[marathon du médoc] 法國梅鐸紅酒馬拉松 飲住跑全馬

擺晒啲紅酒出嚟，跑手飲清水定飲酒？

更新: 6-8-2017 衛生署、影片

古語有云：「酒精害人，開車前咪飲」。咁跑步呢? 香港衛生署就意見多多，大意話酒精同運動「兩個只能活一個」，叫大家做運動就唔好飲酒!

不過，對於喜嚐杯中物嘅西方人嚟講，跑住嚟飲，或者飲住嚟跑，係絕對無問題! 其中，喺法國紅酒之鄉舉辦嘅梅驛馬拉松 (marathon du médoc)，既唔會有衛生部官員指指點點，醫生亦絕對唔會嘰嘰兀兀！

睇下上面個馬拉松吉祥物，就知道呢隻馬仔唔單止要你跑，仲要你飲! 梅驛係法國著名釀酒區，在波爾多地區內。呢個馬拉松要經過五十幾座酒莊，而且全程20幾個補給站，供應嘅唔單止清水同運動飲品，仲有紅酒白酒，跑手真係可以嘆住紅酒跑馬仔!

有人統計過，每個補給站飲細半杯紅酒，跑畢全程就會飲足三大支! 而且每年有10%嘅參賽者係因為飲醉酒而上巴士，真係酒量淺啲都唔好參賽!

馬拉松路線穿越五十幾座酒莊

跑完仲唔喪飲咩？

仲有，上佢哋個官網，你未必搵到「跑手須知」，但一眼就會見到佢哋介紹餐廳同酒莊，令人覺得所謂馬拉松比賽，其實只係一個開開心心活動，大家又何需太認真?