敏怡帶我哋去柏架山的隱世山洞做訪問，裡面有蝙蝠、有涼風、有迷失、有回望、有交心
對於我這等弱勢社群，越野跑是克服疲累、傷痛、迷路、抽筋、懷疑、氣餒、茫然……種種生理困難和心理磨折的過程。但敏怡總散發著輕盈、笑靨、不經意、好似好 enjoy，為什麼她是快樂的越野跑手? 而我哋卻是面容扭曲、瀕臨死亡邊緣的參賽者，點解大家都係交咁多報名費，會有咁唔同嘅遭遇? 公平咩!
「Hi，阿孫!」(尾音少少高)，每次見到敏怡，她總踏著陽光，燦爛笑容閃亮著雪白的牙齒，馬尾左右搖晃，空氣傳來那份歡愉和躍動，就像飛機艙的杯麵效應，其他人也很易感染到。其實有乜咁開心? 塵世間總有啲嘢擔心下掛? 面子開心，裡子歡顏嗎?
張敏怡，香港女一越野跑手 (四徑完成者女子最快、UTMF第五名、TNF100 冠軍、HK100冠軍、山路錦標賽冠軍.…，女一沒有爭論性)，骨科醫生，高，揸電單車、打泰拳、紋身，成日笑…，有少少違和感。她的故事，由:「敏怡，我想知你運動的前世今生。」開始。
趁烈火青春來轉天若有情，想坐敏怡車尾的請舉手
我、敏怡和攝影師Kazaf由衛徑康山段行上柏架山，那裡是敏怡的後花園。起初懷著一星家樂徑心情，約下午做兩小時的訪問，但敏怡提我帶頭燈，好耐人尋味。原來她帶我們去個大型的隱世山洞 (大到可以開3間star乜)，跟住爆林上山頂的發射站波波，好玩又刺激。今次文章與影片(上集)同時上架 (下集稍後推出) – 豐山跑youtube channel 有得睇，同場追加敏怡親身示範泰拳的拳打腳踢，絕不是AI生成，係天生成。
----- 廣告 Ad -----
今次我記得收肚，仲揀左舊可以高過敏怡嘅石頭，希望以後愈影愈fit
(題外話，呢對 Speedgoat 5 是某旺角店長對我說彩藍色新返，超靚，貴一百蚊都抵，我$850入，不久後 Hoka 如何慘烈劈價，已是歷史，到今日我仲未走出呢個陰影)
敏怡示範了幾下泰拳，齋觀賞都好療癒，點解荒野山頭有個沙包，是耐人尋味之二
柏架山有條快樂小徑，不過記住帶頭燈
少年敏怡 – 協恩、高妹、學霸、劍擊港隊、打泰拳
「中學我係協恩讀，協恩嘅運動同籃球係好 top，中一時體育老師見我咁高就捉我去打籃球，但原來高唔一定打籃球叻 (正如男人唔一定識換車呔、女人唔一定有帶紙巾)，又唔夠人撞，加上覺得俾人蝦，勁想quit，但唔敢同老師講，好驚個老師會鬧我….. 」少年敏怡的心靈好脆弱。
----- 廣告 Ad -----
發著豆芽夢嗎? (點解同今日個敏怡一模一樣?)
「中二暑假我開始玩劍擊，係重劍。」同我地嘅女一劍后江旻憓一樣
「係，Vivian 細我幾年嘅劍擊師妹。」
「你打出一遍天?」
「我手長腳長，只要我肯伸長隻手好易拮到人。而且大家都係初學，係劍隊好刷到存在感，於是決定棄籃從劍。最終鼓起勇氣，聯同一班都唔想打籃球嘅同學，向 Miss 提出退隊。原來Miss冇嘢，冇鬧到我地，白驚左一場。」
一看就知邊個係敏怡，只要伸直隻手就唔會輸。HKG三個字母含金量重 (信報)
「協恩好重視體育，如果計 overall 分數協恩係學界最勁。」
「唔係 DGS (拔萃女書院) 咩?」我最喜歡挑起爭端。
敏怡即刻好大反應:「唔係，DGS 係田徑、游水、音樂係好勁，因為佢地招收到最 top 個班學生。但協恩係球類同其他較冷門體育都勁過佢地，所以計整體分數，我地會贏，協恩連續好多年都攞到紫荊盃學界體育比賽冠軍 (睇番維記百科，確係由1984年開始，協恩攞晒第一，DGS第二)。」就像巴塞同皇馬，生命因有對手而變得精彩。
兩間名校的恩怨情仇，令世界變得精彩和促進花生業 圖: 協恩facebook
「我地劍擊隊雖然只係小眾運動，攞唔到好多分，但學校肯投放資源請教練。劍擊隊同 DGS 對賽大家互有勝負。」
「果時我好有一份要為學校出戰的使命感。中三、四時我差不多是學校的首席劍手，臨畢業前兩年，我奮力練習，最終打敗了 DGS，真係超開心。」有使命的人生好完美!
