呢張，就係我東京馬拉松嘅「衝線」相，債主睇完第一個反應：「你可唔可以興奮返少少呢? 」Well，呢條問題，我唔直接答你，我用事實答你。
如無意外，呢篇會係「找數真漢子」系列嘅最終章。數找了、沉澱完、消化過，最後都係決定用最簡單直接方法寫出嚟，有共鳴的話可以俾個like，唔啱睇都希望鞭屍鞭得輕手啲，小弟真係盡咗力。
渣馬後 東馬前
自從渣馬DQ上巴士，我知道東馬再搞唔掂，個故仔會唔知點講落去，繼上次主題 #唔好死 之後，今次目標係 #跪著也要完成 (係抄HNR徐匯宗嘅)，所以點忙都跑兩次長課先出發，臨急抱佛腳就係呢啲。好多人話：「你渣馬過到西隧跑到37啦，去到東京多成個鐘，我買你一定掂嘅!」無錯，條數係咁計，但唔好忘記，7小時一定唔足 (我東馬最尾一區起步)，而且我上次21K後已經係步兵兼餓鬼，37K係行返嚟，所以點唔敢太老定。
圖: 東京馬拉松 handbook
睇東馬高度圖，起步後以落斜為主，之後就平路居多，再加啲零星上落。我知道，完走嘅關鍵應該係頭8K，只要開頭賺到，後面就夠時間燒。至於肚餓同腳軟問題，handbook 話22、27、32同38K都有嘢食，再加埋plan定瘋狂加碳，再夾定債主中途飯團support，再帶定大量gel同啪埋BCAA，咁應該萬事俱備，呢次仲唔掂!?
----- 廣告 Ad -----
不過世事嘅嘢，幾時有試過咁順利……
圖: 東京馬拉松 handbook
東馬前一日 Expo
第一次跑海外馬，無經驗即係無經驗，星期五出發，即係賽前一日先去到 Expo 攞 bib，啲人多到數唔晒，淨係排隊入場都企到腳軟，有得揀真係要早一日去 (聽聞直出直入)。辦完手續行埋攤位，對腳已經乏力，仲要 lunch 都無食，只係5點鐘食到最後半碟咖喱飯 (見同行Law少之《[東京馬拉松番外篇(一)] 食玩買 沒有比日本跑馬團認真的》)，結果返新宿酒店附近極速食多兩餐，咩都唔諗即瞓，喂，說好的 tapering 呢?
東京馬拉松 2.25
今年東馬同香港街馬同日舉行，有追post嘅，可能記得我上年街馬係14K被DQ，老老實實相隔一年，我連一場真正半馬都未完成過，而家要跑多三倍距離，係咪真係做到? 距離，我無問題 (話晒行開山行過毅行)，重點係時間。喺度要多謝特別陳伯賽前嘅《典解要跑十年(連)「拾科」東馬》，話我知有「完走Support」呢回事，成件事有晒畫面，總之見唔到佢哋我就贏。
----- 廣告 Ad -----
準備上刑場 (利申：好多人因為呢張相問我係咪化粧，無呀……)
去緊Block L (最後一組)
點知……
一去到就見到金色氣球，最後一齊上線起步
對我呢啲低端人口，當親眼見到佢哋，support 都變死神，本來想喺起點打吓卡影吓相都唔得，俾我唞下… (由Block L到起點已經用咗20分鐘)
相信，無乜人會 care 我點樣跑，由起步到21K，圖片交待 (想skip可飛去後面「找數Q&A」)：
----- 廣告 Ad -----
一出閘，馬王拉出大外檔，逢人過人……(留意後方金色氣球)
10K完成，1:22:46，唔算特別快，未見餓 (朝早食嘅5個飯團真係有啲用)
15K 淺草雷門，好想停低影相但又驚死，留意側邊好多人舉機
開始肚餓…..(去到21K，時間係3小時內)
正如前述，本身個 plan 係22K水站狂食，之後再補多個飯團應該夠晒保險，點知當我去到嘅時候，發現除咗水同寶礦力之外，係乜．都．無! (後來發現之後所有水站亦無晒嘢食) 即刻急call債主，一定要喺26K位置出現，如果唔係餓死都似，期間亦不停睇下街頭補給有無嘢食，可惜只係得糖，最後搵到包 Energy Jelly，但唔飽肚，不停跌速中……(見下圖，20K後明顯慢咗一截)
原諒我呢一段，真係無乜點影相，因為真係太餓太餓同太餓，直到攞到個飯團，先叫做回返魂。去到銀座近30K位置，本來疏落嘅跑道，忽然湧出一大堆人，回頭一睇，原來「完走Support」已到! 「Fuck……唔L係下話!?」我當時真係忍唔住爆粗，起步前諗過，如果中途見到佢哋就要死跟，但現實係，當你跑咗近30K，係唔會爆得起的。一萬個負面諗法即時出現：DQ 點交待? 跑唔完，做馬拉松巴士KOL? 最重要係，仲要找幾多次數呀!
