圖片來源：揮雨@地平綫
我唔係黑心，而係睇人哋毅行嘅失敗，絕對可以對毅行者了解多啲，令自己準備好啲。
1. 某年，有位歌星代表某電台參加毅行，一身籃球衫褲起步，行到金山，大脾被及膝嘅籃球褲磨至出血。結果，到急救站問義工借較剪，剪短條褲完成活動。
教訓：衫褲鞋襪要一早預備好，仲應該係合適嘅行山裝備。而每件裝備都要喺訓練時著過試過。記往：舊好過新，新嘢留番影相用啦。
2. 比賽當日市區日間氣溫達28度，有朋友行到城門水塘，覺得天氣熱，就擺低件風褸畀支援隊。結果上到大帽山太陽落山，氣溫驟降，加上山上風大。呢位朋友最後搵個垃圾膠袋包住自己，先唔會凍親。
教訓：風褸喺夜晚時份係必要裝備，真係唔好立亂放低。
----- 廣告 Ad -----
3. 有隊伍將目標完成間定為18小時，每星期兩課，每課無50公里都30公里，到舉行毅行前一星期都仲操緊。結果，佢哋由第三段開始已有隊員退出，到終點只有一位隊員完成。
教訓：操練過度就係呢啲。記住：休息就係訓練嘅一部份。
4. A君第二段開始發現腳底有水泡，以為會無事，結果行到CP4已經行唔到。除鞋一睇，發覺鞋入面有粒石仔。
教訓：覺得有唔妥即時停低搞番掂。上面呢個CASE，只要肯花30秒除鞋倒番粒石仔，對腳就會唔有水泡。
5. 有人喺毅行活動入面，第一次食Engery Gel，諗住可以爆得勁啲。結果，佢個肚就爆嘞。佢食咗包Gel之後，由獅子山屙到去大帽山。當中，仲要眾目睽睽之下，喺針山山頂解決……
----- 廣告 Ad -----
教訓：嘢唔可以亂食。其實Engery Gel呢一類食品，之前最好試下先。特別係毅行當日你運動量咁大，腸胃功能會下降。
下次會繼續講幾個失敗嘅教訓。
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。