「我特別感激那時帶劍擊隊的老師，他是影響我一生嘅人。他教 Chem，超好，仲好關心同學。佢犧牲了好多自己的時間去幫我地補習。其實我係為左佢去打劍同努力讀書。」遇上良師是很多少年的人生轉彎位。
小粉上身，敏怡專登pm我，說Simon Tang就是她的恩師 (知啦，化學科全班100% credit媽)
「協恩的公開試成績唔係最 top，我果陣仲係考A Level (我都係呀)，我地 science 班 physics, bio 好少人攞A，但係chem就有5、6個人攞A (36人)，我考A Level 都係靠chem呢個A至入到醫科。」
----- 廣告 Ad -----
「我後來被選拔左入體院受訓，曾經代表過香港劍擊隊出戰一些亞洲區賽事，我入港大是申請 sports scholarship，係港隊會有少少優勢。」
「你咁打得，點解你唔係繼續留係劍擊世界，爭做天下第一劍?」
「其實我唔係真係咁勁，我係 U17 個 cat 打到成績，係因為其他高手都升晒上 U20 個 cat，淨番我未升至有機會排前列位置。其實好多高手都會漸漸退下來。」
「Vivian (江旻憓)能夠闖出一遍天，唔係只靠體院，佢有私人教練，係美國讀書又有得練，媽咪非常support，好俾心機裁培佢。Vivian 嘅驕人成績係要天份再加上好多配合。我兩樣都冇乜，所以 make 左個 conclusion，係運動方面我唔會有乜嘢發展，當興趣就算。」敏怡冇 sad，好知道條界線在那裡。
「讀大學果時為左減肥，我跟師兄跑下 cross country，踩單車，又玩泰拳。」又劍擊又泰拳，同敏怡出街都好安全。
「你果時好肥咩?」
「我唔怕公開磅數，我讀中學時期是136磅，睇番啲相我塊面同手臂好圓，好有肉地。」好難想像月巴的敏怡個樣，要問 chatGPT。
震撼! 信唔信有136磅? (從圖中猜到年份嗎?)
少女與小鹿，100巴仙清純。照片攝於2016年大阪，幾多歲? 自己谷歌下
「我打泰拳時就減左10磅左右。但要 keep 住做運動至維持到，一停左做就會反彈，好乞人憎!」又笑一大餐。
「貪慕虛榮」的敏怡 (呢個係標題黨，小朋友唔好學)
「我的第一場山賽係大嶼山的 KOTH (山野之王)，果時以為參賽者都會跑上斜跑同樓梯，原來佢地都係行。我有跟朋友行開山，發現同山賽差不多，只不過係平路時會跑下，估唔到咁嘅心態都可以攞到獎。」 囂啦。
「我第二個賽事是 To-the-Top (2017)，發現CP有運動飲料斟，去到終點又有嘢食。突然聽到有人叫我個名，原來我得獎，真係好意外，因為一路我都以為好多人係我前面。獎品仲有錶同鞋，好鬼開心!」
「從此你就貪慕虛榮?」
「冇錯，從此我就貪慕虛榮。」又笑一大餐。
----- 廣告 Ad -----
「當我發現跑山呢個世界，真係不得了。」
「點樣不得了?」
「係山上跑有一種好自由自在嘅感覺，特別是有少少速度時更感覺到。又學你話齋，有時都會有少少貪慕虛榮，攞到獎係開心嘅，」
「有時返工有壓力，遇到挫敗，諸事不順的時候，跑山可以減到壓，有番成功感。我都幾享受一個人跑山，我會闖下啲小路，爆下林。」
「你又跑山、踩單車、泰拳、劍擊、揸電單車…，最重要是你果種漫不經心，真係成個7號仔。」(九型人格 Enneagram 的第7型，敏怡上過我的九型人格課程 (每篇文留一個廣告位OK啦)，7仔是 The Busy, Fun-Loving Type: spontaneous, versatile, distractible, and scattered. Want to maintain their freedom and happiness, to avoid missing out on worthwhile experiences, to keep themselves excited and occupied，好中敏怡。
又劍又山又水，7號型的人最喜歡嘗試新的體驗
「不過當入左越野跑世界，覺得可以再跑快啲，有目標真係要出力練，唔會只係為左 enjoy。」
「真，當你要比賽，你要重視時間、名次成績，而且你係女一，有時更加要顧及別人的期望。跑山的初心開始滲入了其他元素?」
「係呀，有時會有啲在乎名次成績，會有無形壓力，覺得如果做得唔好，會有人議論，你明唔明呀?」梗係唔明，因為我冇機會在乎。
