Pei Pei跑完Garmin 半馬，趕來陪女朋友跑10K，一起走只屬於她們的跑道
(內含多幅Pei Pei從未發表的絕密照，值得碌到底)
「通常比賽到最後一段好攰，但我好想出盡力衝返終點，不是為名次，因為我知女朋友係終點等緊，唔想佢等得耐，衝線後好想與她來個擁抱。」
我看見浮現心心眼的Pei Pei，但聽到世俗對這份愛喧鬧不休的聲音，相信背後必有一段轟轟烈烈的愛情。
其實我是說Pei Pei對越野跑的愛 (阿孫，你好茅啫)。山界近年突然湧現幾位吸睛指數較高的精英跑手，男的有阿歹 (似社團大佬唔開聲嘅話) 和樂仔 (現時外號是四徑樂)，女方代表是Pei Pei。他們的共同點除了跑得快，背後都是在不太平坦的職涯上跌跌踫踫，然後亂入山界，始爆發其小宇宙，成就山界光明頂一席位。還有，他們都有紋身，令我心思思也想印番個公仔。
今次約 Pei Pei 由石硤尾上龍欣道畢架山，走鷹巢山一段轉落蘇屋邨翠河食尾班早餐 (心水清的讀者會發現近來訪問的路線愈走愈短，行冇幾耐就去咗食好西，這是我墮落之路)。
----- 廣告 Ad -----
在鷹巢山影相時Pei Pei 叫我記得縮肚(因有睇我的文章)，我話只要影心口以上便安全。
由剪髮珠寶魚蛋到上山
「你跑山之前是做珠寶業?」
「係，做咗都十年，主要係了解客人的要求，同師傅溝通點樣切割粒鑽石同裝嵌落襯托物度 (例如介指)。我會幫客揀下鑽石，俾少少意見，做出嚟個客開心，自己都有成就感。」
做珠寶時上廠學出蠟模，扮到好純品嘅後生仔
「其實做珠寶之前我都做咗4、5年Salon，我較少提起。果時約廿歲，係一間幫名人剪髮嘅高級Salon，我由最前線做起，去到師傅級。」
青澀蒼白的髮型師，絕不會想到十多年後在山界起風雲
----- 廣告 Ad -----
「點解唔發展落去?」
「做師傅要儲客，不過老細太多客，佢成日遲返，佢嘅客迫爆間Salon，我嘅客就連位都冇得坐，好難keep到客。亦可能因為自己唔夠堅持，後來轉去做珠寶，都係由零起步。」青春就是轉場。
「珠寶做咗十年點解會quit?」
「其實做珠寶淨係放公眾假期，冇大假放，冇得去旅行。我同女朋友都覺得好攰，於是乎狠狠地裸辭去歐洲旅行、去冰島睇北極光。」
裸辭攜手去看極光，呢啲quota人生限定一個
「唔擔心搵工咩?」明顯係老嘢心態，睇唔過眼廢青做事無計劃又衝動，郁啲又話裸辭，不顧一切去旅行，咁係呀嘛。(阿孫係你亂入2024，返番去博物館地庫啦)。
「唔擔心，諗住返嚟可以搵番珠寶做，點知返嚟冇幾耐就Covid爆發，世界停咗。咁啱有朋友問我哋有冇興趣做小食，於是係灣仔開鋪賣魚蛋燒賣。不過之後拆伙，同女朋友係長沙灣幸福商場繼續做，附近有好多學校，生意OK。」
「但進入Covid同社運高峰期時，好多學生都唔返學，生意少咗，但時間多咗，可以去跑步同做運動。起初做fitness係想減下肥，不過做完運動又走去食好邪惡嘅嘢，做運動是用來贖罪。」
做完體能去暴食跟住要去做體能跟住又可以暴食跟住…..，冇得救
「你而家body fat幾多%？」我哋食早餐時，見Pei Pei叫牛扒煎蛋跟多士，所以好奇一問。
「我而家係8%，最低試過5點幾，我都覺得黐線。」
「body fat幾多叫做健康?」
「女仔嚟講十幾%係好好。如果keep住20%係理想，太低唔建議。如果要跑得快先至要乾身啲。」
與Pei Pei翠河食尾班早餐，她說示紋身是美式的old school類型
