----- 廣告 Ad -----
我堪稱是跑界地獄黑仔王,還有幾日就是你的大日子,只要你不犯我的錯,保證你想無死無傷完走的可以完走、想PB的可以PB。
1. 搭巴士不要坐上層
我就是連X所講的三十歲仍要依賴公共交通工具的廢人。比賽前一星期,我由上層落車時遇上急煞,由樓梯碌下來。扻爆頭事少,拗柴事大。我跛下跛下去睇骨科醫生、物理治療師、跌打醫師,他們見到我腫如象腿的腳踝時,異口同聲說華陀返生都幫不到你,你下年再參加啦。
----- 廣告 Ad -----
吓! 咁我過去個一年咪鳩練囉?!
2. 有隊跟隊,無隊都唔好跟囡
第一年跑十公里,當年仍是由尖沙咀出發,路線要經西隧。起步不久,我已經被跑班同學放甩,我只好鉤其他跑手的車。係我衰鹹濕,我揀了班囡囡去鉤車。點知只要係無棍的,她們的方向感就是零的。有哂指示牌、一條路都會走錯方向的,上了天橋後,班囡囡竟然轉了去半馬條賽道。漸漸發覺越跑越唔對路,因為迎面而來的折返跑手號碼布是不同顏色的。
到發現時,我同班囡囡已經走錯了差不多兩公里,最後要勞煩在場工作人員讓我們跨過中間的分隔欄,重回往西隧的方向的跑道,前前後後多走了五公里。
到現在我仍被當年班跑友恥笑我淫賤不能移。
----- 廣告 Ad -----
3. 切勿未出發先興奮
人生第一次跑香港渣打馬拉松,打算在自己主場PB。之前一晚已經把裝備整理好,當中最重要是塞滿gel和鹽餅的flipbelt。當天約好跑團跑友一起寄行李和上線,我一見到大家就好興奮。一邊掛著吹水一邊把行李放進大膠袋中,我並不為意我把 flipbelt 都一併寄存。
到上線時,朋友問我「你啲power gel呢?」
哎也! 我X,我寄埋啲gel添。
沒補給之下,我跑得更慢,慢到係掃尾巴士就在後面追趕我。部份水站都已經開始收檔,能量飲品已經派清哂,只有清水提供。一名義工見我快要回天家見耶穌,他從檯底拿出半條朱古力給我吃。
就是靠這半條朱古力,我捱到去西隧口收費亭。但我已經全身乏力,沒有補給的話,我是沒可能打到大佬的。就在我打算放棄時,我見到坑渠邊有半條食剩的香蕉。我自我催眠條蕉有皮包著,應該是乾淨的。我就這樣啪了這半條蕉,回咗魂之後 ,PW回到維園。
4. 切勿跟車太貼
你是經驗跑手,但其他人不是。賽道上有很多馬路炸彈,他們會左穿右插、推撞批踭、胡亂切線。我曾經在跑到奧海城對開的天橋畀人撠倒,由橋頂碌到落橋底,擦損了手腳,滿身鮮血。多得好心跑友一路參扶我到西隧口前的急救站,救傷員問我係唔係畀貨櫃車撞到,你話我跌得有幾傷。他們給我包紮好後我便要上岸,記錄是DNF,自己再自行去醫院求診。
如起步時見到情況如雷霆救兵的開首廿分鐘,就要遠離。仆街的話,係無仇報的。
5. 千萬不要試新嘢
出發前一位跑友同我推薦一隻新gel,話好適合起步前啪,起機好得。真係咁神? 我問。跑友好似道友咁說我試,我抵不著誘惑啪了兩支。初時感覺良好,下肢很快有反應,霍霍聲。但鳩衝了不夠五百米,我就感到暈眩。在轉入柯士甸道時,我要走到路旁挨一挨。待我醒來時,已過了廿分鐘。之後我問跑友究竟發生什麼事,佢話:「係呀,呢隻嘢會令某些人什麼升糖指數突然飉升,產生暈眩感覺,要在起步前一兩小時食。」
----- 廣告 Ad -----
你條仆街唔早響。
6. 水不是這樣補的
大家都知道水分補充的重要,如果在比賽前的12個小時之前,你都沒有認真補充水分,絕對不要之後一次飲太多。在賽前的晚上,我決定盡可能多飲水,以確保我有充足的水分。我喝了兩支一公升寶礦力。今次仲唔掂,吃完晚飯,我就九點上床瞓覺。怎知整晚我都要起身痾尿。我可能沒有超過一個小時的無間斷睡眠,因為我打爆了我的膀胱。
同樣地,比賽前一晚一般都會心情緊張,因而影響睡眠質素,所以補眠是由星期日開始。
你已經跑了幾百、甚至幾千公里來到起跑線,餘下來的21.1或42.195公里就是你慶祝勝利的繞場一周 victory lap,放鬆心情,保持微笑完成賽事。跑得「快」固然重要,但重要不過跑得「快樂」。
終點見。
還有其他需要注意的地方,可以重溫我之前的三篇文章。