To Love and to Conquer!
30年前如果你問我 我係一個乜嘢人，我會回答：我係一個廣告人! (同時係一個X人!)
20年前如果你再問我 我係一個乜嘢人，我一樣會回答：我都係一個廣告人! (同時依然係一個X人!)
10年前如果你又再問我 我係一個乜嘢人，我照樣會回答：我依然係一個廣告人! (同時都仲係一個X人!)
今日，如果你問我 我係一個乜嘢人，我會回答：我係一個廣告人，同時 係一個業餘運動員! (但無改變嘅依然亦係一個X人!）
我唔會 ，亦無可能認屎認屁話希望成為一個職業運動員，我自問無呢份能耐無呢份實力，廣告人依然係我賴以維生搵兩餐晏仔嘅技倆 (雖然搵食越嚟越艱難!)，但自從投入馬拉松投入三鐵運動之後，雖然訓練辛苦疲憊但依然樂此不疲 ，至於攞奬?? 算吧啦!! 我嘅目標只係每一次比賽成績都好過上一次，由第一次全馬嘅5小時45分到最近嘅 澳門馬拉松3小時33分，由戰戰兢兢參加時時食嘅三鐵 Sprint 組到半年前膽搏膽拼老命嘅 Carins Full IRONMAN 賽事，每一分一秒嘅進步，一點一滴嘅技巧增長，一絲一毫累積嘅運動知識，都帶來罄竹難書嘅喜悅，我真心相信我愛運動，我有運動癖!
----- 廣告 Ad -----
明朝才子張岱寫過一首詩話：「人無癖不可與交，以其無深情也；人無疵不可與交，以其無真氣也。」意思係話無癖好無嗜好嘅人，做事唔慌會投入，呢種人無真摯情感，對朋友亦唔會有深情；兼夾無情無趣。而一個看起來毫無瑕疵嘅人，更不能交朋友，因為太假收藏真面目!
投入運動比賽嘅意外收穫係識多咗人，大部份都細我一截甚至一大截，多咗人同我討論運動交換心德，更多嘅係知道我玩三鐵玩 IRONMAN 之後投以難以置信嘅目光問 : “嘩! 你玩啲咁嘢? 你貴庚呀?”。通常我會用堅定而帶一點溫柔嘅眼神回答 : “係， 我係阿叔，我玩三鐵，但唔好咁傻啦，只要有心，人人都可以玩到，你都得!” 隨着對方回應以 “你咪撚點我喎!” 嘅眼神，話匣子因而好容易打開!
有人會以為我怕老唔認老，所以要努力運動同後生仔比較，其實恰恰相反，喺歲月面前人人平等，無人可以長春不老，時間會在臉容留下痕跡，亦總會在軀體留下歷煉，新陳代謝減慢，體力耐力反應力不復當年，肌肉鬆弛慢慢變成大肚子…….. But ; 呢一切其實可以透過有系統嘅運動及飲食而大幅度改善! 所有嘅 “ 原因 “ 都只係藉口，當然，人人有 Free Will，個個都可以選擇自己生活形式，但三十歲之後每個人都必須為自己健康及外形負責，高脂肪高膽固醇大肚腩隨咗有礙觀瞻之外仲好容易百病叢生，自己慘未算慘最慘係連累家人照顧你! 當然運動唔可以百份百避免病痛 但起碼機會大大降低，而你可以話我膚淺，但起碼唔會一身肥肉丟人現眼!
----- 廣告 Ad -----
再進一步睇，我相信近朱者赤嘅道理，一班喜愛運動嘅人，壞極有個譜，一班對需要咁辛苦操練嘅運動而依然甘之如飴嘅人，應該係一班對生命好有熱誠好積極嘅人，你幾時見過唉聲嘆氣消極頹廢嘅人會鐘意運動? 我未見過，一個都未見過! 經常同一大班咁正面嘅人喺一齊，人都醒神啲啦!
IRONMAN 絕對係一項需要熱誠同投入嘅比賽，連續十幾時 On the road 嘅比賽普通人我估叫你諗下都攞命，但其實我親眼見過好多人通過訓練都一一克服 (包括叔叔我本人!) MidageOn9 同 MIU 訓練嘅院友幾乎全部都可以順利完成無一倖免! 事實證明幾難嘅事情最難就係行出第一步，辛苦第一次 抽第一次筋，喺跑道上嘔第一次 炒第一次車，after that, all no big deal!
今個星期六3月3號，MidageOn9 另一班院友遠征 新西蘭 Tupo 參戰第一次 70.3 ，第一次 226 Full IM 賽事，幾個月流下嘅汗水努力好快會印證第一次突破從來無想像得到嘅自我範疇，衝過紅黑色拱門嗰一剎那，你會明白一切都係值得嘅!
See you in Tupo!
更多：
Fitz Facebook專頁
[新西蘭Taupo Full Ironman] 明明已經過226 點解仲要452?
[Ironman Cairns 226] 一切從狗噏開始……!
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
Fitz Triathlon 三項鐵人
