跑季已經開鑼，好的建議一個都不能少，「柒」的建議一個都嫌多。你有沒有聽過最「柒」和最「型」的建議可以『些牙』呢?
最「柒」的建議
「妳10公里可以1小時15分完成，有哂條件挑戰全馬，報3個月後的 CCM啦!」
這個建議是我給一位青春可人新手小師妹的。比賽當天我有到場為她打氣，衝線時，我離遠見到她緊握拳頭，振臂歡呼，一定是像 Shalane Flanagan 一樣嗌 ”Fxxk Yeah”。
當我正想上前給她一個堅實的擁抱時，聽清楚原來她在叫「我要斬死陳伯你個仆街」。
「剛剛喺酒店先去完，又去? 幻覺嚟嘅，緊張令你覺得急尿啫。」
這發生在東馬E等候區時，我話要去揸水，朋友安撫我不要太緊張時說的。流動廁所就在旁邊，條隊都唔長。但我聽佢講無去到，點知瀨大嘢，跑到20公里時，啲尿係急到上口，洗手間條隊係26.2英哩咁長，sub-4 就係咁成泡影，我之後再造唔返1:40:31這個半程時間。
「便利雨衣係東京周街都有啦，使乜喺香港帶去唧，去到賣唔到，我切!」
這是『恤髮』前，同一位朋友跟我講的。2010年，東馬前一晚下了傾盆大雨，我搵匀成個新宿都找不到雨褸。第二日我係揸著把在 Tokyu Hands 買的超輕雨遮跑，跑了10公里，隻手痺哂，15公里後就丟L咗佢，淋雨淋足4個幾鐘，我跑到豐洲時見到前面有一度白光而耶穌正跟我揮手說「你回到天家嘞」。衝線後不久，太陽就出來了。
返到香港，即使夏天酷熱警告，我都會感到沾寒沾凍。去睇中醫，醫師話寒氣入了心肝脾肺腎，醫返都嘥藥費，叫我返屋企等死啦。
所以跑海外馬，什麼都要在香港出發前準備好，所有裝備都要跟身，不要寄艙。
----- 廣告 Ad -----
「跑馬仔前，去揼骨按摩鬆吓筋啦!」
跟向西春樹去跑 Big 6 東馬 (東莞馬)，一大班人提議『撈碳』前去揸骨，應該不是邪骨啩，我唔肯定因為全程大昏迷，唔知揸錯邊度同出錯咗乜嘢? 第二日，全身瘀痕，雙腳軟弱無力，PW 完走。
「咁難得來到京都，梗係安步當車，市內遊，市花行啦!」
第一屆京都馬拉松，我同ex一起去的。凌晨機，星期六清早到達關西機場，輾轉來到京都，在酒店寄存行李後，便往 Expo 取跑手包，ex是第一次來到京都，十分興奮，她按「鳩假期」和「閃令令」旅遊書的介紹揀了30個必乜必物的地方要去，我們是由清早行到晚上十點。第二天，我站在起點時，掃了一下部iPhone，發現最後一課30公里 LSD 原來喺噚日走了，tapering 去了哪裡?
「賽前 Pasta Party『撈碳』，乳豬夾方包『撈碳』。」
兩次跑熱帶國家馬拉松，Singabore 馬拉松，之前一晚扮「西」人參加 pasta party，吃得太多，腸胃不適 ，個肚頂住跑。另一次隆坡馬，『撈碳』是食乳豬夾方包，係疴到仆街，差點來不及上線。所以，唔熟唔食。
「落雨跑步會俾雨揼到肺炎，唔肺炎都淋病。」鄰居陳 C9。
肺炎是由細菌或病毒感染引起，而淋病更加唔關事。
「你知唔知第一個跑馬拉松的人跑完之後就猝死。」
「唔著褲 Beer Run 係會死人的。」雷神話。
「明天有比賽，今晚要carbo load，聽日金蛋10公里賽見。」一位知名跑者女藝人。
「起跑前要做熱身，warm up = 靜態拉筋。」
剛過去的港島10公里賽，我就見到很多參加者連慢jog都無做，便圍在一起做拉筋，超錯。試問從雪櫃攞條凍冰冰的橡根出來拉會有什麼後果?
「將 Musashi 粉末分成4份，用裝藥丸的細膠袋裝好，入水站前倒入口，再飲水吞服。」
原來飲水都要練習的，第一包，太大力拆，拆爛了個袋，給風吹走哂。第二包，倒到成面都係。第三包，入錯隔，「濁」親，咳到仆街。第四包，要企定定咁食，用咗十幾秒。
最「型」的建議
“Run your race, stay your pace!”「跑自己的比賽，按自己的配速。」Malini Nagpal
“Before splashing aid-station water on your face, check that it’s not Powerade.”
「入補給站時，要睇清楚係水定 Gatorade，先好兜口兜面撥，唔好彩『顏射』咗，要5公里後，先有清水洗。」Brad Stewart
“Never trust a fart after two miles”
「兩英哩後，不要以為是屁，切忌胡亂放，否則一褲都係。」Jeff Vollner
“Use lotion! After my first really long run, it wasn’t only advised，it was self-taught.”
「要遠離摩擦引致的損傷，實戰經驗話我知凡士林最掂。」Ryan Clifton
“Make sure you have a solid base before you start your 16-week marathon training.” Stacy Bagal
「馬拉松不是一蹴即就的，除非你的跑步底子厚，否則16星期的馬拉松訓練是不足夠的。」
「馬拉松是鬥最後10公里的。」
「馬拉松的半程是20英哩。」
「Sports Bra係乜都攝得到。」
是這樣的，一個寒冷的星期六早上，終於給我約到噴血師姐由沙田運毒場跑去三門仔，30公里長課應該什麼感情都培養得到啦 (心諗)。
我穿上風褸跑時，師姐只穿 sports bra，短褲，加一對 arm warmers。去到三門仔，我已經爆咗，無帶水，無帶 gel。
折返前，問師姐有無gel，她擰轉身從 sports bra 掏出一包 gummy bears。
「Gel 就無，熊仔gum啱唔啱?」師姐問。她倒了幾粒給我，我猶豫地接過來。
「有膠袋包著，好乾淨架。」師姐說。
「唔食留為紀念可唔可以?」我正準備放入口之時說。
「咁你去食屎啦!」師姐說罷便一手搶回，然後自己啪咗佢。
我見師姐個 sports bra 真係攝到部 iPhone，八達通，身份證，鎖匙同包 gummy bear。
資料來源
Fitz Facebook專頁
最紅跑者 Youtuber Casey Neistat (已停播)
母子版 Team Hoyt
紐約馬拉松名人榜
[紐馬第二快「美」人] 超Sweet的Allie Kieffer
Yiu Kwong Chan@Fitz
Fitz Running 跑步
