我的豬 · Hike隊友

圖片來源

跑者哲人最近出了一本名為《我的豬隊友》的書。所謂咩嘢人睇咩嘢，我驟眼看書的封面時，下意識地看錯了豬尾是繫在腰間的爬山繩。這怪不得我，因為作者是熱愛行山的。所以腦裡即時彈出另一個書名《我的豬 · Hike隊友》。不過，作者是社會精英，才不會這麼粗鄙，沒文化。

我一直都是專注路跑的，42.195是我的極限。但有時我都會跟人行山、操山賽練氣練肌力。我陪朋友操過雷利、毅行、苗圃、TransLantau 等等，算是一個合格 training partner。在過去行山和陪人操山賽的日子裡，我有幸與豬 · Hike隊友結緣，感恩他們來試煉我的EQ，我視為一種鍛鍊。不過，一次已經足夠，但願我們不再會遇上。

1. 賤嘴Hike

圖片來源

我喜歡跟吹水了得的朋友行山，他們有說不完的話題和故事，又懂得攪笑。即使行 twin peaks，我都不覺得辛苦，因為全程娛樂性豐富，還笑到練出腹肌來。相反，我就好怕同至L憎跟自以為好好笑的柒頭行山。

這些柒頭最喜歡拿人來開玩笑，一次練限時跑樓梯上白波，柒頭叫我第一個跑，我好努力扯哂蝦咁跑完落來時，他同全部人大大聲講「嗱，陳伯都得，你地無理由唔得嘅。」成班人要掩住嘴忍笑。

另一次，大家講起跑步前後的改變，輪到他時，他指著身邊的女跑友說「我以前好似佢咁肥架。唔係，妳肥啲!」個女仔即時兩眼通紅。 但多得條柒頭激勵，個女仔9個月後變成全場最索的一個。

條柒頭見你黑臉時就會兜:「唔係唔講得笑係嘛?」

好好笑咩? 我笑鳩你 bar code 頭又點睇呢?

2. 愛心Hike

圖片來源

不是性別歧視，我見到大部分愛心Hike都是女生。『狗鳩』外，我最L驚馬騮，聽講俾馬騮咬親要打癲狗針，仲係一星期連續打7支，每日打一支，打足7個禮拜，即是7×7 = 49支，只要其中一支打歪，打錯的話，便要從新打過。

偏偏愛心Hike就係鍾意餵飼馬騮、野豬BB。一次行金山，有條仔開車同條港女上來餵馬騮，自己就攪低少少車窗揼麵包出來，引來一大群馬騮。部分搶不到食物的就跟著我，伺機搶我的東西，當時我真係好很驚。

3. 喇叭Hike

圖片來源

深秋的一次山中跑，我在郊野公園重遇了久違的大自然奏鳴曲。那個午後，天藍得澄澈，雲白得純凈，我跑在林蔭道上，當風吹過時，沙沙沙、沙沙沙、沙沙沙……在風中，樹葉不斷地響着，我放慢腳步安靜地聽着，頃刻我覺得無比幸福。此時，不知何來一個冚家剷，開著一個好『拆』的喇叭播歌。小喇叭吖! 真係好L討厭。

4. 自拍 Hike

圖片來源

有幸同打扮靚一靚的 Yama Girls 行山，本來三小時可以 KO 的家樂徑行足5粒鐘，因為沿途要打卡。條女個頭話行到好攰，呢頭可以跳到成層樓咁高影相，影完還要執好先放上IG。

5. 直播Hike

圖片來源

原來依家行山仲要化行哂妝的。戴頭盔先，人家穿什麼，化不化妝行山，我是沒有意見的，我覺得打扮漂亮的山女是山中一道美麗風景。一次行鶴咀，我以為同行的濃妝美少女在拍片，原來她在做緊live。當我想窒佢勁無聊時，原來有人比佢更無聊，竟然有百幾二百友睇佢live，問佢:「阿梅，食咗飯未?」、「行山係點行架?」「用什麼防曬?」「著什麼行山鞋?」「有無帶水?」「妳好上鏡呀!」

香港人有幾L忙呀! 可以花幾粒鐘睇條女live。

6. 臭豬Hike

圖片來源

顧名思義，臭豬Hike的體臭真係好難頂。未起步，個身已經發臭。同臭豬Hike練跑會迫到我一定要跑在他的前面。唔係嘅話，我會好似同條腐屍，Walking Dead 一齊跑咁。

7. 菠蘿Hike

圖片來源

菠蘿Hike就是一味靠黐。我唔介意你當我係空中補給，自己什麼都不帶，ultra-light 操山。 其實我的水呀、gel呀、能量補充飲品、energy bars 都預咗你個份。但你千祈唔好攞我支 body glide 搽下體吖! 新買的，你話我仲要唔要好呢? 到我轉用凡士林時，我帶了大號裝，足夠搽哂成隻大笨象。你又一手挖了一大劈出來，然後係我面前伸手入褲到起勢摷。摷完之後，你話唔夠要再攞，情何以堪呢!