呢張係Pei Pei頂峰肥嘅樣 (2015)，body fat盛惠23-24%，好有肉地
----- 廣告 Ad -----
「據聞你起初超唔鍾意跑步?」
「以前不嬲都唔鐘意跑步。不過果時跟 friend 玩 Spartan，好好玩，覺得人生一定要玩一次，玩5K體驗賽玩咗3個鐘，知道要進步必定要操埋跑步同跑山。我跟一個fitness教練同幾個同學一齊開始玩山，因為細膽，好驚得自己一個係山上面，成日覺得有啲嘢會彈出嚟。」都驚方丈成日失驚無神彈出嚟。
「我係九龍仔操跑步，起初唔知乜嘢打8字，跑咗5K已經覺得係時候走。教練見我跑得下，捉我去參加第一屆『逆之女』(2019)，同friend組team玩25K，竟然攞咗個冠軍。第二個山賽是『揹水一戰』女team，又係第一。不過我唔會驕傲，知道唔係自己快，只不過team少人參加。但獲獎令自己有動力玩落去。」
「果時小食店一星期開一至六，每日朝早7點小學生返學前開鋪，到夜晚9、10點，我哋冇請人，叫埋媽咪出嚟幫手，超辛苦。但我竟然keep到不停跑步，而家諗番，證明自己愛上了跑步。」呢個推論好合理，所以香港人打風都會去返工。
燒賣6蚊5粒，知道生意難做，但樂天知命，活得開心
進入江湖
「玩Spartan時識咗Lena媽，佢經常獲獎，係我偶像。佢竟然約我一齊跑山，對我係好大動力，我掹車邊跟到佢嘅pacing，佢話我得，鼓勵我去比賽，有佢加持，我有番信心。我同佢去西安玩咗個Spartan比賽，得到age group冠軍。」原來係Lena媽推Pei Pei入毒氣室。
Lena媽是Pei Pei的其中一位『損友』
「跟住玩田總嘅山路錦標賽，跑短途19K，得第二名，係第一個solo越野跑嘅獎項。果時短途跑完已經超辛苦，覺得30K是極限，50K是好遙遠、無可能。想不到現在50K是我的基本賽道。」
「Translantau 50 Virtual (2022) 我得女子第二，可以有資格去OCC (50K UTMB Series, 2023)。原來無可能嘅嘢，一步一步又可以用腳達成，好神奇。」這些故事在越野跑界聽了好多，但當發生係自己身上，才會有unreal嘅感覺，好high。
Pei Pei完成OCC出fb post，記錄最後衝線的心情:「…..轉埋灣跑到嚟地氈嘅路段，望到拱門，幾秒間內心突然好複雜，眼淚好想湧出黎同時又好開心好感動，終於衝過依個夢寐以求嘅拱門，好唔真實，再望下錶，7:51:17，目標時間內完成! 辛苦，但依個滿足感係冇嘢代替到! 今次既我未夠強大，但我肯定當我下次再返黎依個地方既時候，我一定會變得更強。」stay hungry 是令 Pei Pei 跑得更快的一塊炭板。
Pei Pei 話下次再返黎嘅時候，一定會變得更強，好man
「我第一個solo 100K係舊年嘅HK100，教練同我定15小時攞男金人，後來想試做14:45。不過去到大灘約30幾K，排緊四、五位，怎知拗柴，痛到腳震，剎那間諗過唔係要quit嘛，綁實鞋帶行咗一陣，冇咁痛，繼續跑。我只係話咗俾Lena媽知，冇講俾其他supporter，免得佢哋擔心。捱到番連姐度，見到拱門，聽到歡聲，真係想喊出嚟。最後跑出14:36，獲得第四，喜出望外。」Pei Pei被自己的堅持而感動。
----- 廣告 Ad -----
「第二個100K就係我啱啱完成嘅 Salomon 100。」
「滿唔滿意成績?」
「滿意呀，諗住16小時完成，而家係15:48，女子第二。」只慢敏怡13分鐘，滿意另一原因是亞軍有2000元現金，唔洗一定要去Cam X同店長買嘢。
