根據中國三項鐵人拹會官方統計，你知道全中國，包括專業及業餘運動員，有幾多人完成過全鐵 Full IROMAN 226 賽事?
一場游泳3.8公里，單車180公里再加上一個全馬42.195公里，合共226公里嘅 Full IM 賽事，原來全中國只有415人曾經完成過! 要知道中國最多的是什麼? 是人! 足足有13.9億的人口，而13.9億人裡面居然只有415人完成過 Full IM 的確大大出乎我意料之外!
香港呢? 我努力上網搜尋過但都找不到任何數字，反之，我所屬的運動團體 MidageOn9 之內已經有廿多個 IM (P.S. 嚴格嚟講只有完成過226嘅先可以話係 IM，70.3，OD，Sprint 嘅未算! 等如跑過10公里 半馬嘅其實唔算跑過馬拉松，回魂夜話齋 七孔流血還七孔流血死還死，咪撈亂!)，但可能物以類聚人以群分原因，我朋友裡面嘅 IM 又有十幾廿個，所以根據本人非正式及毫無系統逆邏輯式估計，香港嘅 IM 數目應該有兩三百起碼，人數比例上大大高過全中國，但對比起其他運動項目依然係少數中嘅少數民族，正宗低端人口，低人數，低獲獎，低回報!
少人參與有好多原因，但主要係 “辛 能 貴”，練習辛苦，長時間操練體能，同所需費用相對幾貴!三個項目分開嚟玩對非專業運動員嚟講都唔係講笑，跑一個全馬可能已經係最易想像，游3.8公里你知道係幾遠? 答案係76個標準泳池，正式轉溏都轉到頭暈! 180公里單車係幾長? 即係等如由屯門碼頭出發沿住屯門公路踩，唔行汀九橋行舊三號幹線西九龍走廊入紅隧直去灣仔新鴻基中心，然後原路返轉頭去番屯門碼頭，但未完喎，原路再踩一次再去新鴻基中心再番轉頭，就大約係180公里嘞! 最後先係跑全馬!
----- 廣告 Ad -----
而以上三項要喺 17 小時之內連續不斷咁先游後踩再跑分別完成! 要完成呢個路程您要用大量時間去練習，幾乎每星期有四五日分別練跑游踩，每次兩三四個鐘到七八個鐘不等，包括在烈陽下跑步，寒風中踩車，冰冷中落海游水，有時練一樣，有時連續練兩樣! 為著保持體能體重，要長期注意飲食唔可以太肥增磅唔可以食得太清無力量，喺比賽前兩個月更甚之，總之要有營養又健康而呢尐嘢通常唔好食！比賽費用裝備旅費等等亦的確唔係少數目，幾種因素加埋可能係 IM 令人望而卻步嘅原因!
咁，仲玩? 我不得不承認，係! 我犯賤!
去年六月我在膽粗粗糊裡糊塗神推鬼擁之下完成咗人生第一個 IM，過程罄竹難書辛苦到七個一皮但極堪回味，單車賽程最後一段我一直擔心唔可以係限時之內返到終點被人 DQ，終於到咗轉項區甩開 Lock 鞋腳踏實地，工作人員幫我接住架單車嗰一剎那 (無錯! Full IM 比賽係有人幫你安置單車，除膠衣，著單車衫，畀水你飲，我懷疑其實可以叫佢喺轉項時幫你揼埋骨!)，我個心先定番落嚟，最後個全馬在累極但無驚無險之下順利完成，跑過紅黑色拱門一剎那，期待嘅那一句 “Welcome back Ben Lui from Hong Kong, you are an Ironman! “ 終於响起，肉體嘅疲憊相比起精神上嘅滿足，突然煙消雲散 不值一晒!
----- 廣告 Ad -----
好多人話過，包括夏威夷世界上第一塲 IRONMAN 嘅始作俑者 John Collins 都係咁講 “完成一次 Ironman 足以侃侃而談講足一世”，的確，從準備到訓練到比賽到賽後嘅整個過程值得回味再回味，但 正所謂「賭錢要做莊，做人要 Move on」，越回味越令我心癢癢想再去多一次，以更佳時間完成，聽多一次 “ You are an Ironman!“ ，但諗起艱苦嘅練習又令我裹足不前 …….!
