[摸鬼手變摸黑] 行山客連環犯錯 迷路網上求救

唔少遇疑難都會問 Facebook/Google 大神，有愛好行山嘅網民，就更加信晒佢，由規劃行山路線以至迷路求救，一條龍喺 Facebook 搞掂晒。好彩，事主最後都走出困境，替佢抹一把汗之餘，亦提醒大家行山要做足準備。

筆者依時序列出相關事件:

事發兩日前: 行山網上問路

呢位朋友出發前已喺多個行山群組發帖，話想去摸下鬼手，預計由大美督出發，要求大家畀啲意見。

「請問山友，由A位置大尾督 (大美督) 去B位置睇鬼手岩， 正常步速一個鐘內影相 。來回八小時可以嗎? 有邊啲係特別難度?」

唔少網民當時已指出，大美督去鬼手來回，一般有行開山嘅人都要至少10個鐘。有人亦建議佢哋不如搭船，可以行少好多。不過呢位網民始終不為所動，依照計劃行陸路去鬼手。

就算呢位網民唔識睇地圖，都應該識得 Google 下一啲行山網站睇下，佢只係伸手問 Facebook 大神，仲竟然信到十足十，可以話相當勇敢，亦種下佢之後迷路嘅結果。

有網民眼睛雪亮，當時已指出:

• 「唔係畫條直線咁簡單，你幾時出發? 鬼手幾時退潮等你可以摸。去完B在回去趕不及入黑怎算。跌死狗你有數條分岔路，行錯怎算?」
• 「你亦可以一大早岀發，行到鬼手岩打卡，飲飽食醉抖順條氣，再 call 飛行服務隊接翻你岀去，咁樣就非常輕鬆。以上建議只供參考，並不代表個人意見。」(按: 睇怕係曲)

行山日: 山上迷路網上求救

星期日，佢哋如常出發。唯一可取嘅地方就係有同伴，不過行到星期日晚大約七點鐘，又見佢喺行山群組發現發帖:

「大尾督打算去摸鬼手，中途改变回去烏蛟騰，計错时间，现在入黑，在不知名位置，估计还有半小时才到巴士站」

大約八點，帖子有更新:

「已見村燈，call 咗的士，大家放心，多謝大家! 行山教训，这线不是一般的行山人可處理，我们已经中途改路线变咗环湖，但入黑时间早咗!」

網民反應

去到呢個地步，網民已經發現問題:

• 「唔跟風唔打卡就唔識行山」
• 「仲有心情放 post 上嚟講情況，就應該冇事啦」
• 「後果自負，事前問咗咁多意見都搞成咁，唔抵幫。」
• 「“量力而為”呢四個字原來咁難理解?!」
• 「完美演繹，條路自己揀，xx吾好喊」
• 「接連幾個鬼手post，可以給行山新手認識這些非一般路線難度，不能衹靠一股熱情就去挑戰」

入秋時分，又到行山旺季，總之大家引以戒啦。有關行山嘅規劃同準備，我哋講過好多次，大家可以睇番有關文章《[顧己及人] 行山遠足安全常識》。