去追夢還是要夢醒? 阿歹如何應call?
除了人渣外，一世人流流長還會遇到幾個 wake up call：叮你要發奮做人不要再浪擲青春、勸你放下一段關係止蝕失血的感情、叫你轉工/創業離開前景暗淡的崗位…。年青人聽到這些 call 可以來個華麗轉身，但人到中年，wake up call 總餘音裊裊纏繞無盡的猶豫和疑慮，to be or not to be，千迴百轉，又是數個無眠的晚上。
order個咁豐富嘅早餐，阿歹你問准教練未? (我就清清地飲杯咖啡，信唔信?)
阿歹 (謝覺偉) 在35歲接到 wake up call，叫他離開失意的甲組足球場、也不要再幹勞碌奔波的運輸裝修行業，阿歹深吸一口氣轉做全職運動員，在山界創建自己的舞台。做全職運動員? 會不會是粒昆你的提子? 連AI也答不出，阿歹沒想太多就應 call。
Wake up call 可以是叫人為理想追夢，也可以是搖醒人不要再發夢，剛從世錦賽回來的阿歹，他的 wake up call 是叫他繼續追夢還是夢醒?
「阿歹，當初點做呢個決定? 家人有冇反白眼? 老婆有冇說話你聽?」
「今屆世錦賽港隊在名次方面令人有啲失望，點睇越野跑前景?」
「你全馬PB 2:24，可唔可以再快啲?」
「據聞你個coach係魔鬼教練，究竟有幾魔鬼?」
「阿歹你夠唔夠錢使?」(其實冇問，咁八啩我點會咁直接問，間接嘅就唔知)
世錦賽的啟示
世界山徑越野錦標賽剛在九月底的西班牙 Canfranc Pirineos 舉行，香港派出空前龐大的10人代表團參加男女子組的長短距離賽事 (感激田總)，港一精英跑手幾乎全列席。基於前幾屆世錦賽和去年的亞太區越野錦標賽獲得不俗成績，賽前山界中人都寄予希望可以再闖高峰。雖然以完賽時間計不俗，但若以名次計只強差人意，除了阿歹外，其餘的都排在一半以後，香港隊在28支完成賽事的隊伍中排22。
短距離賽事 (45K)
男子組 (198名)
黃浩聰 6:39:14 (第130名)
曾進傑 6:44:34 (第133名)
羅樂賢 7:21:27 (第156名)
女子組 (162名)
林楚茹7:27:34 (第84名)
長距離賽事(85K)
男子組 (179名)
謝覺偉11:13:43 (第83名)
譚子康11:52:46 (第97名)
曾福祥12:47:22 (第123名)
女子組 (124名)
張敏怡13:32:28 第66名)
黃琪珍13:36:49 (第72名)
甄智貽 (DNF)
阿歹在fb說：抱歉令大家失望。我們說: 你沒有令大家失望，只要見你拼盡和展現招牌式的尷尬笑容，收貨
「睇名次，港隊平均排中下游，點解今屆成績同以往幾屆有啲落差? 係香港真實水平定係發生左乜嘢事情? 」2023世界山徑越野跑錦標賽阿歹長距離組排31，亞洲第二；浩聰41，亞洲第五；敏怡31，亞洲第三。
「今屆世錦賽可以講差不多全世界最top嘅越野跑手都嚟晒，成績頭50名參加者嘅 ITRA 分係8XX-9XX，可想而知幾厲害。」阿歹是817，浩聰804，鷹鷹788，怪獸775，譚子康769，敏怡694。數據L會說今屆港隊成績是反映真實水平，阿歹都同意。
跑班同學親到西班牙撐場，阿歹笑得好甜
「香港絕大部份跑手都係業餘，為興趣而跑。其他國家跑手，包括尼泊爾同菲律賓，好多係為生計而參賽，佢哋可以全時間投入操練，甚至早三個星期時間到當地適應。國家有高山，有技術高嘅山徑同逾10K長嘅上落坡，香港係行山方便，但缺乏世界級越野賽道俾跑手操練。」
阿歹認為香港越野跑發展，受制於結構性因素，短時間無辦法令水平有所突破。亦不能靠等待天賦骨格精奇的跑手橫空出現。
「聰sir 同 KK sir 都好努力搞青訓，會唔會幫到手製造阿歹2.0或敏怡1.75出嚟？」
「我絕對支持青訓，我果時冇學歷，做裝修運輸，放左工已經攰到死，點跑? 不過青訓最重要唔係令佢哋跑得幾快，而係可以持續跑落去。世界級嘅運動員一般要十年八載磨練，但香港家庭好難俾仔女咁長時間投入運動，就算俾你入到體院，得萬零蚊收入點生活。仲要照顧家人，要做考順仔都唔會只拎兩千蚊返屋企。跟住阿爸阿媽又唔捨得收，唔好啦，不如你留番自己使。」好有畫面和聲音的描述。
「好彩我而家獨立有自己家庭，如果我早10年同屋企講轉做運動員，一定死硬!」
「我係印度嘅超馬世錦賽取得全場第八，成績理想，因堅係世界最頂尖高手比併。不過香港唔係太多人知同談論。」在香港如果無線新聞或東張西望冇報，件事即係冇發生過。報學校不會有分加的活動，家長不會有動機讓子女參與。正如某女士說，有樓有高潮。越野跑有成績至有贊助入場。不過缺乏贊助商和資源，那有好成績?
