「從此你要聽教聽話，叫你煮麵你煮麵，叫你揼骨你揼骨，同場跑唔准快過我。」實情係….? (彩蛋找答案)
2016年里約奧運，睇電視知道有個叫姚潔貞的女跑手代表香港跑馬拉松，睇左好耐煮埋個餐蛋麵個畫面都冇乜變化，anyway有香港人能擠身這項目已經好難得。傳媒挖埋後面嘅男人出台前，好似叫乜嘢家豪，渣馬無論10K、半馬、全馬，他與潔貞都是獎台常客，差不多每年都出現在新聞報導。聽講係呢個男人叫個老婆裸辭走去預備奧運，咁大埔不容嘅事佢都做得出。
在奧運馬拉松佔一席位，要把事業、家庭、青春都押上，未夠，還要追加一個肯放下自己的男人
2018年睇新聞話佢哋生左個B，潔貞入番體院準備戰東京奧運，後來又唔知點解去唔成。有一年我參加猛龍越野跑，竟然又係你呀陳生，他們做活動大使，越野跑又關他們事。2021年潔貞不再做護士轉行去做保險，心諗，做保險? 翌年已成為百萬圓桌 (MDRT)一份子。
----- 廣告 Ad -----
2022年又有報導話潔貞退役了，2023年生多個細女。家豪同潔貞自出道以來，他們事業的高山低谷，人生階段，從在迪士尼樂園秘密求婚，到買樓生B…..等等大中加細碼事，都在高度透明的媒體和社交平台下度過。(約家豪做訪問，他說乜嘢都講過晒，仲冇乜價值做? 唉，又唔洗咁坦白嘅。)
成為了 icon，難得他們還保留一份赤子之心和純真 (家豪講到興奮時還會捉著我的手臂，說：阿孫你知唔知…..)，散發對跑的火紅熱血，對年青人的關懷傳承，對愛侶的互相守望。家豪妹係超暖男，勁正向，仲時不時整古做怪搞爛gag，故意惹毛陳太，與在賽場博殺一臉嚴肅的貞哥是塵世間絕配。在低智扭曲的世界，他們是一道清涼甘甜的清泉。
或許浪漫只是愛情的 cream，相互守望、扶持、包容才是愛情的 core，他們有強大的 core
今次訪問表面是回顧他們在運動之路的得與失，探討下香港長跑界的發展和樽頸，查實最想知係暖男同烈女點相處? 陳瑤黐邊個多啲? 點解潔貞撈保險撈得咁掂? 家豪有乜打擊突然留長頭髮…..呢啲膚淺嘢 (咁你想唔想知先)，符合番文章一貫風格。
約了上堂前在深水埗運動訪問，selfie 時家豪問手機係唔係有美顏，我話邊有，佢信以為真
少年潔貞露鋒芒
「我中學讀德望，開始玩長跑 (800和1500)，跟葉啟德教練。高考期間要讀書，速度停滯不前，掙扎過好唔好繼續跑。不過自己身為師姐，感覺有責任去跑，要做好榜樣。」少年潔貞已具備做大佬/大家姐嘅責任感。
德望的歲月，攞獎是日常
----- 廣告 Ad -----
「德望同 DGS 經常係學界體育併過你死我活，你果時贏唔贏到佢哋?」最鍾意聽名校嘅恩怨情仇。
「長跑同擲項通常德望會佔優，但短跑、接力係 DGS 攞分項目。除了year 1之外，我都跑贏佢哋。」OKOK，下次訪問番個 DGS 跑手。
「後來憑精英運動員計劃入了中大的護理學系，之後開始係800、1500、10K、半馬都攞第一，有信心跑落去。後來家豪做左我教練，發覺佢個模式好適合自己。」終於到家豪出場。
成就傳奇
家豪見潔貞骨格精奇，有實力又有鬥心，好大膽提出以參加奧運馬拉松為目標。潔貞那時從未跑過馬，心諗又唔係你去跑，會唔會玩大左? 那時體院的總教練 Anthony 和自薦來港的日本教練村尾慎悅也鼓勵她去嘗試，潔貞素來是聽話寶寶，於是下決心去馬。不過決心兩個字不是用 keyboard 打出來，是用行動去體驗的。
「要全時間投入練習，我要辭去護士的工作，幸好做左3年，算有少少積蓄可以捱過。經過一年訓練，2015年終於可以達標 (2016年里約奧運馬拉松門檻是2小時38分)。」潔貞是第四位香港女子奧運馬拉松選手 (男子席位仍然懸空)，之前三位是陳敏儀、伍禮珠、和日藉的長谷川遊子 (長谷是位空姐，1984年代表香港參加洛杉磯奧運馬拉松，2021年她70歲高齡，仍以3:29:01破了英國該年齡組別的紀錄，成就另一傳奇。)
2016年，陳敏儀 (中)、長谷川遊子(右) 及姚潔貞，三代香港馬拉松選手，成就三個傳奇
里約奧運潔貞以2:36:11完賽，157名選手中排39，實現了奧運夢。潔貞決定要先回歸家庭，她和家豪渴望孕育下一代，好不幸2017年小產，但他們繼續努力，2018年終於把陳瑤帶來世上。潔貞知道選擇了家庭和小朋友，要思考是否從此與跑步分道揚鑣?
