[Penyagolosa Trails 2018] 男朋友視角食花生食到西班牙

孤獨跑者 2018-06-04

字 Decrease font size. 字 Reset font size. 字 Increase font size.

按:「女朋友視角」見山系烈女文章《[Penyagolosa Trails 2018] 歐洲大型山賽過程全記錄》

“Happiness only real when shared.” – Christopher McCandless

呢一年做左好多次 support，每逢 Samam 玩山賽，可以陪跑既我就陪跑一段，唔可以陪跑既我都係CP/終點等佢。經過呢啲特訓，基本上係山上面等一兩個鐘係濕濕碎，係終點等五六個鐘都難唔到我。今次食花生食到去西班牙，充分展現出平時訓練既成果。

Penyagolosa Trails 雖然係大賽，但對於無車既公眾黎講，去任何CP/終點都係極唔方便。井底蛙既我心諗，毅行都係100公里，西貢去屯門坐巴士最多都係兩粒幾鐘，呢個賽都係108公里啫，呢108km距離應該都唔會太難到呱。點知這麼近那麼遠，最後真係千辛萬苦，先可以去 CP 見佢一面，仲可以係終點見證佢衝返黎。

----- 廣告 Ad -----

12 hours to step on the starting line

比賽果日我地先到達起點 Castello (當晚午夜起步)，食左餐午飯，等埋好忙既 Airbnb 房東交低鎖匙 (第一次見到好忙既西班牙人，上房放低行李，我地就落去一街之隔既 Expo 兼起點。

近到一個點，樓下就係Expo兼起點

Expo 唔算好大，比一般日本馬拉松 Expo 都細，我地買左啲紀念 Tee，拎埋選手包就返上房訓覺。
有得必有失，近起點可以最後一刻先落去起步，但缺點就係 Expo 好嘈，嘈到訓唔著。佢典左成個下晝，都係訓唔到，決定早啲落去寄埋 dropbag，順便買晚餐上黎煮。

Expo越夜就越熱鬧，相信好多參加者都係即日到即晚起步。食完晚餐，佢訓左一兩個鐘，就換衫上Gear準備起步。係起點影返幾張自拍，就目送佢入去 Gear Check，然後逐漸消失係人群中。
我行到離起點幾百米既賽道旁，拎住 Gimbal 等待大軍到來。午夜十二點，教堂鐘聲「噹! 噹!」，比賽正式開始! 呢種起跑方式，真係比槍聲更有意境，果然係歐洲野。見住領頭既警車通過，接落黎係一大班Elite，過多幾分鐘，先見到佢跑過。立即伸手出去摸下佢隻手，「快啲返黎吖~~」咁佢又消失係人海當中。

一陣見～

快啲返黎丫～～

----- 廣告 Ad -----

我一個人返到房，再一次上網搵辦法去 CP Vistabella (84.2公里處既CP)。只要我去到 Vistabella，大會就有 shuttle 去終點 (其實 shuttle 上車既地方離 Vistabella 仲有兩公里)。之前上 Google Map 搵過，係無公共交通工具去到。剩低只有兩個方法，租車或打的。租車，我就唔敢拎個雪藏牌出黎重見天日(事後證明，唔租車係執返條命)，打的，呢個距離 (70公里) 保守估計都要100歐元，佢出發前叮囑我千祈唔好打的去搵佢。

但係我硬係覺得，我唔去見佢我一定會後悔。正當我萬念俱灰之際，畀我搵到張西班牙文既巴士schedule，可以由 Castello 去 Vistabella，睇黎天無絕人之路。好，第二朝訓醒就去求證下呢架巴士係咪真係Work先。

那日下午，我坐上了開往 Vistabella 的巴士

訓醒，房東係度熨衫準備返工 (都話左佢好忙)，我問佢有咩方法可以去 Vistabella，佢一臉驚慌，我由佢個表情已經知道呢個地方係好偏僻好難去。跟住我就出發去巴士 schedule 上面個地址，打算去巴士公司問。行左成45分鐘，卒之行到去「巴士公司」－工廠區附近一排無人住既屋。敗走，返到市中心，去 Tourist Centre 問。

Tourist Centre 哥哥好好人即刻過黎幫手，聽到我既難題之後，擰轉頭同後面個女人講西班牙文，個女人又用西班牙文講左一大堆野，中間仲擰擰頭，我心諗今次應該行人止步。點知個哥哥係佢個 folder 度拎左一張黃哂既紙出黎，exactly 係我之前上網搵到果張巴士 schedule，而佢果張個 version 仲係2011年 (我搵到果張係2014年)，唔怪得擺到黃哂。究竟有幾多年無人去過 Vistabella? 哥哥同我講，今日 (星期六) 有一班15:30pm車去 Vistabella，但係星期日會無車，所以係 One-way 返唔到黎。我聽到當堂興奮到跳起，我同佢講無問題丫，總之我去到 Vistabella 就得，到時我死都會死上大會 shuttle返黎 Castello。然後我問佢係邊度上車，佢話係醫院出面，咁我又行去醫院確認。

