上上星期跑完個渣馬，我諗大部份跑友心情放鬆咗一大截。 我唔敢放得太鬆，因為今個星期日仲有街馬。
報名時本來諗「捱到個全馬，冇理由半馬唔得嘅。」不過依家諗諗下，都成個幾禮拜冇練長課架喎，都係準備番好啲先得。
而最好嘅準備，又點少得食carbs 呢？呵呵。
由舊年年中訓練開始，已經不停有唔同人同我講，練習前最緊要食多啲碳水化合物，即係俗稱「加碳」或者「食carbs」。尤其是比賽前幾日，要狂食carbs儲定啲唔知咩糖喺身體備用（好似係咁，有錯嘅話勞煩各位更正）。嘩，食野已經係我強項，仲要狂食carbs之後唔駛驚増磅，直頭興奮過去Cova食brunch buffet 啦！
所以，每次weekend長課，我都會食飯團做早餐。方便嘛，一早叮一叮就可以食，唔通晨咁早煲飯咩？同埋唔知點解，日本米同其他米有啲唔同，食完之後真係好跑啲咁。不過，喺香港好食而又方便買到嘅飯團真係唔多。以我黎講，最方便就係星期五放工時去公司附近嘅華御結買定兩至三個飯團第二朝做早餐。口味方面，首選一定係炒牛蒡、昆布佃煮同小魚乾。 唔過得夜嘅就免啦，費事肚痛嘛。
有時唔記得買，另一選擇就係屋企留下嘅Bento Express。價錢平過華御結，所以亦都冇咁好味。幾隻味道， 肉鬆就最穩陣。
----- 廣告 Ad -----
睇到呢度，相信平日慳住慳住食carbs嘅姊妹們都已經Ｏ哂咀。其實飯團都只係小兒料，記得上次渣馬，前一星期， 我狂食carbs嘅程度連我自己都覺誇張。喺公司食晝叫外賣要多飯，飯腳同事Ｙ即刻碌大隻眼問：「 你係咪有咗？」番到屋企食飯，唔覺唔覺仲食咗兩碗飯，實行餐餐都美人照鏡。到咗渣馬當日，我仲要鯨吞1.5個吉野家牛肉飯先出門口。依家睇番都幾驚驚。
今次街馬，應該唔駛出動到吉野家牛肉飯。 我諗少少地食兩個飯團應該夠吧，呵呵。
更多：
「我－跑－完－馬－拉－松！」
非一般虛榮感包包
拆解街馬跑手包
Fitz跑步文章