感覺到心中的一團火仍有溫度，她決定衝擊2020年的東京奧運 (應該都係家豪在旁煽風點火)，但門檻已大幅提高至2小時29分半。近乎不可能任務，但奧運馬拉松留有另一扇外咭之窗，憑認可賽事的排名和積分可獲取外咭名額，即要與全地球人類競爭，唯有勤力參賽，爭取佳績。
產後翌年2019參加澳洲黃金海岸馬拉松，她以2:34:07打破了陳敏儀 (2004) 所創的紀錄，能力和信心都回來了。東奧因疫情延至2021年，報名參加馬拉松之截標日期是2021年5月31日。早前因腳傷錯過了極可能賺取分數的亞洲錦標賽，之後的哥根哈根馬拉松又因疫情取消。
日本教練村尾慎悅 (左) 與家豪是潔貞兩位最重要教練，協助她破了香港塵封15年的紀錄
5月中的米蘭馬拉松是取得入場券的最後機會，是場決定究竟去「東京跑馬」定去「東京街跑馬」的賽事。結果米蘭馬潔貞以 2:31:24 刷新香港紀錄，但與東京奧運仍有2分之遙，這麼近，那麼遠，就欠一點點，但這一點點，卻很遠。
----- 廣告 Ad -----
疫情嚴峻，出征米蘭馬拉松，父女戴住口罩來送機，不能隨行，只能送上惦念和祝福
急掟彎再起風雲
2021年潔貞做了個人生大飄移甩晒尾掟彎，她不再做白衣天使轉行做保險。另一個急彎是2022年世界田徑錦標賽後 (2:43:03，排名29)，飽受傷患影響的潔貞，稱這是她的告別賽，潔貞收山? 敢唔敢發誓先? 她很早前已想增添小朋友，二女於2023年登場。跑原是中心風眼，後期轉為家庭。
好cute的細女，陳家產能過剩? 當然不，香港好歡迎
「做護士好綑身，又要返 shift，好難兼顧跑步，想搵一份有彈性時間的工作。我同家豪都係運動界，但遇上疫情雙雙陷入困局。今日雖然好番，但唔知他朝會有什麼新疫情。如果大家在不同界別工作安全感會大些。」這種防禦式夫妻分工概念新鮮、進取、貼地。
「我相信保險確是個保障，有朋友邀請我加入，我哋成條 team 都係同一信仰，我對佢哋好有信心，知道唔會做唔啱嘅事。亦明白別人對保險業有唔同嘅睇法。」
「你在訪問中說過自己以前內向自卑，又冇乜自信心，好似同sell保險唔多夾?」
「我做開護士，清楚醫療運作程序、住院陪診等安排，相信我有優勢。雖然口才不是我的強項，但同客解釋會有說服力。」仲話講嘢唔叻?
