----- 廣告 Ad -----
突然又已一年,睇返上年比賽篇文,依然百般滋味。好慶幸今年又有機會參加,正所謂「邊度跌低,第二度起返身。」既然上次南丫島已經係谷底,今次點都唔會差過上次掛……
當然,隊友仍然係最緊要,好想組返上年嘅組合,好在師父見過鬼未怕黑,但可惜才華橫溢嘅飛龍有要事在身,同唔倒我哋一齊玩,而咁啱有幸 KK 大師得閒,就夠腳可以一齊 Merrell 挑戰!
一年過去,今年得到嘅係更好嘅鞋履,消失嘅係衝冠嘅氣傲,不變嘅係對比賽嘅認真。
----- 廣告 Ad -----
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發_01.jpg?resize=760%2C570&ssl=1)
多謝大會贊助嘅 Merrell MTL Cirrus
喺開始前,經過非正式統計,己隊三個入面有三個唔識用指南針,兩個唔識睇地圖,兩個落山會腳震,兩個特別多廢話,一個肚痾進行中,一個早餐遲到,一個腳痛,大家藉口特別多。
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-3.jpg?resize=510%2C680&ssl=1)
康師父
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-4.jpg?resize=510%2C680&ssl=1)
KK大師
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-5.jpg?resize=510%2C680&ssl=1)
筆者
----- 廣告 Ad -----
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-6.jpg?resize=614%2C680&ssl=1)
HNR 佛系24
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-7.jpg?resize=760%2C507&ssl=1)
賽前同HNR友隊ss超級大合照
比賽開始,第一個 Task 係要向前跑一百米,然後係沙灘搵地圖,己隊勝在有百米飛人 – 人肉挖泥K,一出發應聲彈出,雄姿英發,係大外檔飛奔,然後好順利挖出地圖。問題係 KK 係路痴,挖完就企左係度,連少少睇地圖嘅衝動都冇。但唔緊要,先發制人,後發制於人,最緊要有型。
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-8-e1554650143822.jpg?resize=748%2C402&ssl=1)
右一: 人肉挖泥K,大會短片截圖
喺我哋生活嘅年代,有句說話叫做「執輸行頭,慘過敗家」,己隊深明箇中道理。當師父同我趕上之後,第一件事都唔係睇地圖,而係……「死跟」、「死跟」,無恥到大叫埋出黎,唔好執輸嘛! 話說 CP1 係近淺水灣喺面,而我哋跟左師兄向左反方向跑,跑跑下先覺得唔對路,點解得我哋兩隊跑反方向嘅? 腦海叮左一聲! ”奶”野……倒返轉頭跑,已經要係主車群尾後追,即刻諗起我哋生活年代嘅另一句說話「偷雞唔到蝕渣米」。
去 CP1 大概要經過一段平路、一段斜路、一段山路,跑開平路嘅師父,難以抑壓住興奮嘅心情,係平路駁哂老命跑,心急到背脊都刻住「趕路中」! 雖然追返唔少時間,但同時 KK 都面有難色。
講返轉頭,話說 KK 比賽前一日同當日都係處於肚痾狀態,食早晨入到餐廳第一件事係肚痾,痾完再食……食完比賽再痾……但都仍然繼續,多謝佢嘅努力,辛苦哂。
一跑就見倒佢不在狀態,之後嘅斜路同山路更顯吃力,手腳並用,總算去到 CP1。
接住落嚟嘅係上樓梯、上樓梯、上樓梯、落樓梯,然後落返去馬路,沿路都算順利,係 KK 有的吃不消嘅感覺。落返馬路搵引水道入口,己隊其實有好大機會入錯位,但咁啱見倒毅行教室隊係第二個位入,唯有再施展跟蹤本領,結果教室揀啱路,兩隊就一齊向 CP2 進發。可惜「入水容易出水難」,由於大家跑得太開心,略過咗引水道嘅T字出口,繼續向前跑左,沿途遇到都係行錯路而走回頭嘅師兄,冇比提示之餘,仲幫我哋吶喊助威、加油努力。當時精神真係為之一振,結果跑到盡頭,有塊牌寫住「此路不通」,崩潰,師兄都未免太絕情。此時此刻,子華共鳴。
----- 廣告 Ad -----
沿路跑返出去,見倒其他隊跑錯路,我哋駁哂老命同佢哋講前面係 “倔頭路”,動之以情。然後有啲隊仍然會繼續向前跑,好有儒家精神:「明知不可為而為之」; 又或者純粹係師父樣子太古惑,完全唔可信。但點都好,同教室隊搵返正確出口,齊齊抵達 CP2。
CP2 玩矇眼執野,KK 平時矇人矇得多,今次就同師父一齊矇,背對背擁抱,再踎低執番……絲帶、小球等。雖然畫面令人不安,但順利完成,出發 CP3。
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-10.jpg?resize=760%2C505&ssl=1)
斷背K師父
途中基本都係平路,放鬆跑跑下就到,臨到之前,KK 終於引唔住要爆 (石) 啦,衝左入洗手間。完全幻想到佢係洗手間入面一路痾、一路心急、一路責怪自己嘅情景。而師父同我其實係出面偷得浮生半日閒,友誼第一,開心第二,安全第三嘛,比賽!? 享受就好。如果問 KK 係咩驅使佢肚痾都玩定向? 係愛定係責任呀? 佢會答: 係 Merrell 呀! xxxx! (硬性植入式廣告)
CP3 大會準備咗水同食物比參加者,當然仲有啦啦服務,為征途中咁多位參加者充充電,繼續剩低嘅比賽,多謝大會。
出發 CP4,係馬路交匯處就好似人生交叉點咁,難免會有啲迷失,好彩巧遇外國人隊,引領正確方向,齊齊拍住上斜。言談間得知,原來之前佢哋喺引水道都跑緊入倔頭路,但聽咗我哋講即刻 U-Turn,而家引領返我哋正確方向。種善因,得善果啦,善哉善哉。Thank You so much.
