2018年的毅行，係始於2017年毅行嘅失敗，上一年初毅第三段因為拗柴而敗走，一直耿耿於懷。(見《2017毅行一記》) 就同失戀最快嘅回復方法係投入另一段感情嘅道理一樣，KO 2018年毅行係洗走恥辱嘅最佳方法。
2018年諗住原班人馬覆桌，唔知好嬲定好笑，我哋四人一人中一支籤，一變四，四變十六，2018年毅行彷佛叫我要由零開始。
當日拗柴嘅陰影一直揮之不去，每次諗起都好慚愧，不過時間過去，就會忽然感激嚐過失敗。多謝呢一次拗柴，我先明白自己幾懶，練得幾唔足夠; 拗柴唔係意外，係因為你對腳唔夠力，係因為你練唔熟條徑……呢啲因果真係好微妙，正因為呢種不甘心刻骨銘心，所以心裡面不停同自己講要變強啲。因為咁，好返之後日日都運動練習，五月就開始再上山，一星期一課，行下行下，加加埋埋，差唔多行咗3次麥徑了。
開初每次上山都當成個人體能訓練，後來慢慢發覺山上給我的比起這個來得更多。由第一次上雞公要停好幾次，上氣唔接下氣，到逼自己唔停一口氣攻頂，再到兩個鐘九個字走畢第三段，每次見到自己愈走愈順暢，由害怕喺第三段再拗柴，到享受山上每一步，一切都好難得。
因為見到自己有慢慢咁改變，山上嘅鍛練成為生活中可以抓得緊嘅東西。因為你明白，你走嘅每一步都唔會白廢，山上嘅課堂永遠唔會讓你空手而回，練過的都唔會流走。由最膚淺但最鼓舞嘅身型體重改變 (小腿舊肌肉愈嚟愈結實，由130磅減到118磅)，到你身體嘅健康 (從未準時嘅經期變得穩定同埋半年無再 sick leave 過)，全部都印證 — 你付出幾多就會得到幾多。
正因為如此單純，所以換來內心嘅寧靜，雖然身體會攰，但專心行山反而心靈恬靜，由以往要復仇嘅心態，變成享受在山上嘅每一刻。
所以當有人問我點解返完一星期工仲要自 chur 早起上山，唔喺屋企 Happy 嘅時候，我會由心地答佢，上山係我叉電、休息嘅時間，當我覺得生活好無力嘅時候，山上會尋得到安全感。
因此我而家練成一個怪癖：逢識到新朋友，或者聚舊，我劈頭第一句就問: 今個星期六/日有無時間行山?(詳情見此）因為好東西係要同人分享! 希望大家一齊感受山野嘅快樂!
想支持神奇兼白目隊長 Grace 就要買 tee 啦!
『築字室』設計師方立一為獅子山精神隊設計一款兩色的隊衣，除了經典『獅子山』及『向高山舉目』墨寶，配合毅行路線圖，加上男女裝前後皆可拼成整條路線，扣除成本後會將捐款全數捐給樂施會，希望打爆籌款數字，首批隊衣預期在毅行比賽前送上。
如果你都想繼續支持我地，等大自然親手悉心改變更多人，請你捐款或買隊衣支持我地。
以下係訂購表格，詳細可以了解吓，唔明可以搵 Law少。
>> 更多獅子山精神隊的故事，見《[獅子山精神隊] 一件tee 一個故事》
>
Fitz連結: https://fitz.hk/?p=105738
Fitz Facebook專頁
[獅子山精神隊] 今個星期六你嚟唔嚟行山? (毅行倒數27日)
[獅子山精神隊] 隊號1017 呢班隊友一年前做緊咩? (毅行倒數26日)
[獅子山精神隊] 友情分水嶺 2017年隊友 Raymond (毅行倒數28日)
[獅子山精神隊] 友情分水嶺 (毅行倒數29日)
[獅子山精神隊] 一件tee 一個故事
Fitz Hiking 行山
人稱Law少，前電台主持及監製，酷愛體育運動，多次參加馬拉松及毅行者活
動，近年更嘗試進軍三鐵及渡海泳。對於跑步、對於行山、對於比賽，均有深刻而令人動容的看法。著有《原來在沒有盼望 的地方才需要盼望》。
