首先，攞支筆喺心口寫個「勇」字先，如果呢點都做唔到，收啦。一世只能做啦啦隊。
渡海泳又玩完一鑊，呢個比賽獨特嘅地方係，喺手臂、手背、左背都寫出你個號碼，我嘅係：
「6631」
寫呢個號碼除咗識別，其實係相當唔吉利 (當然信仰無咩吉唔吉利)，呢個號碼到你安全嘅時候就有時間慢慢去擦甩佢。無機會擦甩佢嘅原因，得一個，你係一條浮屍，因為你咩身分證明喺身，無錯，游水本身就係一個玩命嘅活動。
----- 廣告 Ad -----
跑步你可以停，游水係一定要郁，直到永遠。今年由尖咀游到會展，短而清，唔會唔夠力又唔會搞錯方向，但落水嘅恐懼加上賽前頸梗手痹（到今日都未掂），好似有把聲不斷打擊我信心。好在今年教練可以傍住旁邊，睇住我跳，睇住我驚到氣喘，睇住我努力質個頭落水，蛙式條氣唔順，自由式無力可施，一副等窒息沉到未知海深處嘅驚慄，由奇怪溫感嘅海水在我身上漫延。
詩歌式描寫到止為止。
粗d講：「抖唔到氣，會死」
祈咗禱出發，落水前見到一個大大紋身。
「JESUS WITH ME」喺個女士右肩，再默想彼德請耶穌幫佢水上飄，前一晚運動科學講嘅腦內想像練習落水、浸頭，深呼，深吸，都敵不過恐懼。
因為對這個賽事幾個月以來的憂慮，呢刻先真正釋放，就算天時 (夠熱)、地利 (短程)、人和 (有教練)，都未能抑制恐懼，唔落水係唔會發出。
----- 廣告 Ad -----
你生活有無遇上同樣情況，最實在的情緒要到最關鍵一刻先爆發，生命就是如此奧妙。唯有100%誠實在事前面對面與恐懼搏鬥，並傾盡全力先知敵人有幾強大，自己有幾倔強。
在此鼓勵經常未能完成山賽的何亨與全馬找數又傷膝的ERIC，唯有將恐懼、憂慮同藉口都擺在日光之下睇清楚，才有機會克服，集合過去、現在、將來，三個自己的力量去戰勝，做一次無憾的自己。
今次我第三年渡海泳，唔型唔威唔勁，反而係又一次展示軟弱無助嘅自己。
都係嗰句：
唔驚我就唔會嚟，嚟得我就唔再驚。
或者我落再多海我依然驚，畢竟我29歲學游水，過咗6年，將來未必可以夠找呢條數，我依然次次落，次次驚，輸緊3:0。
但我望住相入面赤身露體嘅我，嗰條疤痕，薄薄胸肌，鬆鬆嘅 Six Pack。我對得住呢個身體的殿。總有一次我可以追返一球。
祝福所有曾經比賽失敗過嘅人，你驚你去你完成。記得每次渡海泳，抹完身都一樣有個號碼印，留低俾自己嘅就係信心。
更多：
Fitz Facebook專頁
[世界上最遙遠的距離] 嘉亨灣與鯉景灣之間
[獅子山精神隊] 致隊員Raymond: 你流鼻血，我流馬尿
山友食飯的九型人格
屋企出發徒步去沙灘?
Law少 許耀斌@Fitz.hk
