(編按：因遷就篇幅，本文將作者原文兩集合併發表。）
尚有一星期就到大阪馬拉松比賽了，5個月的經歷，從新打做了我，身心已經準備好，大阪馬關門時間是7小時，不再執著時間，按目前情況是可以完成的。但，世事真的會這樣順利嗎?
就在出發前一個星期，在家中換天花燈膽時，一時失足從高處掉下來…倒在地上足足有5分鐘不能動，之後檢查傷勢，幸好雙腳無事，只是左手整條手臂撞瘀，左邊盤骨有小許痛…出發前試跑過幾十米，擺手時仍會痛，盤骨位置痛楚減少了，手臂瘀傷位置已變成紫黑色。
還可以完賽嗎?
《我的馬拉松—大阪篇》
到達咗目的地-大阪，安頓好之後，就出發EXPO領取號碼布，現場雖然好多人，但秩序好好，分流好快。
----- 廣告 Ad -----
終於領取第一張馬拉松號碼布，在會場中走走，有很多紀念產品，影相打氣位。場中有一個比較特別，是一個時鐘計時器，可以按各參賽者提供的目標時間設定，然後拍照留念。我應該用什麼時間作為目標？
4’59’59
或者，這個時間對於一些師兄師姐們，覺得太慢了。
或者，在我這個情況下，完賽就好了，還求什麼時間。
但我仍然希望在目前情況下，完賽之餘，亦可以給自己有一個追求的目標。
----- 廣告 Ad -----
賽前狀況：
賽前一星期，跌傷整隻左手，出發前仍未消腫去瘀，仲係痛。因為緊張關係，由24號到比賽當日，已經腸胃不適，沒有開大了…超擔心比賽中會出現一位外國跑手的情況(比賽途中肚瀉)…
而25號晚，亦因為緊張，過咗24:00先瞓，但26號04:00已經起床，換好衫褲，檢查所需物品（藥水膠布/帽/4包power gel/即棄雨衣)，去到會場07:00（09:00開跑）。
放完行李包，在場內拉吓筋，做d熱身運動，慢跑一會準備開跑，開跑前30分鐘，先自隊一包gel。由於我N區，所以大約0920先到起跑點，當跨過的一刻，感覺到自己已經是一位馬拉松選手(誇張咗小小)。
賽前策略：
1. 以7分速開跑，盡量保持心率145～155之間，keep住去到21K。
2. 如果順利完成第一項，之後再睇情況…
一開始可以保持住以7分速，心率151(85%)。
由跨過起跑線到2K左右，發現身邊一切好唔真實，好夢幻。
會問自己：
「點解我會係呢度跑步嘅？」
不過，當投入咗賽事當中，之前的疑惑已經沒有再出現了。
頭10K安全渡過，去到13K時，發現手錶距離，同大會顯示嘅距離，小咗幾百米，咁我第一次參加賽事，諗住小小誤差一定會有，但手錶去到21K時，大會只是20K？
或者我重申一次，我第一次參加跑步賽事，唔知算唔算正常，如果我有錯請大家多多包涵。
----- 廣告 Ad -----
當時心諗：
「死啦！咁咪要跑多1K？即係要跑43.195？」
算！豪比佢。
21K（手錶距離）再食第二包gel 。
過咗21K（大會距離），仍然可以貼住7分速跑，體力無明顯下降，手臂、腳、腰沒有不適，決定繼續以7分速再跑多段。
自己練習時最多跑到23K左右，但當日由於要留意步速，同欣賞四週風景及各參賽者的裝扮，跑過咗自己最長距離都無為意。
當日大阪天氣—暴曬！天氣預報當日是12~18度，間中有雨，但比賽當日氣溫高達26度，大晴天，無雨。
所以沿途每個水站、補給站都無放過，亦由於多日腸胃不適的關係，肚脹脹跑得唔舒服，而沿途各個廁所排長龍，有d仲距離賽道1.4K…
