[專訪泳衣男] 我想喚醒大眾

4月24日，我們在Facebook專頁上載了這張照片，不少人議論紛紛。

相中人，叫做謝允健。

見相片帶來極大回響，我們隨即聯絡謝師兄，大概一星期後，他終於同意接受我們訪問。

(我：筆者；謝：謝允健)

我：點解你要咁著呢？

謝：我舊年參加為食跑，跑4公里。當時有個「最突出造型獎」，我攞到獎。於是之後嘅糖尿健康長跑、曲奇跑、香港街馬，同埋上次嘅猛龍慈善跑，都係用呢個打扮出賽。

我：即係話，你純綷係因為要引人注意先咁著？

謝：其實我係想喚醒大家對殘疾運動員嘅關注。

我：吓？！咩殘疾運動員？

謝：呢兩位係韻律泳運動員Vanessa Sahinovic同埋撐杆跳運動員Kira Grunberg。佢哋兩個因為意外而唔能夠企返起身……

我：(心諗) 邊鬼個嚟架？ (仍然保持禮貌) 係呀？原來你咁有心嘅！呀，有網友想知呢，你一共有幾多套泳衣呢？

謝：嗰啲係三項鐵人嘅服飾嚟架。

我：(心諗) 三鐵咁著嘅咩…… (繼續問) 咁樣呢，你喺我哋個fanpage留言話，唔會再咁著喎，係咪真嘅先？

謝：係架。而家我都成功引到人注意，我之後都會收歛一下嘅。

我：咁你練咗跑幾耐？

謝：我20歲跑過一次渣馬，不過直到舊年先開始多啲參加比賽。平日只不過係得閒出街練下跑咋……

以上就係整個訪問裏，最重要一部份對話。

謝兄以上圖嘅打扮奪得為食跑最佳造型獎。

----- 廣告 Ad -----

筆者唔打算去評價謝師兄嘅打扮，只係覺得既然有人比賽扮比卡超，著水手裝，咁點解男人著件「疑似」女裝泳衣，就要去取笑？

而且，師兄咁嘅打扮，原來係為咗叫人關注兩位香港人唔係太熟悉嘅運動員 (雖然真心唔明同著三鐵衫有咩關係)，加上從佢以參加慈善比賽為主嘅情況，可以了解到，謝師兄確實係一位熱血心腸嘅人。

最後，我在此向謝允健師兄致以衷心道歉。我上個月睇到嗰張相嘅第一個反應，亦有取笑一番。而經過呢次訪問，又提醒我，凡事不能單看表面。當一個人拒絕去了解其他人想法，其實先係值得取笑嘅行為。

唔少馬拉松都有人會Cosplay，其實有乜出奇？

部份圖片由被訪者提供

補白：Vanessa Sahinovic及Kira Grunberg

Vanessa Sahinovic，奧地利韻律泳運動員，2015年喺阿塞拜疆嘅比賽期間遇到車禍。意外中有三人受傷，其中Vanessa Sahinovic情況嚴重，至今仍不能行走。

Vanessa Sahinovic (左)

Kira Grunberg，奧地利撐杆跳運動員。2015年於北京比賽時，在練習期間發生意外，雙腳癱瘓。

Kira Grunberg

Kira受傷一刻短片

https://youtu.be/1_5lmklYJj4

為兩位運動員籌款的網站：I Believe in You (奧地利文)

更多：
Fitz.hk Facebook專頁
本季最後一次搏老命
[永不言敗] 愛爾蘭大學生爆seed追到尾
Fitz Running 跑步