「就好似最近嘅山路錦標賽，其實內心都好想贏，但我表面好似好唔在乎。」咁敏怡啲戲交得好好。
在山路錦標賽拿下冠軍，敏怡與阿歹都呼籲田總讓更多香港跑手代表香港出戰世錦賽。敏怡呢個濕髮look好得 圖: HKAAA facebook
「你都好重視別人點睇你?」
「都會重視，唔想令人地失望，別人期望對我係一種動力。所以之前我覺得自己係9號仔」(No. 9, they are accepting, trusting, and stable, usually creative, optimistic, and supportive, but can also be too willing to go along with others to keep the peace)
「我冇乜自己嘅推動力，如果冇人係身邊鼓勵我，我就會塌皮。係要人迫害我，正面又好，反面又好，用乜嘢方法迫我都有效，你睇死我又得，話我廢又得，我就會爆發我嘅小宇宙。」敏怡呢個型格 case 有啲複雜，我要解剖研究下。
學霸會考失敗只攞5A導致讀醫 (知你唔明個標題，睇內文啦)
「你揀左做骨科醫生，覺得啱唔啱自己?」
「都OK，不過出嚟做嘢最主要靠經驗同技巧，骨科醫生好需要做準確嘅 judgement，要少少體能，因為有時要用電鑽同槌。我地唔同家庭科或者精神科醫生，佢地要俾多啲關心病人，我地較著重手藝。」
「點解揀讀醫?」像大學 admission 的 interview。
「我入醫科係有原因，我會考時只得29分，中英文同 A maths 攞唔到A，所以只得5科A……」只得5科A? 人嚟，推佢出去餵老虎!
「我爭1分拔唔到尖，要讀多一年考埋 A Level個試，覺得好唔抵，我同自己講，如果我要去考 A Level，我一定要入到最勁果科。我就係為左唔忿氣去讀醫，絕對唔係自細想濟世為懷果啲。」入 U interview 果時一定唔會咁講。
「其實仲有一個原因…」敏怡細細聲講:「因為我覺得做手術好型。」
「嗱，我都會你貪慕虛榮㗎啦。」
讀醫時的長髮敏怡，多麼少女，多麼青澀
「我讀醫好辛苦，因為我背書好渣，過目必忘，但讀醫有好多嘢要記，我永遠都記唔到。我以前啲 science 科考得好，係靠做得多，不停 practice，讀醫果幾年係靠考試之前狂塞入個腦度，跟住考試時嘔番出嚟，跟住就唔記得晒。」有邊個唔係嘅請舉手。
快樂背後
「敏怡，我見你成日都咁開心，笑聲震地球，你自細都係樂天開朗啲friend?」
「我讀書時都試過冇朋友，俾人排斥俾人取笑嘅黑暗日子，唔知係唔係我有啲奇形怪狀，果時真係好唔開心。但我冇自閉，我會積極去討好下人哋 (又大笑)，努力表現自己善良、樂於助人嘅一面，逐漸多番啲朋友，我知道要 social 至會被人喜愛。」敏怡係面對和解決問題嘅人。
「你湯底係樂觀?」
「唔係喎，好多時我都會向自己放負，考試好擔心唔及格，經常想像有最差嘅結局。好似剛過去嘅山路錦標賽，賽前我會覺得人地會勁過我，我諗我唔會得第一，最多第二，有第三都幾好。」
「我知自己係灰底，所以我都會盡力做，到最後成功左會好開心。如果事事都好樂觀，turn out 唔好，自己會好失望，呢個唔知係乜嘢心理?」
「可能係一種心理防衛機制，怕面對失敗。有部份自信心低嘅人會有呢種心理。」我扮專家證人。
「係呀係呀，我係冇乜自信心，我覺得又唔夠人靚，又唔夠人叻，我成日好羨慕別人叻嘅嘢，但會忽略左自己自都有優勝嘅一面，我嘅心理唔係好強大。」
「點會，見你比賽經常早段墮後，後段給力追上嚟，鎅到人遍體鱗傷，體力同心理都強大。」點都要安慰番敏怡少少。
其實無論點睇，敏怡是人生勝利組的表證一定成立，學業、事業、人際、成就…..等方面，人生符碌組唔會望到尾燈，但為什麼仍會有自信心缺貨問題? 人生勝利組組員訂的目標都是互相 benchmark，水平和難度是外星球的高度，並追加周遭人的期望，落場比賽定必博盡，也定必慘烈，壓力大增，令勝利組組員更難接受失敗，患得患失的心情，打沉了自信心。勝利組實力接近，心理質素往往是決勝分。
跑得快的終極意義
「阿孫，你覺得跑山快有乜嘢意義?」明明係我訪問梗佢，敏怡突然失驚無神咁問。嗯，呢個可以係個好膚淺嘅問題，又可以係好哲學性嘅問題，如果搞錯左，一係佢尷尬，一係我尷尬，點答好呢?
