有些事情你好想做，但又好擔心失敗，因為時間關係，再唔做就冇機會做，唔可以再拖。一般來說，我地叫呢啲情況做尾班船。
如果要趕上人生的尾班船，你會選擇上那一個碼頭?
一號碼頭 – 轉工/創業
二號碼頭 – 生個B
三號碼頭 – 移民
四號碼頭 – 同方丈反面
五號碼頭 – 電/染一次髮 (如果仲有足夠數量嘅話)
豐山跑跑班教練張祺豐 (KFC)，選擇了六號碼頭 – 跑一次298K的四徑 Hong Kong Four Trail Ultra Challenge HK4TUC。
1月23日年初二中午，已依次完成了麥徑、衛徑、港島徑後，輪到跑最後的鳳徑。由山頂喪跑到中環的六號碼頭，趕1420船入梅窩，如果他要做60小時完成者 (72小時內跑畢的是生還者)，要趕及在年初三零晨0615之前完70K的鳳徑，但他此時已疲累和虛脫至極，又見幻覺又意識模糊……。
----- 廣告 Ad -----
為什麼在梅窩碼頭會出現這一幕？以下是一個有關他們的故事
事發前一年
2022年6月間KFC 打電話俾我:「我想試下報四徑，你覺得點?」
「我覺得你係時候做一次，以你的實力，我相信你 handle 到，而且對跑班係一個好正面嘅衝擊波。」心諗又唔係我做，梗係鼓勵你上 (呢啲行為我好易做得出)。
好不幸，教練信以為真。
KFC 好認真入紙申請，9月他打電話俾我說申請被接受了，正式成為2023年 HK4TUC 的參賽者，電話中聽到他興奮中又帶幾分忐忑和緊張。我心諗:「死啦，教練呢次會唔會玩大咗?」
----- 廣告 Ad -----
To be or not to be, that is the 衝擊波。
Run for What
「如果你問我 run for what，first priority 一定係為個跑會，喺香港我唔係最頂尖越野跑手，亦過左最 peak 嘅 age，但我想以我個人的親身經歷 set an example，憑毅力和堅持嘅精神，同學係可以做到一些 impossibilities，為佢地帶來一點衝激，另外也想有個 role model 俾兩個女兒 (太太也大方俾左批文，幫丈夫完夢)。
當然我個人都想在距離和成績方面有些突破，好想知道 non stop 跑咁長咁耐有乜野體驗。考慮年紀和體能，有些事情係時候做，如果唔係一生都唔會再有機會做。
我表姐 (Rhoda Cheung) 係2020年都有玩，雖然最終做唔到生還者，但佢都肯去嘗試。大師兄楚健同火車sir比我年紀大，但佢地都做到理想嘅成績，好 inspiring，好 motivate 自己都去接受呢個洗禮。
前路艱鉅，Nugo 和 KFC 互相送上深情的祝福 攝: Albert.Running.Photos
其實2022年頭已有玩四徑的念頭，我絕不是想攞四徑去搏取光環，因為唔需要。入紙報名前有好多掙扎，因為舊年有好多不利事情發生，年頭我中左 Covid，五月玩左一場賽事嚴重拗柴，跟住發現心口痛，原來是肋骨骨裂，又足底筋膜炎，自己唔係太肯定是否係 right moment 去做一項咁極大嘅挑戰。
賽事規則大顛覆
KFC 成立了一個 support group 準備補給物資、接送，和 self-support 策略。我是其中一員，睇名單我好放心，因為其他都是又細心又實幹又有大愛的同學，我只需要間中講句「阿sir加油、我知你得」之類來自肺部的說話，就可以坐享做 supporter 的光環。
當一切準備就緒，一個改變令大家倒瀉籮蟹。1月16日，活動前5天，收到大會通知，起步時間由1月21日早上改為當日的1815，黃昏出發，即是參加者需要在山嶺渡過三個通宵，似夜機去早機返的三日三夜呃錢旅行團。另外徑與徑之間的 supporter 人數也不限，但仍堅守不能在賽道中提供任何實質 support。原先鎖定了在四徑途中可作 self support 的士多和商鋪，現因跑手大部份時間在深夜才經過。打亂了原先的部署和要作出應變。
原定三對戰鞋輪流上陣，但最後全程都著Speedgoat 5走晒
而最大影響當然是跑手要捱三晚通頂不停跑，會唔會變喪屍? 頂唔頂得順三日唔瞓覺? 大家都充滿疑惑。
「我個腦原本已經 program 好晒日間去果度夜晚去果度要用頭燈，邊度有士多可以買野飲，要趕幾點船，已經消化晒入晒腦，一下子所有 planning 倒轉晒。星期四，比賽之前幾日，感覺好似就快卦刑場，好像會去跳 bungee jump，超大壓力。」