印度邦加羅爾的超馬世錦賽全場第八，寫下港隊光輝的一頁。帶住母親衝線和想著背後的辛酸，愛哭的阿歹一時感觸
「幾位香港精英跑手可以係 UTMB 做到理想名次? UTMB 都係跑越野界光明頂。點解世錦賽出現咁大落差?」
「精英跑手大多背負著品牌贊助， 玩 UTMB 係對贊助商有交代，但玩世錦賽是對國家有交代，也是極大榮耀。當兩個賽事的檔期接近時，高手傾向只參加世錦賽，不玩UTMB，避免受傷。就算玩都只係報 OCC (50K) 鬆下腳，今屆便是這樣的情況。」跑 OCC 是鬆下腳，人話嚟咩!
中年大轉身
「在2023奧地利世界山徑越野錦標賽我取得不錯成績(第31名)，於是決定辭退所有工作，自封為全職運動員。」那時名歹35歲，這是個遲來的 wake up call，阿歹果斷地應call，外間人睇覺得好英。
「謝太點睇?」
「最近我同佢講未來兩年嘅跑步計劃，佢聽完之後望住我冇乜出聲，好似話你要攞成績返嚟證明你係身體力行，唔係去玩。」情義兩心知，阿歹明白太太的心意。
冧到謝太到運動場跑番轉，證明批文已到手
「呢個決定難唔難做？」
「唔難，並唔係我唔鍾意果時嘅工作，而是我更鍾意跑。由於我係世錦賽攞到前三份一位置，啱啱夠資格申請入體院，因唔係奧運同亞運那些大賽，我當然係最低級別的體院運動員。」亦即是仍要為生活拼博。
呢張證無得淘，只能靠實力和苦幹。不知阿歹是否體院唯一的越野跑手？
「後來經田總介紹了我現時的教練村尾慎悅俾我，佢好有來頭，曾經教過世錦賽馬拉松冠軍同奧運銀牌嘅選手。費用由田總負責。佢日本香港兩邊走。」
與田徑港隊 (左起) 羅映潮、黃啟樂及莊司暘在北海道士別集訓，村尾教練擺出魔鬼造型，似乎不能鎮壓住四隻小魔怪
「教練有冇定一些目標俾你?」
「有，佢希望我用4個月時間隻馬做到2:20，之前我係渣馬跑2:32，12月我開始跟教練，2月再跑渣馬，我跑2:29，即刻見到進步。4月跑倫馬，做出2:24 PB，快左5分鐘。」去到這個水平，跑快一、兩分鐘已經係要開住香檳嚟還神。
倫馬，笑住跑，阿夕話因為見到屋企人。呢個紋身佬百分百family man
阿歹說這場倫馬是用生命硬接，已經去到極限，不可能再快過2:24。而且又傷患纏身，教練看在眼裡，不再迫他還2:20條數。
----- 廣告 Ad -----
「跑到2:20又點，我冇可能去到2:1x甚或2:0x。而家我只會keep住每年跑一隻渣馬。」認同，作為職業運動員，目標不是追PB自high，應是追頭三名選手，如果連尾燈都不見，就不要再浪費時間。
2024渣馬組別冠軍。一位全馬2:24的運動員去跑山，希望他可以帶香港越野跑水平去到另一個層次
俾教練鬧慢過女人
「山賽方面教練都有俾目標，我差不多每次都啱啱達到，反映佢嘅眼光極之準確，呢下勁。」
「聽講村尾教練都幾魔鬼，實情有幾魔鬼?」
「佢唔係好講嘢，冇乜表情。佢成日笑我渣，話我跑得慢慢過女人。」好想搵呢個女人出嚟。
「有，2024我第一次參加日本呂間湖100K超馬，跑6:40 (第5名)，但女子世界紀錄係6:30，所以教練笑我慢過女人，笑左年幾。我終於係今年6月日本超馬跑到6:28:39 (獲全場總冠軍)，臨尾死都要死返嚟，等佢以後冇得再笑我慢過女人。」總算跨性別地破左世界紀錄，自high幾日都好。
6:28 終於快過女人(女子世界紀錄)，教練要諗過另一樣笑阿歹的項目
20000円事少，香港仔係人哋陀地可以企係C位至威
「相處咁耐教練有冇讚過你?」
「有呀！」阿歹即刻有反應，可能因為罕有。
「12月嘅印度超馬，教練親自到場督軍，好大壓力。我跑第八，教練走埋嚟拍一拍我膊頭，跟住同我講左句well done!」搞唔掂，阿歹醉了! 他希望說話可唔可以print出嚟排係屋企!