上完斜之後就要上山去 CP4,地圖可見有三條路,A路係最短路程,但要爬石上,友隊大概就喺哩條路上,年少多好,最後上到聲嘶力竭,但留下左美好嘅回憶同腳毛,第時仲有機會仲可以同子孫分享經歷,一切都係值得嘅; 而一把年紀嘅我哋係B路上,梯級爛路啫,仲叫應付得黎。
睇師父嘅笑容同手臂就知道上聶高信山有幾輕鬆。順利登頂,「嘟」一「嘟」個 bib,就衝返落山啦。
己隊去 CP5 係跟藍色箭嘴方向,原路落返去,轉入深水灣道落斜跑行人路去山路入口 (紅色交叉位置),但路痴嘅我哋,係紅色交叉完全 miss 左山路入口,然後有第二隊沿住綠色箭嘴係迎面上嚟,命運嘅相遇令我哋有一個好有趣嘅對話:
對面隊: 喂,「趕路中」,我哋係下面上黎,冇路㗎,唔使落去。
己隊: 我哋係上面落黎,都無路喎,唔使上去。
----- 廣告 Ad -----
經過 “倔頭一役” 之後,大家都心存猜疑,但總唔能夠打破人與人之間嘅信任,兩隊企左喺度周圍望,原來入口就係我哋左手邊、佢哋右手邊,只係比欄杆隔住左,太好啦,之後齊齊衝落 CP5! 真係「出門靠山友」,唔係又唔知要走幾多冤枉路!
CP5 去6係行溪澗,大會有咁嘅路線設置唔驚訝,驚訝嘅係有唔少攝影師係山澗中幫大家影相,坦白講,就算參加者一身輕行落去都覺得好困難,攝影師們你哋係點走入去架呢,敬佩!
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-16.jpg?resize=760%2C507&ssl=1)
沿途就算跌要跌得好看 攝: Charles Mak@run-pic
千辛萬苦,終於落哂溪澗,去返去石屎路。KK 見倒隔離有條河,就好興奮同我哋講:「我準備好落河跑啦,你哋O唔OK? OK就黎架啦。」但有石屎路喎,千言萬語,終於說服到 KK 打消河中漫步嘅念頭,跑返去 CP6。
終點前最後一個 Task 係玩「潑水接」。而睇手臂嘅粗幼就可以判斷倒邊兩個潑水、邊個接……
結果係……
好明顯兩位係瞄準小弟多個瞄準個杯,真係唔好得罪兄弟……我哋比其他隊用多幾倍時間浸滿杯水,兩位真係要驗一驗眼,最後運埋水就完成埋個 Task,快快腳跑去衝線。2hrs51mins完賽,比上年快得多,而且組別第八,總算對得住鄉親父老! Yeah!
然後賽後總結係:
- 比賽好精彩;
- 地圖同指南針只係裝飾品;
- 重要嘅係隊友同山友;
- 山鞋平路輕、山路實、溪澗穩;
- 三人行必有蠢豬;
- 開心就好。
![](https://i0.wp.com/fitz.hk/wp-content/uploads/2019/04/Merrell-Challenge-2019-野外不定向-重新出發-22.jpg?resize=760%2C570&ssl=1)
Merrell Momentous
等埋友隊ss,離開深水灣一齊食野,期間聽住佢哋講瘋狂做錯嘅選擇: 應平路去爆林、應山路去爬石、應大路去小路……頓時多少往事甜在心頭,上年嘅我哋何嘗又唔係咁樣呢。蓦然回首,大概最錯嘅決定做就最美好嘅回憶,汲取最寶貴嘅經驗,然後明天會更好。
2020,Merrell Challenge,再見。
#多謝Merrell
#多謝Fitz
#多謝膠隊友s
#多謝毅行教室隊
#多謝山友ssssssss
#多謝攝影師sssssss
#多謝HNR
Fitz 連結: https://fitz.hk/?p=117084
Fitz Facebook專頁
[Merrell Challenge 2018] 野外不定向 我們今年最困難的比賽
[佛系24] 佛系操山 麥徑四段
[佛系24] 七一大夜行 麥徑三、四段
Fitz Running 跑步