腰背痛搵相熟中醫師重建骨頭。事後，師母（醫師太太）千叮萬囑：「嗱，千祈唔好行山跑步，最多游下水，喺屋企耍下太極都得！」
我一聽之下，以為自己病入膏肓，唔可以再行山跑步，個心當堂涼咗半截。好彩醫師對我解釋：「嗱，中醫嚟講，暑天唔適合做戶外活動，因為『氣隨汗脫』。」
咩係「氣隨汗脫」呢？中醫認為，人身體入面有一道無形嘅氣，用嚟維持身體健康（氣功就係將呢一股氣引導），而暑天多汗，再做運動嘅話，流得太多汗就會影響健康。而且夏天因為天氣熱，人會變得心浮氣燥，所以中醫除咗鼓勵人去游水之外，亦鼓勵人去耍太極，甚至釣魚（釣魚真係運動？），令自己心靜，減少心理以至生理嘅煩燥嘞。而醫師建議，大家真係有心做戶外活動嘅話，最好就過咗立秋先（今年立秋係8月8日）。
中醫唔鼓勵人夏天做戶外活動，叫人耍下太極。
我對中醫嘅認識，就只係限於遞高隻手，畀醫師把脈。佢哋講嘅「氣隨汗脫」，我真係識條鐵咩。不過，一般醫學常識都講，夏天做戶外運動，如果過份劇烈，唔可以達到鍛練身體之餘，仲有可能會對身體有不良影響（例如中暑，消耗過度）。咁即係話，無論東方同西方嘅醫學，都唔鼓勵人夏天做太激烈嘅運動。
講到呢度，我又嚟啲「阿媽係女人」tone（唉！），不過，我本住挑戰權威嘅精神，最後向醫師問咗個問題：「如果話夏天唔做得戶外活動，咁以前啲人唔通唔可以喺夏天耕田？」
----- 廣告 Ad -----
醫師即時叫我畀錢走人。
至於我會唔會夏天唔去跑步去耍太極？我諗我都情願匿喺冷氣房做7 Minutes Workout好過。去片：
更多：
識得寫-CV一定寫PB
[親子運動] 細路仔做運動唔使逼啩?
家聯其他文章
Fitz Running 跑步
家聯
為何要運動？去公園看看那些四五歲的小朋友，從跑跑跳跳所得來的喜悅吧！勿忘初衷，運動會令人快樂，難道我們都忘記嗎？