----- 廣告 Ad -----
KFC 賽前接受Fitz專訪
25位四徑戰士
麥徑 – 熱水沖涼豪華團
麥徑由夜晚開始，即係途中經過的幾間士多都應該不會營業。教練問過連姐大帽山茶水站開到幾點，佢話要外出食團年飯，幸好最後聯絡到一些朋友幫忙開鋪正常營業。
「連姐之後要全程 self support，在城門水塘有汽水機買左罐可樂，水浪窩有斟水機。零晨3、4點上馬鞍山開始落雨，去到雞公山時已全身濕透，果刻好後悔冇帶風褸。
跟原定時間15小時內完成麥徑，去到北潭涌即刻去廁所落貨。出返嚟見到 supporter 已經搭了個營幕俾我沖涼，仲有個人用腳踩個 pump 出熱水，堅5星級，換晒衫褲鞋襪真係好 refresh，Eszter 在旁見到都驚嘆。不過我係車上瞓唔著，可能因為是日間仲係好精神。呢個站連交通休息按摩食野，到南涌再起步用了1小時32分，比原定的長了半小時。」享樂令人墮落! (有圖見證)
北潭涌的禮遇，熱誠款待全勝海底撈
浴室，有專人pump熱水，含熱水、皂液，護髮素另計
北潭涌去南涌途中，車上豪華大床，有專人講床邊故事
衛徑 – 缺水反肚加幻覺
上八仙嶺開始與烈陽搏鬥，記憶中未試過年初一咁熱。飲左好多水。由南涌去到太和才有水補給，約26K，身上只得1.3升水，上九龍坑山已經飲盡。到九龍坑山腳，見到敏儀拿著部相機在跳下跳下影相。我捱到太和7仔，見到 Ryan 剛剛出來重返賽道，
我二話不說即把罐冰凍可樂一飲而盡，怎知飲完個胃反反地，好唔舒服，買左nuts都唔想食，冇胃口食野我知可能出事啦。我上碗窰時俾 Sandy 超越了，我懷疑自己太慢，後來聽聞她在藍田過太古時 quit 左。
7仔巧遇敏儀聰sir。就係呢罐可樂出事，等你唔聽阿媽話
去到橫塘涼番少少，可以加速。去到東洋山被印度跑手 Mayank 追到，同佢一齊跑了8、9K，大家都知要趕藍田往太古城的地鐵01:05尾班車。錯過了就要等5小時後的06:05頭班車，這是條完成者的生死線，不容有失。幸好在晚上11時已到藍田。我在 Seven 飲左枝熱維他奶好少少。
----- 廣告 Ad -----
一世人好少經歷兩次生意失敗
到了南豐新村，又見到敏儀在蹦蹦跳，咁有活力，早知捉埋佢跑四徑。開始衛徑港島段，要與小馬山、渣甸山、紫羅蘭山、孖崗山和眼瞓惡鬥，開始見到幻覺，石頭變了好多的小動物，有豬、狗等，石頭上的紋理似乜野動物，個腦就會把它活化成那種動物，像真度好高。到行港島徑時已經見慣不怪了。
記得兩個星期前在孖崗山來回走了22轉做4424的挑戰，現在上一轉已感異常吃力。去到赤柱見到太太、阿女和表姐嚟左接車，好開心同興奮。」 (教練，其實我同車手 Denny 都有嚟到接車架)。
我們把教練運去石澳，接受另一站5星級的 support 服務，計有熱水浴、溫水浸腳、充電、抹面、擦牙、腳底按摩、貼 tape，食物方面有鮑魚雞粥、焗豬飯、螺絲粉任選、黑金傳奇薑茶、紅棗龍眼水等。但教練來到只選了一項，就是瞓覺。我們讓他睡了15分鐘便叫醒他，要食野和補充各種物資。
我地唔小心把少量高溫水倒入浸腳盆時，應該燙親教練的腳，但只聽到他大叫左半秒，跟著又倒頭重返睡鄉。肯定佢醒返後唔會記得有呢個小意外。40分鐘後，一 supporter、太太和女兒，在昏黃的街燈下，望著教練好fresh的背影，踏上了港島徑。
孤身走我路，獨個摸索我路途，寂寞滿心內 ，是誰在耳邊輕鼓舞
港島徑 – 腦霧來襲樹變人
教練喺石澳忘記了一件好重要的事情，就是去廁所落貨，上龍脊時剛好日出，靚絕，但個肚急call，要加速跑成6、7K，去到土地灣公廁卸貨。跟住要跑7K引水道，真係殺死人，成條路冇變化，眼瞓和腦霧又來襲，睇見兩旁滿佈人，行近啲知道係樹，好真實，不過唔驚。
去到大潭，真係頂唔順，超級眼瞓，跑緊迷蹤步，上斜路段我大字形瞓係路上，果時天已亮，有些途人經過問我有冇事。小睡左三、四次，每次幾分鐘，熄一熄機又開番，我覺得同睡魔博鬥係呢次四徑最大嘅challenge，要用盡所有意志嘅存貨，叫自己要撐住。去到油站補水和買了nuts，衝埋港島徑後段。」
報告，初二零晨二時在陽明山莊附近停車場，發現一名中國籍男子倒於地上，頭燈亮著，檢查過呼吸，應該不用派白車了…..
