[里約奧運] 男女子馬拉松賽道大拆解

Fitz 編輯部 2016-08-10

奧運開幕前大會搵咗十幾名巴西跑手試過呢條賽道，95%測試者完賽，大會話對賽道非常滿意。

香港時間8月14日下午8點半，我哋嘅代表姚潔貞就會出戰奧運女子馬拉松。唔少跑友已經搵緊睇直播嘅方法，既然TVB播唔播大家都估唔到，不如研究下條賽道先。

賽道嘅資料，奧運官網欠奉，佢哋只係有份觀賽資料（Spectator Guide）俾大家參考，好彩外國有熱心網友，就用虛擬地圖技術畫咗幅超詳細嘅路線圖：

----- 廣告 Ad -----

路線由森巴廣場運動場（SAMBÓDROMO）出發，跑5公里到海邊，然後沿海邊一條長約10公里嘅路跑3圈，大概30公里。最後跑番7.2公里返運動場衝線。

此外，佢哋仲計到呢條賽道一共有25個彎，當中包括5個180度髮夾彎。咁算唔算多彎呢？佢哋就話之前有統計過其他馬拉松賽事，多過90度嘅彎，柏林有17個，芝加哥有31個，波士頓就只係得3個。

來源：IAAF.org (按圖放大)

至於坡幅問題，最初呢班電腦怪傑睇衛星圖，發覺坡幅超大！但細心睇實景圖，發覺出現極大偏差，估計係里約多山、多高樓有關。最後佢哋發現，呢條奧運馬拉松賽道，可以用六個字形容：

平坦！平坦！平坦！

咁係咪代表易跑，姚潔貞有望破香港紀錄呢？當然唔係啦！因為里約熱內盧嘅天氣不能忽視：

馬拉松要沿里約嘅海邊跑成30公里

----- 廣告 Ad -----

其實潔貞亦已針對賽場嘅情況，專登去到紐西蘭進行最後集訓，希望佢會有好表現！

我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。