去到醫院，係外圍兜左個圈，都唔知係邊度等車，於是入醫院問人。Reception 無人，惟有行入惟一有人既 canteen 度問。Canteen 無人識英文，但係有個收銀姐姐好好人，佢拎住 Tourist Centre 哥哥畀我既資料，帶我行出去醫院外既巴士站。果然，巴士站上面貼左張去 Vistabella 既 schedule。收銀姐姐走左之後，我睇清楚啲張 schedule，總站咪係 Castello Renfe (火車站)? 火車站我識去，行20分鐘左右就到，總站上車好似穩陣啲喎，於是我又再行左去火車站 (搞咁耐都仲未到15:30pm)。去到火車站，見到巴士總站有個窗口，就係果架開去 Vistabella 巴士既 Ticket Office，但係休息到15:00pm先再有人賣飛。等呀等，果然西班牙人係唔會咁勤力，最後15:15 pm都無人賣飛，我直接上巴士畀7蚊歐元司機。

又越過高山又越過谷

上左車，放心又擔心。擔心我去到 Vistabella，佢已經過左CP，雖然咁都唔算太差，起碼我地最後 (應該) 會係終點見面。Vistabella 究竟係咩地方呢? 會唔會落車同 CP 離好遠我搵唔到 CP 呢? 會唔會我去到 Vistabella 但行唔到去兩公里外既 shuttle 上車地方，最後去唔到終點，困左係 Vistabella 最後連第二日飛機都 miss 埋呢? 諗左好多野，然後就訓著左。巴士越上越高海拔，我先明白點解 Vistabella 咁難去，原來佢係一個山中小鎮。

唔知大家有無去過張家界天門山，上天門山既髮夾彎路，同上 Vistabella 既山路應該不相伯仲。如果我揸 GTR 上黎，我應該碌左落山了。巴士比原定時間早到，我一落車，就見到大會義工，真係好好彩。

天門山示意圖

----- 廣告 Ad -----

我沿住賽道行上 CP，打算確定 CP 位置然後先搵個位等佢。可能我一臉好奇，有個義工肥哥哥主動問我有咩幫到我，好難得佢仲係講一口好好聽既英文，唔駛我估估下。佢知道我等人之後，我就問佢呢度點去終點。佢問我有無車，點樣黎呢度，最後問下旁邊既義工，細細聲同我講，呢度本來就無車去終點既，但就有 shuttle 載剪左帶既選手返終點，佢話我著得都似選手 (我諗佢既意思係我似剪左帶既選手)，應該照上車都無問題。

我萬分感激肥哥哥教路，然後反方向沿賽道行，舉起 Gimbal 等遇上佢。行左大約幾百米，真係教鬧鐘都無咁準，一日一班車，唔遲唔早咁都畀我係70公里外千幾米海拔既荒山野嶺撞返佢！佢係山坡上面落緊斜，離遠已經認到我，揮住手跑過黎。我做到喇！跟住我地一路講頭先發生既事，一路行上 CP。

任務達成50％

CP Vistabella

CP 似係一個大貨倉 (但又有個台)，熱食汽水運動飲品都有，仲有幾張長檯畀選手坐低休息食野。佢食左啲意粉，去左個廁所，逗留左我諗20分鐘又上路。我一路陪佢行，行到入山我地就道別，「快D返黎丫～～」，佢消失係轉角中。

我又繼續我既冒險旅程，我行返去 CP 上 shuttle，同一個真正剪左帶既伯伯，同埋另外一家大細出發去終點。到達終點，例牌周圍巡視，跟住就坐係草地睇選手返黎衝終點。當時係晚上六點幾，我要係度等最少六小時。

九點左右，天開始黑，海拔千幾米既山區開始寒冷起黎。我匿入附近既教堂仔，希望可以坐到十二點。出面既天氣急速轉冷，應該得返幾度，工作人員都著住羽絨大褸，而我件羽絨就係 Castell o個喼入面。得件風褸，一出去室外吹風成個人都震到不能，好彩有教堂避一避。

小教堂

十點，有個阿伯 (對面餐廳老闆) 走入黎對住我講西班牙文，我當然唔知佢講乜，佢就拎左一大條鎖匙出黎，噢，上帝之家要閂門喇。我走出教堂，喱入餐廳。入黑之後，衝終點既人越來越少，餐廳既人都唔多，即使我無幫趁坐入去，都無畀人趕走，隔離仲有幾個伯伯捉緊飛行棋（夜媽媽點解會有幾個阿伯係度捉棋……）。坐坐坐，大會終點既 Wifi 依然連到，可以畀我 Check 返實時佢過 CP 既時間。12點後，我嗌左杯 Espresso 一飲而盡，就衝出去終點等佢返黎。

等左一陣，有一堆光返黎，我知道係佢喇。佢衝過終點，其實有D劫後餘生，又凍又攰，要立即入帳篷取暖。入到帳篷，已經有幾個選手圍住火爐取暖。拎返 dropbag，佢著左幾多衫都仲係好凍，直至上 shuttle 先好少少。 Shuttle 上面顯示出面得4度，我相信實際上應該仲低。佢訓到死左，而我就唔知做乜好似有啲高原反應，周身唔舒服之餘仲係咁放屁 (多屁係高原反應既徵狀之一)……返到 Castello，原本係起點既廣場已經拆哂野，只剩低一個倒數電子鐘。