每年農曆新年舉行的越野賽「香港四徑超級挑戰」(Hong Kong Four Trails Ultra Challenge，俗稱「四徑」)，今年25名選手之中，包括了「毅行先生」KK 陳國強。KK 由上世紀開始縱橫本地越野賽及超馬賽事，去年順利完成 UTMB 170公里，今年「四徑」以62歲之齡參加，成為歷來最年長參加者。
訪問節錄短片
問: 四徑都搞咗好多年啦，點解會今年參加?
「之前 Action Panda 老闆 Kinson一直都鼓勵我參加，不過佢哋喺農曆新年舉行，而呢段時間我點忙都好，都會留啲時間同屋企過年，所以都無乜點考慮。呢次都要同屋企人申請㗎，好彩得到阿媽批准。我同佢講，跑埋呢場300公里之後，唔會再跑咁長㗎嘞。」
「其實本身呢項比賽都好啱我，一來距離夠長，二來又無support又唔畀用pole，真真正正憑實力比賽。加上舊年為咗參加 UTMB 訓練量多咗好多，既然一直都有相應嘅訓練，就接埋跑埋呢一場啦。完咗 UTMB 我就去問創辦人 Andre Blumberg，結果佢決定發出邀請。」
問: 今年改咗喺年三十傍晚起步，會唔會增加難度?
「今年最難一定係 捱 · 眼 · 瞓! 只要計一計數，年三十晚6點幾起步，咁第一晚就要喺麥徑過，第二晚就行緊衛徑，第三晚喺大嶼山鳳凰徑，總之應該休息嘅時間全部喺山上面，所以對參加者一定好大考驗。」
「參加得呢個比賽每一位都係高手，300公里距離未必難到大家。不過捱眼訓呢樣嘢，就絕對講唔埋。一般長距越野賽最多都只係連續三日兩夜，所以呢次要捱足三個夜晚，對好多人都係一大考驗。想像一下，喺山徑上面，瞌住眼瞓都幾危險。腳下面有樓梯、浮沙碎石、泥路、大石，精神一下子唔集中，就會出現危險。」
「不過好玩嘅地方就係呢啲估唔到因素，越難嘅嘢先更有動力去挑戰。」
----- 廣告 Ad -----
問: KK你驚唔驚跑跑下有幻覺?
「我之前跑超馬都試過連跑50幾個鐘，都唔會有幻覺。越野賽捱眼瞓一兩晚對我無乜問題，不過連續唔瞓三晚我未試過，就當係一個挑戰啦。」
問: 驅除睡魔有咩好方法?
「一覺得眼瞓就停低瞌一陣! 我以前做消防員咩環境都瞓得，唔理係火場定後樓梯，總之眼瞓就瞓下，要維持良好嘅精神狀態。」
過去數月經常登上香港不同山徑
問: 對呢次比賽做過咩準備工作?
「依照賽例，喺每個山徑轉接位可以接受外來補給。咁我已經做過幾次模擬補給。不過而家比預期遲起步，原本喺夜晚進行嘅補給工作，而家變咗做日頭。」
「舊年我完成 UTMB 之後開始備戰。由每周跑100公里開始慢慢提升，到第四、五星期已增加至每周200公里，直到1月慢慢減少訓練量至150公里左右。最後一個星期就完全放鬆。」
----- 廣告 Ad -----
問: 會唔會帶咩特別裝備?
「會帶保暖氈，加件可以檔風檔雨嘅外套，足夠應付香港嘅冬天。」
Cosmoboys隊員陪同練習
問: KK你對呢條山徑一定好熟悉，咁逆走嘅話邊一段應該最難?
「照計應該係逆走衛奕信徑，由南涌跑去舂坎角呢一段最難。事關跑完呢段路之後，緊接就係最短又最容易嘅港島徑。到鳯凰徑已經進入最後直路，只要你踏上去梅窩嘅渡輪，你點都會捱埋落去。」
問: KK你嘅目標時間係幾多?
「呢次我以完成比賽為目標，72個鐘之內完成就好滿意嘞。如果有意外令我唔可以72個鐘關門前完成，我點都會行返去終點，總之一定要完成。」
「我之前有諗過喺60歲嗰年用60個鐘跑完『四徑』，不過我今年62歲，無理由嘅目標時間越定越慢㗎?…… 咁我都會盡力試下去唔去60個鐘之內。」
KK 強調，越大型比賽越應該採取輕鬆心情面對，以享受心態去比賽，往往更易有好成績。我們祝福KK開開心心完成，同時有好表現。
官方網站: Hong Kong Four Trails Ultra Challenge
即時追蹤連結：https://live.dottrack.asia/23hk4tuc/
