[一個傳奇的誕生] 丹尼爾 vs 陳恩能 愛做有意義的事

電視編劇界有幾位傳奇人物，一個係王晶，一個係杜琪峰，都係由電視台一個小編劇，做到當時得令嘅大導演。筆者十幾年前加入了電台做PA (節目助理)，亦聽到了一個傳奇，他就是陳恩能，丹尼爾。

丹尼爾有幾傳奇，剩係佢工作過嘅機構都一疋布咁長：商台、港台、無線、Fox、Espn、Euorsport、Now以及TVB收費台，仲未計佢報紙雜誌寫嘅專欄。

而對筆者嚟講，丹尼爾最傳奇嘅地方，就係佢評述每一項體育運動，都有辦法成為箇中專家。對於我哋PA出身，做慣資料搜集嘅小薯仔，深切明白到，要對住公眾去講述一門知識，難度極高。而丹尼爾竟然可以成為公認嘅專家。

因為評述F1賽事，有機會到訪世界各地嘅賽車場。

喺奧運前夕，佢臨出發去巴西之前，筆者卒之成功同丹尼爾做咗一次訪問。第一個問題，就係「專家是怎樣煉成的」。

「無架喎，真係要不斷睇資料囉！」佢答：「我本身對機械工程毫無興趣。當時 (ESPN年代) 我嘅F1拍檔沈國成突然唔做。我唔可以再倚賴佢嘅專業知識，咁唯有自己不斷學，不斷睇。」

而筆者當時亦係體育節目迷，見丹尼爾喺星期日朝早講完MotoGP，下晝再講F1，然後夜晚仲要講英超，過時過節仲講埋龍舟。一日之內可以喺三四個唔同節目，幾個電視頻道出現，完全覺得呢個人真係鐵打！

丹尼爾回憶，2003年佢開始發展體育公關事業，其後到上海為李寧旗下公司從事經理人工作，剛好04年ESPN在港落地，亦開始參與賽車評述，佢嗰陣既要以上海為家，週末便飛回香港做評述。06年回流香港開體育公關公司，也經歷了一段「不見天日」的生活：

「嗰陣我哋間公關公司，好成功咁推廣好多大型嘅體育比賽，好似跨境單車賽、三項鐵人、長跑等。但我又要兼顧電視台講波、體育評述，同埋電台主持嘅工作。結果就係，有成5年時間無乜返過屋企，要喺各電視台瞓睡袋。屋企人呢？一年真係見唔到佢哋一兩次呀！」

呢兩年，丹尼爾都會定期做運動。睇佢步速，都絕對唔係hea跑。

2010年，人稱「魔鬼教練」嘅前港隊足球主教練黎新祥因癌病去世，令丹尼爾對生活，對生命做出重大改變：

「係機緣巧合之下認識黎祥 (黎新祥暱稱)，大家好投契。佢間中會打電話畀我邀約飲茶吹水，第一次我有去，但之後開始忙忙忙……其實自私，之後我多數話『得閒飲茶』。」

到黎祥去世前半年，丹尼爾更要兼顧世界杯講波，他沒有回電，大概也忘了「得閒飲茶」。

「我從微博睇到佢嘅死訊時候，喊到收唔到聲。我即刻下決定：我唔要咁忙，情願賺少啲。」

「得閒飲茶」，成為丹尼爾同黎新祥之間嘅遺憾。

黎新祥教練

就係咁，佢離開有份打江山嘅公關公司。因為佢決定，「要做番啲有意義嘅事」。

香港Formula E記者會，李嘉欣係受邀嘉賓。

丹尼爾口中嘅「有意義嘅事」，包括推廣Formula E。

筆者當年喺ESPN睇賽車，剛剛新加坡開始舉辦F1賽事。當時評述嘅丹尼爾同沈國成，就不斷埋怨政府嘅體育政策保守，要喺香港舉辦方程式賽車簡直天方夜談。直到今年，Formula E電動方程式賽車終於落實喺香港舉辦，而推廣呢項活動就係丹尼爾所做嘅「有意義嘅事」。

「電動汽車或再生能源汽車完全係未來汽車工業發展嘅大勢，而Formula E亦係未來賽車運動嘅大方向之一。人哋新加坡可以將個F1賽事變為全民活動，好多新加坡人都藉住F1賺錢。而家香港主辦Formula E，亦希望可以成為另一世界盛事。」

自稱唔熟電腦嘅丹尼爾，為咗推廣Formula E，自己動手製作懶人包。

講到呢到，丹尼爾如數家珍一樣，講到體育對一個城市嘅貢獻：

「F1對嘅新加坡嘅貢獻，唔只為佢哋帶嚟2-3% GDP，更加係創造咗一個全國上下一齊賺錢嘅機會。好似話，每年F1期間，新加坡大企業就係趁呢個時候舉辦融資會議，為新加坡增加唔少收益！」

反觀香港，我哋嘅特首仲話「體育界對香港沒有經濟貢獻」，新加坡嘅例子絕對可以將佢一句KO。

除咗推廣體育活動，丹尼爾亦係幾位運動員嘅經理人。我諗起荷里片《Jerry Maguire》(港譯《甜心先生》)。戲中嘅Tom Cruise，當運動員係搖錢樹，咁丹尼爾又當旗下嘅運動點樣呢？

「其實我只係覺得香港大多數運動員收入都唔係多，希望幫佢哋搵啲廣告贊助，賺多啲錢啫。亦希望佢哋有多啲出鏡機會，多啲人可以認識佢哋。」

最初佢公司旗下嘅運動有三鐵冠軍李致和，桌球小子傅家俊，近年又有19連勝拳王曹星如，以及賽車手歐陽若曦，佢哋都曾經由丹尼爾擔任公關。

「每位運動員都有值得學習嘅地方。好似曹星如咁，佢為人真係好謙虛，好認真，絕對唔似要上台打拳嘅拳王！」

只問耕耘，或者係丹尼爾「做有意義嘅事」最佳寫照，近期佢亦不問回報，自資、自導、自演，製作了一系列香港奧運代表嘅訪問短片《人人奧運》。佢最初只係喺Facebook專頁發佈，並沒有考慮有無收益，只係覺得需要做就做。

2016年奧運進入倒數階段，今年大家又可以喺大台睇到丹尼爾，同埋佢嘅「孖寶」拍檔石金華喺電視上面講爛gag。始終，藉住電視嘅體育節目去推廣運動，係丹尼爾嘅本業，亦係佢仍然覺得「有意義嘅事」。

丹尼爾 vs 陳恩能 Facebook專頁

文：家聯@Fitz.hk

更多：
Fitz.hk Facebook專頁
[從廢青到運動員] 截肢鬥士戴劍平
[生命鬥士高誌樫] 五手八腳單車環台
[Fitz人物] 馮錦雄 一條腿的毅行者—經歷篇