「我而家再唔係一日有幾個 appointment 嘅時期，我要進取，要開口去問。做保險同運動相近的地方是經歷失敗，起初好多人會 quit，俾人 reject 得多好 hurt，但係運動幫我好快適應，識得盡快放低挫折。」
「我成日覺得自己唔係好叻，冇乜自信，可能係阿媽經常將我哋同人比較。但當我有少少進步時，我就好容易開心滿足，所以令自己可以持之以恆。」又想不到缺乏自信嘅人會有這樣的心理優勢。
上電視做埋奧運評述員，再唔可以話講嘢唔叻
跑步之餘，家豪和潔貞默默做很多回饋社會的工作。例如幫「猛龍越野跑」做活動大使和任「猛龍長跑隊」教練，協助視障和聽障人士參與長跑，推廣傷健共融。「我講嘢唔叻，做唔到社工，但幫到人好開心，呢個都係我做護士嘅初心。」
他們也是「凝動香港體育基金」的體育大使 (自2015)，幫基層青年參與跑步，「我哋會幫佢哋物色贊助商，除左衫褲鞋襪等裝備，都會開口問贊助佢哋外出集訓和比賽。我哋會自己俾少少津貼有需要嘅小朋友，起碼夠搭車食飯。」跑道，因他們有溫度。
----- 廣告 Ad -----
樂家小店，大廚思維
由他們創立了12年「樂家跑會」近年戰績彪炳，2023港珠澳半馬暨東亞半馬錦標賽由樂家跑會包攬全部5名香港代表，包括家豪、張耀樑、莊司暘、湯樂榆和曾曉彤。其中張耀樑在2023年的渣馬，更以素人身份的2:26:06跑入三甲，緊隨紀嘉文和黃尹雋之後。莊司暘第四，時間2:27:46。大家都感到樂家這股勢力在跑壇蠢蠢欲動。
樂家12周年聚餐，場面墟冚，中間當然是掌門人和師母，右前方是他們的密友兼教練粱影雪
「培養精英運動員是樂家其中一個方向，但家豪唔會出去挖角猛人，都係隨緣加入。」張耀樑都是主動 PM 家豪，希望加入樂家。
張耀樑(中)平日要通宵工作，與莊司暘(左) 是親密戰友，是樂家的A**產品 （葉詩敏攝）
此時家豪剛接載完大女去學游水，趕過來深水埗會合我們。從遠方看見他走過來看台，高挑身形，長髮隨風飄揚，慢鏡轉身，成個美少女戰士咁如果從後面睇嘅話。
「樂家冇贊助，小店經營，唔係譚仔唔係大家樂，我哋想全部同學和教練都係由樂家生產。我哋出過十六、七個港隊，算係一個紀錄。呢個係錦上添花，我重視嘅並唔係要出到精英嘅跑手，我最開心係教一些開始時是慢腳，但能夠keep住努力，獲得到好大進步嘅學員。」
「有句說話我好深刻，大意係偉大嘅教練唔係訓練出冠軍，而係能夠令你成長、堅持、進步，甚至改變自己嘅人生。」
2024渣馬，樂家一共有24位萬金先生小姐，變成「富貴」跑會
「黃芷銦是個令人動容的例子，佢起初來到經常包尾而回，因為跟唔到大隊，甚至要出去吐露港公路搵佢返嚟。但經過3、4年操練，全馬已可以做到2:41 (2019年柏林馬拉松)。那些加入跑會時已是快腳的，佢哋攞到好成績似是預左，唔係太關教練事。」估不到反而慢腳俾到教練刷存在感，怪不之教練對我都算客客氣氣。
2024 渣馬，黃芷銦雖因傷跑不出理想時間，但家豪仍為這位樂家高足感到自豪。（楊宇翹攝）
家豪說隨住跑班不斷擴展 (樂家現時有六班)，而家建立緊第二梯隊，希望可以俾有潛能嘅同學有出路和參與教練工作。
「運動嘅趨勢，係科技所佔比重會越來越大，好多智能儀器可以量度表現，分析跑手能力，好似龍珠咁睇到一個人嘅戰鬥力。欣賞好多同學都能夠自己上網學習、搵資訊。而所以教練一定要與時並進，否則好快會 out。」不過家豪同意科技不能取代教練，教練有感染力，有激勵，會係終點接放學，來個擁抱，或恭賀或安慰，「機器」一定取代不了「人氣」。
