比賽日一星期前
週六 07:45 最後一節單車長課加路跑，翔東踩 60 公里之後 + 8 公里路跑！大家戰意高昂但其實心有餘悸，拼儘力氣完成之後人人接近虛脫邊緣，雙腿停下來時看得出四頭肌還在顫抖，氣在喘汗在流，個心仲 keep 住淆底，死啦 ………. 60 加 8 已經咁 Q 倦，到時點死呢？嗰剎那突然有個念頭稍聳即逝，妖，如果而家唔覺意受傷，咪有藉口唔 Q 使去囉 ……. ？但 Positive Me 馬上出現， 妖，練咗咁耐，幾大就幾大燒賣就燒賣，落到塲無話唔掂嘅！真係唔掂 ……… 再算啦！
週六 15 :00 邪教教主 Kim sir 為咗怕我哋一班蝦兵蟹將雜牌軍到時去到現場手唔成勢影衰香港人，特登一次過集合晒所有人從到達香港機場如何 check in 行李單車詳細講解到如何轉項如何補充體力補充水份鉅細無遺，更邀請香港第一代三鐵宗師 Philip 大人蒞臨分享臨場經驗心理準備等等！
散塲時候本人直情感動到想簽番啲香油俾個教派，但揾唔到香油箱唯有作罷！
比賽日前五天
開始 Pack 行李 Pack 單車，計算好要食幾多包Power Gel 同 Power Candy, 畢竟全個賽程起碼 7 小時，補充體力非常重要！同埋開始 Carb Loading，可以放心食平時黃昏之後唔會食嘅碳水化合物，澱粉質之類！
心情由極度淆底變為非常期待！
比賽日前三天
為咗唔想太急趕倒瀉籮蟹，我哋有一半人選擇早兩日飛台中高雄，再由高雄坐三個半鐘巴士去台東，沿途好多山路好多彎好 很 辛 苦 ！九點飛機下午差不多五點先到酒店直情飛歐洲咁滯，到埗已經呆呆滯滯兼想反胃，但仲要爭取時間抖擻精神砌番架單車準備明早試路，砌完嗱嗱聲食個飯吹陣水一齊番房訓！
----- 廣告 Ad -----
香港未出發嘅 Team B whatsapp 告知可能有一半人嘅單車跟唔到上機，大家急如熱鍋上螞蟻但無計可施，唯有喃嘸阿彌陀佛真神阿拉耶穌基督六合神教乜都幫手祈禱！
Sorry，係分別番房訓至真！
心情由非常期待漸變十分興奮！
比賽日前一天
- 08 : 00 早餐，餐廳內大家難掩臉上神色，一致表達 快X 啲食，食完起程探路！
- 09 : 00 香港出發嘅 Team B whatsapp 傳訊所有單車安全上機，放下心頭大石，大家番房排個毒整裝待發！
- 09 : 30 到達比賽現場活水湖，天朗氣清萬里無雲，塲地好靚！相比香港大尾篤塲地真係打邊爐同打冷震嘅分別！見到咁嘅環境本來尚有忐忑嘅心情終於踏實，有幾名隊員急不及待跳落湖試水，結果被現場工作人員勸阻，衰衰咁上番水！
- 10 : 15 全體隊員及特約攝影師 ……… 即是某隊員男朋友沿著明日單車賽道試車，路途風景優美斜路唔多，試咗幾公里之後打道回府，午飯休息！調較單車打氣換軚整色整水不一而足！
- 15 : 00 Team B 到達，三十幾人興奮之情嘈到拆天，我懷疑接待處幾位職員從此怕鬼咗香港人！
- 16 : 15 全體成員再踩過去比賽現場，今朝冷冷清清嘅活水湖而家已經人山人海，湖內湖邊滿是龍精虎猛得得戚戚嘅參賽者，氣氛勁過行年宵花市！
- 19 : 00 幾十人操去夜市 ………. 係好流嘅夜市晚飯，之後大家決定早啲番歸休息，因為明早未天光要起身！
心情由非常興奮變成好那興奮！
----- 廣告 Ad -----
( 又未完，下集續完！)
更多：
Fitz.hk Facebook專頁
[Road to Ironman] 甩皮甩骨但自強不息的邪教教眾!
[Road to Ironman] 我加入了一個邪教叫 MidAgeOnG
雷彬冶文＠Fitz.hk
美國里奧絕色武器: 註冊會計師
本文屬作者意見，不代表Fitz立場。