到了28K（手錶距離）發現有廁所只有兩個人排隊，所以去了第一次。之後再跑，到咗前輩們號稱「魔鬼之30K」（大會距離），發現膝蓋對上肌肉酸痛，好似提唔起腳，心入面真係有把聲音同你講：
「唔得㗎！跑唔到落去㗎！再跑一定斷腳呀！」
「你都係放棄啦！唔好搞咁多嘢！」
難度是撞牆？步速開始放慢了…雙腳提唔起勁…此時，諗起之前跑友建議的高步頻跑法，好！我要再密d腳先得。
同自己講：
----- 廣告 Ad -----
「依家每跑一步，都係我個人最長距離。」
就這樣不停同自己對話。
之後，神奇地膝蓋對上肌肉無再痛了。差不多去到大會距離32K時，見廁所無人排隊，再去多次。
回到賽道自己計計數：
42.195-32，「即係仲有10K啫」，就當自己訓練時唔夠瞓，作感冒時的狀態，跑10K就可以完賽了。
人，往往就是如此大意了。在35K時（大約仲有7K左右），明明每1K都有指示牌，點解跑極都唔見有？唔通我掛住影相睇唔到？在最後的幾K賽段，感覺比跑半馬更難過，到底如何跑過去？根據大會公佈，沿途應援人數達1,300,000人….
就是有一眾大阪市民及志願工作者，沿途上幾乎站滿人群，不停地為參賽者打氣：
「奸爸爹！奸爸爹！」
以及伸出熱情之手同參賽者擊掌！
就算我幾攰，每當見到長者、小孩、傷殘人士，伸出熱情之手，我都會逐一擊掌回應。
另外，除了大會補給站之外，亦有市民、商舖自發作出補給，補給物資有鹽巴、朱古力、麵包、糖之外，亦有車行用水喉灑水幫參賽者降溫，甚至有市民提供舒援肌肉噴劑。但當中有兩個畫面最令我感動：
一位年紀老邁的婆婆，雙手拿著小小不銹鋼水壼，為參賽者補給水，沒有杯子，我們雙手合著作碗狀，婆婆就這樣為我們打氣補給⋯
在3xK時，有一名西裝男子，腳邊仲有個公事包，他帶咗幾支1.25公升可樂，用小紙杯為參賽者補給。
就係以上種種嘅支援，可以令我可以繼續跑落去。去到大會指牌顯示仲有2K時，我突然間諗，5個月嘅訓練過程，傷過、痛過、錯過，到呢一刻終點就喺眼前，好感動。前方視線已經開始模糊了，眼淚就快要不爭氣的落下時，突然發現前面有攝影師！
唔得！要忍住呀！
即時對住鏡頭，昂起頭，雙手指向天空…
跑著跑著，前方有一塊橫置天橋的上的告示牌，寫上尚有220m！
終於…終於到了！
由第一日訓練開始，我已經幻想過無數次，到底我應該用咩姿勢衝過終點，到最後，我只是輕輕舉起雙手，緊扼著拳頭，用最大力量大喝一聲！
大會時間：
5’06’52
賽後有跑友話：
「如果你去小一次廁所，影少d相，你首馬有機會sub5。」
但我自己覺得，就係因為首馬，而且還要在外地，機會難逢。
更加需要細心欣賞及享受過程。
**最後手錶距離：43.5K (我當自己跑咗超馬，超過馬拉松的距離）
You’ll never run alone
有好多人都會認為，跑步是件好個人的運動，每次都只是自已一個跑。但，在跑嘅過程中，你會遇到各種唔同嘅人與事:
在一個跑步嘅清晨，遇見影日出的年青攝影愛好者(Louis Li)，冒昧上次提出，可否幫我影相以作紀念。又在一個跑步嘅早上，遇到幾名跑友，上前問可唔可以泊住一齊跑，大家一齊跑咗一段…
之後24號機場出發時，竟然又再見面，原來佢地都係跑大阪馬，依家我已經加入佢地群組，繼續保持聯絡。
（全文完）