難得見到偶像尾燈，仲係傾到偈的距離，開心過同佢selfie
兩位發錢寒的運動員，是跑得快的主因
「Salomon 100夜晚會經過最多故仔聽嘅新娘潭，有冇見到一啲唔應該屬於果度嘅嘢？」我係為讀者而問。
「好彩冇，我雖然細膽，但入咗比賽mode，就百分百專注。」
「我之前要練渣馬，玩完12月Tnf 比賽之後就冇上過山，Salomon 100原本只想報50K，但報果時已經full咗，四方八面嘅朋友都叫我玩100啦 (緊係啦，又唔係佢哋跑)，考慮到最後一刻決定報名，得到手寫bib一張出賽。」
「我去到50幾K，落完紅花嶺feel 到ITB開始痛，上斜同平路都OK，落斜就痛。」
「1-10級，大概去到第幾級?」記得睇醫生都係咁問我，我通常答高兩級。
「大概5級，係我接受嘅程度。成個過程都開心，途中遇到不同跑手一齊走一段，好開心好鼓舞。」
「未來有乜嘢賽事好想參加?」
「除了殿堂級嘅CCC同UTMB，超想玩嘅一定係今年山路錦標賽50K，希望爭取到成為香港代表出戰世錦賽。代表香港係我一個夢想，就算係一次已經好滿足。」祝願Pei Pei可以成為另一位香港女兒，當然某總會的垂青和慷慨是關鍵。
「2023年渣馬是我的初馬，成績算滿意 (3:22)，嚟緊我都會繼續鍛鍊路速，跑馬，為山賽打好根基
初入馬圈即獲萬金，祝長跑長金
「會唔會開跑班?」
「我而家冇教跑班，因為抽唔到時間，都有興趣做跑班。我考咗體能同長跑教練牌，我而家做緊1 on 1嘅教練，跑手係香港暫時未可以靠贊助為生。其實我細個唔鍾意讀書，又坐唔定，唔知點解而家會去考呢個牌考果個牌。」香港全職女跑手與女跑班教練鳳毛鱗角，希望Pei Pei可以佔一席位。
「做教練見到學生成功超開心，我嘅體能學生減肥成功，同我講著得落件婚紗，大家都十分興奮。我好欣賞用心去carry同鼓勵學生嘅教練，好似怪獸sir、聰sir、KFC….等等。」
呢位教練，在終點等候學員回來，送上深情的擁抱和完整的生日蛋糕，只有怪獸才做得到
「記得有次跑完比賽，KFC埋嚟同我講: Pei Pei你進步咗好多，跑得好好。一兩句簡單嘅說話會俾自己肯定，係好開心同鼓舞，好感激所有曾經鼓勵過我嘅人，都在心中。」Pei Pei 你就好，呢位教練多數同我講：阿孫，咪揸流灘。
『誤交損友』令自己變得優秀
「以前參加學校運動會係為咗應酬老師，揀跳高跳遠，走埋去一下過搞掂，唔洗出汗。但我考教練牌唔係為咗維生，真心有興趣同想令自己更優秀。」
「你原本都係hea底嘅廢青標本，但今日你卻滿懷一顆爭勝心，係乜嘢令你有咁大嘅轉變?」
「我諗因為玩咗兩次比賽有唔錯嘅成績，嚐到辛苦得來的甜頭。但最大嘅動力係來自我識嘅跑友，好不幸地佢哋都係精英，同佢哋約操，真係唔想跑得慢令佢哋係度等，雖然佢哋會話唔緊要會等埋，但知佢哋個身會凍番晒，十分唔好意思。」呢方面我有太多經驗，去到會合點，經常見到等我的跑友在著風褸、原地跑在暖身。但我無Pei Pei的歉疚，我係禮義廉啲friend。
操山都要誓師，呢次肯定甘
「佢哋好癲，約跑針草帽，係玩來回30幾K。我成日以為有得大抖，但其實係邊跑邊食。有次跟佢哋環港島60K，話去赤柱開餐，點知都只係去7仔買嘢食，係我諗多咗。有friend約操畢架山上波頂，以為小菜一碟，去到至知係來回5次。最黐線一次係跟佢哋玩針山十登，唔係參加比賽，純係自high。就係誤交呢啲損友，成就咗今日嘅我。」
滿意今日的Pei Pei嗎?