But …….. 姣婆唔守得寡，姣佬，都係!
MidageOn9 裡面幾位完成咗70.3嘅院友躍躍欲試挑戰 226，又有一班新血院友膽粗粗希望加入鐵人行列， 加上幾位強手推波助瀾，大伙兒決定報名新西蘭 Northern Domain, Taupo 嘅 Full Ironman 賽事!
After that, it’s all about training!
Ironman 嘅 training 係相當辛苦相當花時間嘅，所以最好嘅辦法 (亦係唯一嘅辦法!)，就係享受每一次訓練，如果可以，儘量跟同伴院友一齊訓練，互相鼓勵，喺倦極無力嘅時候身傍隊友嘅一句 “努力捱埋佢，就到，唔好放棄!” 的確有效過紅牛寶礦力溝雞精! 更進一步，我哋追求嘅係將訓練「加入」生活之中，而不需為訓練而「減去」什麼，雖然有時需要為訓練而早睡早起，但唔需要為訓練而完全戒酒戒蒲 ( 我始終冇戒酒，因為我相信人係需要有少少壞習慣，風雲裏便泥菩薩講過 : 人若去盡，緣份勢必早盡! 我睇風雲大，冇理由唔信馬榮成㗎?) 只要安排適當唔需要為訓練而完全犧牲與朋友家人共處時間，需要嘅係將訓練放進與同伴嘅生活之中，再慢慢變成習慣!
回顧上次經歷，三項之中我最弱嘅係單車 (…….並唔係話我游同跑好強，只係相對而言單車最弱!) 而偏偏單車所佔嘅路程同時間最長，權衡輕重、痛定思痛下，我懇求咗有名嘅單車教練阿Sir大人收我爲徒，由基本技術從新學起，同 Wattbike 做咗好朋友喺佢身上留低不少汗水，再喺公路上上坡落坡轉檔轉項到調較單車作賽，希望快得一分鐘得一分鐘，經過阿 Sir 嘅悉心教導，我感覺我我嘅單車技術進步不少! 雖然，我依然相當肯定我可能係阿Sir學生裡面最流嘅頭三位!
----- 廣告 Ad -----
同上次一樣，距離比賽時間越來越短近在眉睫 ，心情由淆底漸漸轉變成期盼，期盼同千幾人一齊跳落海裡出發，期盼喺異地公路上踏著兩輪飛馳，期盼用雙腿感受賽道嘅溫度與速度，期盼喺過程中享受到腦內安多酚嘅分泌，呢一種係極度特殊嘅感受，當感覺浮現時，你會立刻知道那就是傳說中嘅 “腦內啡”! 你會覺得身體漸漸發麻每個毛孔都慢慢擴張，好似有一道舒爽嘅微風從脊椎通過四肢百脈騷過全身；雙腿嘅疼痛完全消失，跑步時雙腳彷彿踏在彈簧墊上，耳內聽到簡短而令人舒服蜂鳴般高頻聲音縈繞不去，雙眼望向前，焦距有時模糊有時候清晰，但感覺終點就在不遠處不自覺的向前衝，然後帶住呢份興奮跨過紅黑色拱門!
三月初 新西蘭 Northern Domain, Taupo，我要喺我 Full IRONMAN 紀錄226之上再加多一次226，未必係最後一次，但肯定係最快一次!
Nike 嘅 co-founder Mr. Bill Bowerman 曾經講過 ” If you have a body, you are an Athlete.” 世界上最公平嘅玩意就係運動，一分耕耘、一分收穫，絕無捷徑，只要你有心只要你肯練只要你肯流汗，無需虎背熊腰無需優良血統無需運動天才尖子， 人人都可以係 IRONMAN!
MidageOn9 嘅 member Mr.Unkle Ben 啱啱講過 “ If you have a body, you can be an IRONMAN!“
共勉之!
Fitz.hk Facebook專頁
[Ironman Cairns 226] 一切從狗噏開始……!
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
Fitz Triathlon 三項鐵人
