青公。。。一條全名叫要做青山公路嘅公路
青公。。。一條大部份跑友夢想中練跑嘅道路 (好似係。。)
青公。。。一條可以練速度又可練斜路嘅地方
青公。。。一條我聽得多，但從沒有跑過嘅傳說秘道
青公。。。一條打造好多跑友跑得快過小明嘅道路
青公啊。。。青公啊。。。
好耐之前，見好多跑友都會去青公練LSD、Tempo之類。而我都有諗過跑一次青公，睇下係咪真係一個咁好練功既地方。但本人實在太過懶，唔想坐車去咁遠跑，所以就遲遲冇去到。有天忽發奇想，覺得與其坐8、9蚊巴士去，淨係跑荃灣段至屯門段咁短時間，有D蝕。咁不如就玩大D，黎一個７１回歸全青公去爽丫丫下。
跑前都有詢問過跑友既資料，知道最惡頂係元朗段至古洞段，所以已經做好心理準備。如何惡頂？有興趣既就繼續睇落去丫。
全青公大約有56Ｋ:
青山道 > 葵涌段 > 荃灣段 > 汀九段 > 新汀九段 > 深井段 > 青龍頭段 > 大欖段 > 新大欖段 > 掃管笏段 > 青山灣段 >新墟段 > 嶺南段 > 藍地段 > 屏山段 > 元朗段 > 潭尾段 > 米埔段 > 新田段 > 洲頭段 > 古洞段
----- 廣告 Ad -----
因為呢次全青公我唔擔保會再跑，所以我去到每一段都想影底個路牌留念下。同時可以鼓勵自己有動力Keep 住跑到下一段。但太專注跑，我MISS左幾個路牌冇影到。
早上7點由嘉頓出發，青山道去荃灣段難度不大。除左葵涌段全程上斜外，都好好跑的，但最唔開心竟然係。。。天陰!!!
我最愛熱到溶既天氣跑步，見到天陰真係有少少不悅同失望。。。
跑完荃灣段終於到左跑友夢想大道 – 真。青公！
而呢個時候，原來個天都冇離棄過我 – 烈陽出來了!!!!!
心情即刻由谷底彈到上山頂， 拿拿林走去荃灣西約體育館補補妝 (其實係搽黑鬼油，唔搽會變關公)，就慢慢享受呢條路。
汀九段到青山灣段，九成路都係沿海，仲可以遠眺渣馬三橋景色，烈陽加上沿海風景真係一絕，可以邊慢跑邊欣賞咁靚既風景之餘，身體同心靈上都得到極大既滿足同放鬆。呢條路有上斜/落斜/暗斜，練跑真係一流，難怪咁多跑步朋友酷愛青公。沿路亦見到不少跑友享受被青公蹂躪緊。
沿途好多沙灘，聽聞十多個，但我就只影左呢度，因為有我個BEACH字。(快黎APPORACH我啦 XDD)
去到呢段都已經10點11點。。。個太陽雖然唔係出得晒， 但都已經夠曬死我十次，跑到轉車站真係頂唔順要搵樹蔭遮下，心中叫左一句 : [ 媽呀。。我知錯啦!下次我唔敢啦! ]。以前細個成班友正午十二點，沖去踼幾粒鐘波都唔覺有問題。但今次真係曬得太勁，如果唔係有支水係身，我人生就會第一次中暑。
當我以為過左呢條乾煎路，諗住有好日子過時，原來FINAL BOSS係新墟段到元朗段！！跑到呢段時間係１點到４點零，係烈陽得最甘既時間。因為成段係冇瓦遮頭，即係由汀九段到元朗段，我有成７個鐘既時間，乾煎自己條生咸魚，真係身上咩毒都可以曬死晒，我終於可以脫毒啦!! 爽晒!!
我呢家諗返都覺得自己唔係跑緊青公，而係在青山兜緊圈。。。。
唔係跑呢段路，我真係廿年都唔入黎屯門一次，感覺好新鮮，好似大鄉里出城咁。連妙法寺都未見過，仲走去問人呢座乜家科黎。個阿嬋好驚咁答我，可能佢以為我係偷渡落黎都唔定。
到最後潭尾段到古洞段，如果大家唔係食飽飯冇野做，都唔好跑呢度，因為。。
- 極多貨櫃車，塵多不特止，仲需要瞻前顧後，迫住你做大師父。
- 好多劏車場，有好多狗。（本人怕狗。。。）
- 條路好長、好悶、冇風景，除左車就係車，跑到想訓咁滯。好彩係元朗買左兩包Gel醒醒神，唔係我連力都冇。
- 新田段好多水貨佬截綠的，極煩。
基本上呢度要跑下停下，好似玩ONLINE GAME LAG機咁CHOK CHOK 下。個頭成日周圍望，忙過你返工覆E-MAIL，跑完第二日條頸好攰，我懷疑都係因為擰得太密。
----- 廣告 Ad -----
千辛萬苦，終於跑到終點 – 古洞段。大家見到我個樣都已經半死咁滯。。。
如果大家好似我咁，喜歡自虐、乾煎、做人體吸塵機，可以跑一次全青公。。。但免得過我都唔會再跑潭尾到古洞段，因為真係悶到發瘋。
打劫完青公，佢成副身家得$56。哈! 原來佢都係死窮鬼黎！！跑完我渣渣淋返去搵周公捉棋好了！
