[毅行備戰2016] 路線分析: 第六段 畢架山至走私坳

毅行者嘅第六段可能係最唔受注視嘅路段。事實上，呢段嘅路程短，大多數人都只係匆匆而過。不過，呢段途徑嘅大埔道，有巴士有小巴仲有的士，有人就受唔到引誘上車走人！唉，都行咗超過一半，唔係咁樣就放棄呀嘛！

毅行當日，金山嘅馬騮通常匿埋晒。

第六段：畢架山至走私坳（CP5—CP6）

• 標距柱：M109-M120
• 距離：6.1 公里
• 途經：離開畢架山頂CP6，落鷹巢山。橫過大埔道，進入金山郊野公園。沿金山路上斜到達走私坳射擊場CP6。

鷹巢山自然教育徑

路況及地勢：

1. 初段為鷹巢山自然教育徑，約3公里。8成為下山石級，完全考驗參加者腳力。
2. 進入金山路，柏油馬路，路況良好。但金山路斜路斜度很大，不容忽視。

注意事項：

1. 有人話第六段係麥徑裏面最易嘅一段。係咩？最短就係最易？我唔同意囉。事實上，落鷹巢山嘅石級，喺大家行咗50幾公里之後，一定會一路行一路鬧；
2. 至於上金山路一段，佢嘅斜路雖然唔及草山咁甘，但你一時心急，行得太急，就包保你要中途唞順條氣囉。
3. 絕大多數毅行隊伍會喺城門水塘Call齊support team大休。所以去到CP6通常唔停，一口氣衝多少少到第七段，去到城門水塘先休息。
4. 因為咁，CP6檢查站有咩補給，似乎唔係太重要。 (其實以往嗰度有烏冬食！)
5. 金山多馬騮，唔好餵佢，唔好搞佢，唔好理佢。
6. 走私坳CP6並不在大路，上晒金山路斜路，記得留意指示。傳說有隊伍喺城門水塘食緊叉燒飯，先醒起自己未去檢查站登記……

註：有關「目標時間」

參考自樂施會官網2012年參加者小冊子，千祈唔以為係行貨，根據本人經驗，佢列出嘅「目標時間」極有參考價值，計埋路況、山徑艱難程度，甚至休息時間。參加者依住佢個時間，可控制自己步速。

至於我只列舉25至35小時作參考，是基於對新手來說，這個時間概不用捱兩晚眼訓，而又不太難去衝破。當然，提多一次，呢個毅行備戰系列主要為新手而設，各位老手有咩心得，記得留言同我多多交流呀。

更多資料：樂施毅行者官方網頁

更多：
Fitz.hk Facebook專頁
[毅行備戰2016] 路線分析: 第五段 基維爾營至畢架山
[毅行備戰2016] 路線分析: 第四段 水浪窩至基維爾營
[毅行備戰2016] 路線分析: 第三段 北潭凹至水浪窩
[毅行備戰2016] 路線分析: 第二段 大浪西灣至北潭凹
[毅行備戰2016] 路線分析: 第一段 北潭涌至大浪西灣
[毅行備戰2016] 7至10月的訓練計劃
[毅行備戰2016] 11件必須測試的裝備
[毅行備戰2016] 如何挑選你的隊友?
Fitz Hiking 行山