敏怡見我個「思考中」樣，知我 process 唔到，佢想不要浪費時間，不如自己答番好過:「我覺得跑山快唔係幫到人，又唔係對地球有乜嘢貢獻，又唔會世界和平左。但越野跑對個人係一個好好嘅磨練同成長，包括生理同心理。如果想更多人能夠受惠同參與，要有越野跑手做到好嘅成績，好似聰sir咁，係國際舞台有一席位，連續兩屆係UTMB上台攞獎，破左好多紀錄，至會令更多人留意。而聰sir可以用佢嘅影響力同地位，吸引更多年青人去嘗試越野跑。所以要普及呢個運動，係要有一批跑手做到一定水平。」
敏怡把越野跑加上了一重使命，把努力付出更具意義
我地係柏架山一路爆林一路傾，突然我見到一個有遠大心志和抱負的敏怡，敏怡原本已經夠高，家陣變得更高。
「係我玩越野跑嘅過程之中，好多人都幫過我，訓練我、陪我試路、鼓勵我、邀請我玩比賽、贊助我，如果我做到少少成就，唔係我個人嘅能力有幾厲害，要好感激身邊嘅人，佢地對我有期望，我好想努力做好成績，係一種回饋。」敏怡好似上台講得獎感受咁。
明白，跑山快還有一層知恩感恩嘅意義。這不是膚淺或哲學的問題，係一條有高度有溫度的問題。
今年6月奧地利將舉行世界山徑越野跑錦標賽，好感激，香港隊有個快樂的敏怡!
彩蛋
我地3人行到一個打咭位影相，敏怡好興奮地show佢肩膊上的兩個紋身，一個紋有「Faith」，另一個是「Hope」。
如果仍覺得身上有公仔是變壞了，是真正出賣年齡系列 (又題外話，敏怡的頭髮染了新的顏色，她問我好唔好睇，我梗係話好，幾驚佢問我同上次見佢有乜嘢唔同左)
「我以前打泰拳時，見個個佬都紋身，所以我都去紋。」但佢地唔係紋埋呢啲咁文青 feel 嘅公仔。
「你紋身洗唔洗攞批文?」
「冇攞呀，所以媽咪勁嬲，但係改變唔到囉，佢成日話身體髮膚受之父母，不敢毀傷，但我成日搞到勁多傷痕番去。」
「你返屋企要著條長褲遮掩下。」
「唔洗，媽咪已經放棄左我啦。」
「其實 Faith 同 Hope 好支持到我完成學業，因為讀醫真係好辛苦，每次考試我都驚 pass 唔到，但我有一個好強信念，我讀醫呢條路係神嘅恩典。」
「幾時紋埋個Love上去?」拿，呢條問題唔係我問，係 Kazaf 問。
「吓，如果搵到真愛我就會紋。」跟住成個山都係笑聲。
呢個話題我地有少少發展，不過呢度篇幅太長，留待大家去睇片 (免責聲明，唔保證滿足到你地嘅求知欲)
Kazaf 事後解釋，說信望愛是基督徒三個信德，而其中最大的是愛，所以問下，至於被訪者入了另一條線，並不是提問者原意。
Faith, Hope, Love, 她都不缺 ，Cheer!