見住啲氣球過咗我越跑越遠，萬念俱灰之際，忽然醒起一件事：渣馬 DQ 當日，我係遲咗兩分鐘去到37K，但仍然見到佢拉閘，過去呢個月成日同自己講，如果當日喺西隧條斜路爆盡，真係有機會過到的。呢一刻，可以選擇放棄，又或者搏盡一試，雖然日本人連火車早開廿秒都要道歉，但我都決定用畢生氣力爆埋佢，希望大會隻精工錶有錯，奇蹟出現……
30.1km CP係13:55拉閘
結果，我喺 13時52分52秒 跑過30K (見分段時間)，好記得好記得，過30.1K CP 嗰陣，只係得返1分鐘多少少，原來，「完走Support」唔係死神，佢哋係特登跑快啲令大家加速過關，仲喺 CP 停低同你揮手打氣! 嗰刻真係激動到大叫出嚟，不過無時間諗太多，見過鬼真係怕黑，加緊跑快兩步，所以30-35K嗰段，竟然又可以快返少少。
講到呢度，其實我真係好想點返首《皆大歡喜》，唏呀唏呀唏呀唏呵唏～ 點解? 如果你細心睇上面個表嘅 closing time，你會發現時間係越嚟越鬆 (25.7到30.1嘅4.4公里有35分鐘；30.1到34.2嘅4.1K有40分；34.2到39.8嘅5.6公里，就足足有成70分鐘)。相反，香港渣馬 cut-off，要趕西隧再趕干諾道天橋再趕馬師道，每個大概相隔4公里只得30分鐘，基本上慢腳仔係會被 chur 死的 (見下圖)。呢個安排，我唔敢話邊個好啲，但東京市區俾你封路玩足一日，的確係有空間去做到咁貼心，難怪年年完走率奇高，2018年係96.3%。
----- 廣告 Ad -----
cut-off time 呢啲嘢，真係慢腳仔先會研究同明
鏡頭一轉返返賽道，過咗34.2K checkpoint，確認埋39.8K個 cut-off 時間，知道條數應該找到了! 嗰一刻，真係又叫咗出嚟，之後就好冷靜咁，決定慢慢jog住返終點，最緊要係唔好傷，仲有時間拎部手機影相兼同台妹吹水 (仲慘被債主發現，此乃另一故事……)。
其實沿途對頭線仲見到巴士，同香港一樣都係黃色
35K後見到東京鐵塔，點可以唔影低
左邊就係傳說中嘅台妹，佢話我要去台灣跑吓日月潭馬拉松，我話：「好呀，睇下點~」
進食是日第8個飯團
終於唔使DQ
去到40K，都無Walking Dead感覺，大家就算行緊都仲都熱切趕返終點
最後直路見到攝影師，梗係跑返兩步 (真係兩步)
發揮香港人精神，衝線前都要拎住手機
終於衝線，時間係6小時21分18秒，當然係PB啦
「你可唔可以興奮返少少呢? 」Well，完走42.195公里，唔係唔興奮，只係激動過了，真心有啲攰。打俾債主，佢喊到出唔到聲，搞到我喊咗兩吓……
找數 Q&A
以下係我完走後，被人問得最多嘅問題，好明顯唔係專業答案，純分享：
1. 100K同全馬，邊樣辛苦啲?