從窮L到跑L
「我同潔貞都係草根家庭長大，好窮，阿爸接近40歲至生我，後來失業冇嘢做。我畢業之後想做全職運動員，有日係街跑緊步，竟然見到阿媽係度剪草，佢係做園藝，見到佢咁辛苦，我就係度跑步，內心好掙扎。跑步搵唔到錢，幫唔到屋企手。阿爸冇嘢做，細佬未讀完書，阿媽要出嚟做嘢。所以我要搵兼職，唔可以依賴屋企。」
少年家豪 (15歲) 斯文靚仔，估唔到大過左…..仲跑得好快添
「我係大福證券做過辦公室助理，去廁所換廁紙上螺絲，推住啲招股書四圍去，撞到以前荃灣田徑會嘅張志華教練，佢係我恩師，資助過我去海外集訓。佢見到我呢個情景好心酸，因為我果時跑步成績係上緊。」但貧窮沒有耽誤了這位年青跑手。
「中學畢業係皇后碼頭做接船，幫遊客登記去南丫島食海鮮。果時潔貞係旁邊溫書，佢考緊A Level，趁架船走左我哋有幾個字時間傾下偈 (浪漫到)。接埋10點幾尾班船，跟住返屋企練跑，跑到12點1點。後來我考到救生員，時薪有4、50蚊，一日做十幾個鐘，一個暑假儲到幾萬蚊，開學之後就唔洗再問屋企攞錢。」恭喜成功脫貧，對年青人來說，貧窮可能才是肥沃土壤。
「教練叫我去比賽，我搏命跑，贏到獎品，有時有獎金，攞番屋企阿爸見到好開心，有親戚朋友打電話嚟，話係電視見到你個仔，成家的氣氛好好多。」
兩個家庭，雖然不富裕，卻培養出兩位傑出和影響別人生命的運動員
「考左個教練牌之後轉做教練，人工高左時間穩定啲。後來透過運動員計劃入左浸大，跟住考埋個教師牌，其實我可以疊埋心水去做老師，入職都有4萬幾，唔洗升職都可以去到6、7萬月薪。但教書要處理好多文書工作，時間又長，我知唔啱自己，所以堅持去跑。」這是個窮L到跑L的故事，看見唔認命、看見奮鬥、看見成長、看見親情、看見一團有溫度的不滅之火。
霉友拍拖，成就更多浪漫時刻
跑道再見 vs 回家湊B
「轉左全職運動員之後，想跑到個人最好成績，跟住收山 (咁快?)，跟住成家立室生仔。好不幸2013-15年受傷患所困。我2016年開始練番。」在潔貞跑完奧運之後，家豪躊躇滿志復出。
2019「港島10公里賽」，家豪再踏10公里賽場，身旁是比他年輕23年的黃尹雋，剛以30分51秒破了塵封15年的香港紀錄，兩代路跑王同場相爭是全場焦點所在。結果黃平香港紀錄勝出，僅以6秒快過家豪衝線，但家豪卻做出30分51秒的PB，令人眼前一亮。其後於2020年初的10000米(31:08)、2020年11月的5000米(14:58)亦先後PB。那時的狀態像升降機一路上緊。
一場年代大戰，35歲一路緊迫23歲，年齡絕不是放棄的藉口（潘思維攝）
2021年另一場世紀之戰，是渣馬家豪與紀嘉文同場鬥半馬，二人同齡，他們在渣馬撕殺多年。今次更鬥至衝線前一刻，兩人索性攜手過終點(1:08:55)，跑出溫度。
家豪與紀嘉文攜手衝線奪冠，兩位「老將」仍然叱吒江湖。攝: 高詩琦
「我果時可說狀態巔峰，我好肯定可以再創半馬和全馬的PB，可惜遇上社會運動和世紀疫情，所有事情都停了下來。就好似爬珠峰到了一半，但突然碌返落山腳。」家豪係度扮喊，睇得出係真感情。
2022到日本與大迫傑交流學習，令全港遍地葡萄
「仲有冇機會風雲再起，參加番大型賽事或者追PB?」
「唔會啦，近年呢度痛果度痛，成日要睇住醫生做 body check，唔知關唔關打防疫針事，令到炎症走晒出嚟，冇心機跑。我要保重身體，要走得郁去追阿女。」
「咁未來有乜嘢目標?」
「我想佢試多次…..」家豪望住已坐開了一段距離的潔貞，但我有點摸不著頭腦試多次什麼? 追多個小朋友咁熱鬧?
