，樽鹽要揀大粒襟磨的粗鹽，和操熟退一步的海闊天空!
----- 廣告 Ad -----