8. 嚮導Hike

圖片來源

古語有云:「唔識路，扮嚮導。擔櫈仔，齖頭位」。自知不熟路，所以絕少帶朋友行山。我不清楚其他人，應該同我一樣。人類的腦袋是很容易輸入程式的，我的意思是如果你同我講今日行20公里，要6個鐘，我的身體會下意識地分配好體力應付路程。過了20公里，6小時之後，我就會熄機。所以，你要十分準確話比人知要行多遠和行幾耐。

今年初夏酷熱警告的一天，跟條蛋散行蚺蛇尖。本來是赤徑上循原路返，怎知條蛋散話由米粉頂方向落山，一路沿東灣、大灣、咸田灣及西灣前進，最後係西灣亭離開，一次飽覽「一尖四灣」這西貢五大美景。

因為計錯時間，天黑都未去到西灣，Google map 話45分鐘行到的路行極都行不到，好似進入了結界一樣。最後條蛋散話可能蕩失路，我正要爆粗之際，女名校畢業生兼港大比較文學碩士跑友火都嚟，好大聲插條蛋散:「DL咩!」，句粗口響徹成個西貢。電影效果就是鏡頭跟著個「D」字拉wide，見到全座山，再有一群雀仔飛出來個種。

9. 亂Poke Hike

圖片來源

同朋友家成玩 twin peaks，鳳凰山係旺過旺角，一班人排著隊落山，行在前面是一對男女，男的行先而女的就跟在後面。條女著 tube top 加條超短牛仔褲，索到呢。條仔就係過目即忘，唔型唔靚仔，普通過普通的男仔一個。條仔拎著支金屬尖頭 pole 喺度亂隊，好幾次差點戳到前面的山友。佢條女睇唔順眼同條仔講:「等我行喺你前面，費事你拮到人，你拮死我好過你拮死其他人。」真係偉大。

10. 美食Hike

圖片來源

美食Hike就是跑十公里食全馬的隊友。每次行完個6公里，返到西貢墟便失守。先排隊買西貢咖啡餅店的菠蘿油頂肚先，食完菠蘿油再去勝記食海鮮，跑食之旅當然以滿記甜品作圓滿結束。如果諗著跑山 keep fit 的，我怕你跟了『豬』隊友。

11. 口術Hike

圖片來源

----- 廣告 Ad -----

口術Hike是十分常見的。我跟過一班偽行者操山，當中不乏口術Hike。未起步時，A話:「尋日跑咗30K，今日當recovery run」; B話:「剛剛做完腳踭手術。」我忍唔著問埋阿C:「你呢?」阿C認真答「盤骨碎裂」。落場時，無一個肯比我過佢，世界紀錄咁快完走。

12. 好勝Hike

圖片來源

好勝Hike努力鑽研怎樣可以在 ultra 中『偷』時間。他刁鑽到研究怎樣一邊跑一邊小便而又不被人察覺又不會整濕自己。我怎會知? 因為瀨過佢嘢。個次我們操落山，我跑在他前面。落到山腳，他同我講

「嘩! 陳伯，原來真係得嘅。」
「得咩嘢?」我問。
「可以一路跑一路痾尿，只要揀啱風向和地形就可以。」他興奮分享。
「即係點?」我問。
「第一，風向是要從身後吹過來。第二，地形是要落斜。Slow down，aim and shoot。身體是習慣企定定痾尿的，所以要練習吓，熟能生巧。」他說。

好勝Hike解釋在一場100公哩超馬比賽裡，他要痾三四次尿，一次30秒計，可以慳到成兩分鐘

DLGH吖，唔怪得知我頭先落山時覺得後面濕濕地啦，你條仆街搵尿射我。

Sorry囉，第一次練習無咁準。下次我搵你練痾屎。

Fitz連結: https://fitz.hk/?p=110300