「你去到呢個歲數*，滿唔滿意今日嘅Pei Pei？」*因為之前訪問鷹鷹，佢爆咗梁影雪嘅年齡而俾雪姐追撃，所以會採用較含蓄嘅表達。(Fitz請不要出該文章link，以免造成二次傷害)
「我OK㗎，雖然唔係搵到大錢，但做到我有興趣有熱誠嘅嘢。當我攞個獎杯返屋企，媽咪會講點解你咁勁嘅，最重要係屋企人都會proud of 我做到呢個成績，屋企從來冇要求我搵好多錢，只要開心過活就得。身邊嘅朋友、另一半都好理解同支持我去追夢。」唔怪得上凸台嘅都會感謝父母。
阿媽話：唔洗搵好多錢，但要活得開心。Pei Pei將呢個任務完美達成
「造成今日嘅Pei Pei，你覺得係上天安排嘅際遇多啲，定係自己嘅性格能力多啲?」
「我覺得兩樣都有(預咗你會咁講)，望番轉頭，其實好講時機，如果今日嘅際遇發生係我廿幾歲，我諗我會放棄，真，叫廿幾歲嘅自己去跑100K，黐咗線咩。果時我絕對唔係一個會堅持嘅人。」
「為操港百教練安排走雙坳，但我因要上堂miss咗，我自己會去補番一次雙坳。其實操呢課唔洗同人交代，亦唔會有人知，不過今日嘅Pei Pei係會堅持去做。」其實要有咁嘅性格和潛能，至可以承載和捉著際遇，否則只會與機會擦身而過。
用正面和堅毅，跑出快樂和希望，Pei Pei以性格承載際遇
「Pei Pei你好大改變。」
「係，以前我好冇乜自信，讀唔成書，運動唔叻，事業又冇大作為。揀啲容易過嘅生活，運動會揀最短嘅60米參加，點知一起步就撻Q扑咗係度。發夢都估唔到做咗全職運動員。」Pei Pei 再唔係一條冇夢想嘅咸魚。
「有一項賽事令我有好大體會，係同怪獸sir組四人隊玩 Two Peaks (上大東鳳凰)，果時剛恢復番實體賽，同組有聰sir夾Angie、鷹鷹夾楚健等頂級隊伍，壓力大到癲，唔想因自己連累教練，前一晚太緊張，只瞓咗兩個鐘。記得衝線時已耗盡，感覺自己面容極度扭曲，結果僅慢鷹鷹果隊2分鐘得亞軍。」
「呢個比賽好似迫自己上咗部高速列車，突然去到精英級數，發現只要投入和堅持，原來自己可以去到。」
今日的Pei Pei已由巴士轉乘高鐵，朝著更遠更高的山峰進發，目的地雖未確實，但路軌卻踏實地鋪在地上。
屋企有個潮爸
「Pei Pei你係唔係細細個已經好男仔頭? 抗唔抗拒女性化打扮?」
「我細個已經係男仔頭，印象中都有著過下裙，不過唔鐘意。」
Cute爆小女孩，點忍得手唔搣下佢塊面
Pei Pei唔再著裙肯定係人類一項損失
「你點解紋身? 幾大個開始?」
「廿幾歲，果時我做緊Salon，呢行好多人都有紋身。覺得紋身型囉靚囉 (就等於女士出街會配條絲巾一樣)，背後冇乜嘢故仔。好似我鐘意粒星嘅圖案，第一個紋嘅就係粒星。」
「屋企有冇說話?」
「冇，屋企超級開通。我阿爸見我打耳窿，問我係邊度打，我話樓下，佢話佢又去打，佢而家有戴耳環㗎。我紋完細妹都有紋。」有潮爸有潮家。
呢個潮爸真心得，我問Pei Pei右邊同樣潮嘅係邊位? 佢話係婚禮上的backdrop
彩蛋 – 轟轟烈烈的愛情
「你係唔係女權份子?」
「唔算係，我唔會企出嚟爭取什麼，但我支持男女平等，唔好睇輕女性。我會做好自己去證明女性的能力。」十分認同用腳去說話，有力過用口去嗌咪。
「女朋友有冇受你感染去跑步?」
「佢都有為咗減肥去跑步，因為我做咗體能教練，佢對健康敏感咗。」
「比賽完佢會接你放學?」
「經常有，不過Salomon 100果場因為凌晨完賽，我叫佢唔好出嚟，有師兄會車埋我，我叫佢係屋企等同照顧隻狗狗。」
「女朋友係我最佳嘅supporter。我有時都懷疑自己做教練得唔得，佢會俾中肯嘅feedback，唔會盲撐。當我否定自己嘅時候，佢會支持我。」
「你哋呢段關係屋企有冇壓力?」
「我屋企完全OK，女朋友而家同我和我屋企人一齊住。但佢媽咪之前唔係好認同，不過接觸多咗，佢媽咪開始欣賞我嘅成就，而家好接受我哋一齊。」
Pei Pei 話呢啲叫幸福肥，狗狗都想有
「你同女朋友一齊幾耐?」
「13年啦，但我哋唔會因為咁耐就淡咗，佢仍然好support我，我都會為咗佢而努力，比賽時好想快啲衝返終點見到佢。佢而家都識聰sir怪獸等高手，好欣賞我哋做緊嘅嘢。我跑OCC時，佢係屋企開咗YouTube直播俾我阿爸阿媽睇，當然唔會影到我，但係感覺到大家的存在。」
一份牢牢的牽掛，一段13年的關係，是一場超馬，雖然沒有驚心也沒有動魄的情景，但仍然咁投入、咁有溫度，也許，這才是轟轟烈烈的愛情!
13年，影相前還細心為對方整理一下頭髮，轟烈