從高官手中領取田總頒發的年度傑出運動員獎，有5000蚊都唔笑下
全職運動員的日子
「我真係冇乜娛樂，晨早起身跑一課，休息下。下午做體能，再跑多課。中間嘅時間就係襟下手機。有時諗不如襟少啲手機練多課。如果唔係咁，我哋追唔番外國選手。」這份工冇hea位，每天每一分鐘都在難為自己、迫害自己。hea少少都唔原諒自己，又內疚又盛，過這樣的生活，你殺左我把啦。
「有跑友問我，點解你跑山唔使食gel唔飲水? 有鬼錢買咩! 我唔講出嚟之嘛。咁肉酸點講呀。30幾蚊一包gel，去郊外啲士多買水要廿蚊，操一課啲成本好貴，特別疫情時，我冇工作冇收入。」苦日子通常造就偉大的運動員。
為興趣而跑可以離場，選擇了職業運動員條路就要撐下去
「十年工作經驗令我更了解自己，最重要知道自己要啲乜嘢。面，其實冇乜所謂，我睇得好淡，衰左就要接受，唔好搵藉口，我有時傷左都係忍住，冇同教練講。」阿歹不是喜訴苦的怨婦。
2024年的成績不太理想，再加上「魚羊」50公里賽阿歹因發燒首次DNF，11月馬來西亞 UTMB 系列賽100K，竟然跑錯路又要退賽。曾經質疑短短的全職運動員生命是否已走到盡頭，最後阿歹選擇站起來繼續跑，決定同命運對賭，因為押下了青春的注碼，不可以就這樣清袋離場，對自己對信任的人如何交代。
「未來計劃有乜方向?」
「稍後會同教練傾嚟緊兩年嘅計劃同目標，可能主要係超馬世錦賽，因為呢方面比我跑山成績好，而且係我一個籌碼。我都希望可以去歐洲集訓，係好偏遠嘅地區，有真正嘅大山。不過要自資，冇資助，要計掂數。」阿歹目前的贊助合約明年初到期，他不寄予厚望。不過窮沒有限制阿歹的想像和追夢。
「你點說服自己繼續走呢條咁 technical 嘅路?」
「兩個理由，第一，我應承過要帶住已在天上嘅阿媽四處去；第二，要跑到冇晒錢至唔跑。」好型呀!
彩蛋 – 你有冇社交焦慮症?
阿歹給人的印象是個低調的宅男，少出聲，不愛應酬。但作為全職運動員和山界明星，都要拋頭露面，成為焦點，被人圍攏被 selfie。
出席宣傳活動，阿歹已習慣交戲
「好似同你性格唔係好夾，慣唔慣?」
「起初唔係太鍾意，覺得有啲難為自己。後來慢慢接受。其實我仍然做番我自己，唔會點修飾，要X要鬧會照講。」
「你有冇社交焦慮症?」
「有呀，呢兩年去完日本集訓返嚟，好怕見到咁多人。係街行會塞住耳仔，但我喜歡行街。」
就像國產零零柒表面是風筒其實是鬚刨的戲軌，阿歹表面是金毛紋身細個唔讀書大個做運輸嘅佬，但其實是堅毅刻苦有目標有理想的感性I男 (處女座)，真摰的笑容令滿臉的雀斑起動，童真滿溢，在藍天白雲下的山徑奔馳，追趕一個遲來的夢，祝願成功! (也送給走在同一條路的怪獸仔 (曾福祥) 和 KC(陳家強)，努力!)
走在同一條路上的難兄難弟，每次失意、撞牆、踢石、迷路、乏力時，知道有人明白，有人在附近等你起番身，已經足夠了。
阿歹說過:「關於自律，並唔係迫自己去做一樣辛苦嘅事，反而係令你每天努力一點去變成自己鍾意嘅自己。」這些文青式說話同阿歹個 look好似有點違和。
大佬，冇乜嘢嘅話我出返去跑步先。
----- 廣告 Ad -----