回到最初的起點，而家我嘅答案係：「時限就是一切」，同埋究竟係咩比賽。如果你目標只為完成，用香港毅行 vs 香港渣馬的話，咁一定係毅行易啲，因為你夠時間hea夠唞夠先再起程；但如果你講緊要做超毅或者全馬sub-3，咁就係另一回事。就算我而家完走東馬，都無乜信心6小時內完成渣馬，因為路線難度完全唔同，時限亦唔一樣。3月底玩完逆走100 (時限32小時)，再update大家有無新睇法。
2. 東馬同渣馬，點比?
一句到尾：「無得比」。淨係全程跑市區，沿途不停有人打氣，甚至住二、三樓嘅都會走出露台同你吶喊，呢份體驗已經係無價。你真係會感受到，日本人對長跑運動嘅尊重，就算我呢啲包尾大軍，都唔覺得氣氛好差，真心，一世人要跑一次。(另一個要跑嘅係大阪馬，當年我去幫債主打氣，都被市區氣氛震攝咗)。
3. 找完數，你學咗乜?
除咗「堅持」同「努力」呢啲老土嘢，我學到嘅係：「唔好輕言放棄。」如果，我30K俾「完走Support」過頭後就放棄唔跑，相信最後係唔會趕得切前過CP。就算面前度門好似閂咗，只要有丁點機會都要去試，對得住自己對得住人，就算最後失敗，咪下次再嚟過囉。
4. 你仲會唔會跑步?
我好想答「唔會」，但心入面又有把聲同我講：「不如跑多隻啦!」之不過真係要跑，我想準備得好啲，磅數減多啲先，因為馬拉松係「越窮越見鬼」嘅遊戲，跑得慢，水站係無嘢食嘅! 今次完成第一步「做得到」，再跑就要「做得好」，小弟其實幾想返澳洲讀書嘅地方(布里斯本) 跑一次。
5. BCAA有無用?
呢條係出乎意料多人問嘅問題，我無專業答案，只可以話我喺渣馬21K後腳軟的問題，今次到30K後先出現。上面嗰包係 Expo 買的 BCAA 粉 (4000mg)，一般比較多人用嘅液體裝 (2000mg)，佢哋建議每10K飲一包，可以延長耐力。
6. 你真係食咗8個飯團?
係，數俾你聽：酒店早餐 (7:00) 先食3個；出門口行去起步點(8:00)，食2個；比賽中26K、36K、38K，各1個。其實債主驚我肚餓，喺26K仲俾咗本來完賽先食嘅 protein bar 我 (當然食埋)，好多人話跑緊時要食快燒到嘅食物，但我發現飯團類嘅碳水化合物，一落肚就好快燒完 (即係好快又肚餓)，反而食 protein bar 慢慢燒，會有飽肚感安落啲，睇嚟我都好難減到肥…….
7. 最後，呢條最多人問：找完數，幾時求婚?
Well，呢條問題，我係唔會答嘅，不過我可以講，呢塊東馬完走牌債主都有份，無佢毅行式 support，我好肯定完成唔到，咁樣，係咪叫答咗?
真係最後最後，要多謝所有關心我呢個「找數真漢子」系列嘅朋友 (不能盡錄)，我真係想像唔到，竟然有咁多人喺渣馬同東馬比賽日，睇住我呢個慢腳仔嘅 live track；更想像唔到嘅係，有人因為我東馬完走，決定放工跑一次42K返屋企 (經已完成)；我諗，如果有人因為呢個找數系列而開始跑步，都算叫做成功啩。
下次再見!
更多：
Fitz Facebook專頁
[找數真漢子] 低端人口 渣打馬拉松37K DQ全紀錄
[找數真漢子] 抽水抽著火水 抽籤抽中東馬
[找數真漢子] 零操練PB完走10K馬拉松
[找數真漢子] 馬拉松之旅 由街馬DQ開始
Eric@Fitz
Fitz Running 跑步