「我好想潔貞嘗試多次追2028年的洛杉磯奧運，因為1984年的洛杉磯奧運(舉行了第一屆女子馬拉松比賽)，有首位香港跑手 (伍麗珠) 參加奧運馬拉松，好希望40年後在同一地點，再有香港女跑手落場。」
「如果用時間達奧運標是遙不可及，但可以用外咭計排名這條隊。估計如果有100個參賽名額會有些機會，若像今屆只有80個的話則機會微。」大家都唔明咁大條賽道為什麼不能擴大名額。
潔貞在旁扮碌手機，其實聽住晒:「你又講呢啲。佢好暗暗尋尋，成日都恨鐵不成鋼咁。自己話退役，就迫我去跑。好難嘅，我傷左半月板好耐。」潔貞比想像中反應溫和，似乎又唔係完全冇機會，加油呀，我叫家豪。
一場不完美但圓滿的賽事
2023年於港珠澳大橋舉行的首屆「東亞半馬錦標賽」，是家豪自10年前 (2013)之後，再有機會代表隊出戰，他說應該是99%最後一次 (當田總職員打電話找他時，他還以為是行騙電話)。更難得是其餘四位港隊成員都是樂家跑會的同學，橫跨三代跑手。家豪說這是場有今生無來世的賽事，完賽時間雖不完美但卻圓滿謝幕。
「我又想喊啦阿孫。」OKOK，膊頭係呢度。
家豪與跑會學生一起代表港隊出戰，異常激動，這是最美麗圓滿的謝幕戰
家豪係FB講番一個賽事小彩蛋，「後段一路失速，最後追返起步跌倒受傷的魏賡，一齊跑返終點。仲差啲比貞哥追上黎，有一刻諗過不如一齊同貞哥衝線，由佢陪我完成香港隊使命應該最好不過，但係今次我係香港隊，如果我咁樣做嘅話呢真係比人鬧，唔好諗啦，有魏賡都好呀頂住先啦。」好彩家豪冇放軟手腳，否則當晚一定要跪 keyboard。
彩蛋 – 愛回陳家
「你哋兩個同小朋友相處時，邊個做白臉邊個做黑臉?」答案呼之欲出。
「梗係家豪做白臉，佢成日都嘻皮笑臉。」潔貞說來有些少唔憤氣。
疫情期間，潔貞入住體院準備東京奧運，但要被隔離不能回家，家豪晚上帶住瑤瑤到體完隔住鐵絲網見潔貞，瑤瑤還鬧著不肯走，呢一幕真係睇到吹沙入眼。
家豪在旁 google translate:「我要出去，即係我要入去。」
記得參加過他們主講的運動講座，家豪搞鬼搞馬，帶來知識和歡笑。但他經常都要喵下潔貞，看看她是否認同，好似好畏妻咁。但上次訪問梁影雪，她說他們在家不是這個景況，咁得意? 真係要搵「東張」關注下。
「家豪，其實真相係點?」
「如果帶埋阿女嚟你就知道真相係點。其實係運動場潔貞好聽話，好有執行能力，講乜嘢都會盡做。」潔貞明顯是模範生。
「一離開球場就貓仔變老虎，唔係 (哈哈哈哈)。其實返到屋企佢係好照顧我，叫佢幫我煮個麵，佢好甘心做呢啲嘢。叫佢幫我鍊下隻腳，佢又OK喎，從未試過叫我自己搞。」家豪，上天總算待你不薄。
果然係家務女王，上天真的待家豪不薄
「潔貞確係好好嘅賢內助。」家豪交一個感動眼神。「佢係容易發脾氣，但係爆完好快就冇嘢。有情緒唔發出嚟至得人驚。」就算係咁，你都唔好成日引爆潔貞。
「家豪點解你突然留長頭髮? 係唔係風水嘢?」
「真係有人咁講，佢囉，佢話你十幾年都係咁嘅髮型，轉下得唔得好悶呀?」唔好講到自己是苦主。
「咁你like唔like先?」
「佢好like，我阿媽都like，我OK。」呢兩個女人都like，你有得唔OK咩!
跟住家豪打開手機，展示他剛剪髮的video，證明他樂在其中。(小朋友注意，影片含驚嚇鏡頭，要有家長指引)
跟住家豪俾左好多當年佢同潔貞四圍去嘅相我睇，去奧運、去北極，好sweet。
「我哋一齊跑過學界，佢眼尾都唔囌我。真係命運安排，安排左潔貞，果時我冇諗過我會俾女追。」跟住兩個臭男人笑到成個看台震天。
陳家，充滿愛和歡笑!
