[Fitz出戰毅行] 洪松蔭松哥的推動力

由Fitz.hk創辦至今，我哋都講過好多熱血沸騰嘅運動故事，估唔到，我哋Team Fitz今年都自己創造一個出嚟。

故事由大帽山講起。

Team Fitz去到大帽山頂，時間大概11月21日嘅中午12點，即係話，佢哋喺11月20日嘅11點起步，已經行咗25個鐘。而翻查山雞推崇備至嘅樂施會官方「目標時間表」。第9段及第10段距離21公里，要5小時完成，就要有超過全程25小時嘅能耐。即係話，係邏輯上，佢哋要喺30個鐘完成100公里，可以話係唔可能了（佢哋行咗8段已用咗25個鐘)。以下，我以時間列序記述呢件事：

時間（11月21日下午)
12:15 到達CP 8，決定大休至13:00，期間松哥為Team Fitz按摩雙腿，重新上力。

13:15 起行，我跟隨隊伍，連同超級支援成員洪松蔭，一齊進入第9段。呢段路大家有講有笑，間中落斜跑下，但未算好急。(至少我從容跟上)

15:00 進入CP 9，發覺要達到30小時內的目標時間，就要在2小時內，完成餘下11.3K的路程。洪松蔭松哥，當時講咗句：「喂，2個鐘跑10K咋喎，應該實得啦，慢慢跑咗個水塘先講啦。」就係咁，整隊人在檢查站連水都唔補，櫈都唔坐，即刻起行。(我當時聽落都覺得易過執豆)

15:40 我發覺Pacing好快，快過我平日跑開，加上孭咗部份補給品，已經大墮後，與隊伍脫離。

15:54 松哥發出訊息(圖)：OTW 186號柱 (即仲有7K)

16:36 松哥發出訊息：3Km

16:55 衝線！成功了！！

佢哋有幾勁？粗略咁計，臨尾3Km嘅Pacing係8分幾（1Km)，聽落唔算快，但記住呢段係完成咗97km之後的3公里，隊員平日最多只係行山、慢跑下，唔係日跑20Km嘅跑友，要佢哋再以咁嘅速度跑足3K，究竟係點做到？

對唔住，我真係唔知！我問過晒當時一齊跑嘅5個人，大家都講唔出所以然。當然，當中涉及個人嘅好勝心態、團隊間嘅互相鼓勵支持，但在我陪行的10K裏，我發覺松哥嘅角色實在不容忽視。由我眼中所見，佢進入第9段後，不斷睇錶計算時間，令我哋喺2個鐘完成第9段嘅9.3K。松哥亦喺不知不覺間，令當時已有嚴重腳痛嘅杜光庭可以毫無怨言快步前往。

松哥起步前發給隊員的錦囊

而松哥究竟有咩力量去推動到大家呢？我獲佢授權（XDD）分享喺完成後發出嘅短訊：

雖然過程中有一些痛苦，但努力過後，總覺得有美好的回憶。
人生有两種痛苦，一是成長的痛苦，二是後悔的痛苦
成長祇是一個過程，幾艱難都會捱過
如果我們選擇放棄便帶永遠都會問自己點解唔堅持下去
你們今天成功了
好好享受今個特別的夜晚
美好的回憶！恭喜恭喜！再講幾多次多謝，我相信亦不足以表達我哋對松哥嘅感激之情。但點都要再講：多謝你呀松哥，多謝。

我亦要多謝創造呢個咁熱血故事嘅四位Team Fitz嘅成員，正如松哥話：

醫生（夏威）後段的強勁帶動、Bonnie的默默耕的耘、Daryl驚人的意志、Law少的堅持，成就三十小時內完成……最重要都是參與運動員的付出和努力。

松哥又話：我記憶中前後參與毅行者的十八年來，第一次做支援隊伍，但做得很開心……

我哋都係呀，松哥。

後記：今年毅行完結了，除咗多謝松哥外，亦多謝：

1. 一眾曾經協助我哋嘅支援隊朋友：Stella、PingTing、Sam哥、Barry、Cherry、Karen等等。

2. 捐款給我們的朋友， 無論是上網捐款，還是以現金過戶的朋友。

3. 各個贊助商：Biotherm、Raidlight、Newline、Azzaro、ANS。

最後，更要多謝樂施會，給予我哋成為媒體合作伙伴，令我哋直接參與這個山界盛事，呢個係我哋嘅榮幸

（我哋嘅籌款網頁仍會運作至12月22日，各位仍可捐款，以贊助樂施會嘅扶貧工作。)

更多：
[毅行之後] 10個毅行者的所見所聞所想…
[Fitz出戰毅行] 痴線，我永遠都唔會行毅行! (下集)
[Fitz出戰毅行] 痴線，我永遠都唔會行毅行!
[毅行之後] 回復身體疲勞的法寶
[Fitz出戰毅行] 起步嘞! 係講多謝嘅時間
Fitz出戰毅行@Fitz.hk
毅行者@Fitz.hk
Fitz Hiking 行山