此段教練打電話俾我問去梅窩船的班次，我說最好趕及1340，那麼鳳徑可以輕鬆一點，下一班是1420都OK，都容許有16小時走畢全程，問題不大。我亦同在碼頭的 supporter 說，盡量在上船前餵飽教練，佢上船後唔好再騷擾佢，令佢可以瞓足全程。
「我上到山頂完成港島徑，經舊山頂道衝去碼頭，用了15-20分鐘，一到碼頭成 crew 人即刻做野，又食粥又按摩腳趾，上到船佢地已經霸左船頭個靚位，預備了吹氣軟墊被鋪眼罩耳塞，唔夠30秒我已經熟睡，直至落船俾人叫醒。」
第一次鐘意看見熟睡中的男人
全賴這群天使，守護著一具….，不，是一名已跑了228K的參加者
鳳徑 – 迷路耗盡亡命跑
「出碼頭又見到敏儀，叫我係路邊坐低，跟住有8隻手在我身體上按摩，好像打通了每一個經脈，真係有啲唔捨得走。不過這是最後一段，不可能有任何耽誤，我希望可以用15小時完成鳳徑。
八手一腳在按摩，一個全勝骨場
是甜是苦，似夢迷離
我們的 supporter 任何厭惡性工作都做得出
逆走鳳徑初段經過一些廢村，要開住電話搵路，不可以開得太快。去到貝澳飲左枝維他奶 (又係維他奶，有置入式廣告之嫌)，加速前進，係引水道上開過5分披。那時已天黑，跑下跑下，錯過了轉左落水口村的路口……」
另一邊廂，我地成班 support group 一路好緊密在 Livedottrack 監察住教練的行蹤和 pacing，去到水口之前的速度我們是放心的，但一見他 miss 了個轉彎位，立即瘋狂打電話俾佢，但沒有人聽。只見教練愈走愈遠，愈來愈錯，全人類都十分焦急，大會搞手 Andre 都發現，他在大會的Whatsapp support group 叫我地盡快聯絡他，但 call 了約廿次仍是無人接聽，這時四方八面朋友的 message 洶湧而至，叫我地做野，但除了焦急，可以做什麼? 十分無助。
突然我收到教練電話，他也發現跑錯了，估計約2K多，他說那個路口被一個亭子遮掩住，又黑，所以錯過了，幸好他有概念，不應咁耐都未到水口，拿電話出來看才發現走錯。來回他總跑多了5K，用多了半小時。計下數，有些少緊張，餘下的要加緊腳步，因還有鳳凰大東兩個大佬未打。
16號仔沒有在淺藍色的路口轉左落水口村，漂流多2.5K才發覺
我係水口 Mink 姐士多食左杯麵，有番力，知道要加速追番，在石壁引水道跑得好快。不過去到分流杯麵效力耗盡，又開始眼瞓，在二澳跑去大澳段狂搥自己要醒番。由大澳上靈會山段我真係夢遊仙境，慢了下來，我第一次擔心未必做到60個鐘。」
享受Mink姐水口杯麵，四徑中唯一展露笑容的時刻，可能他知道有背後的新春對聯照住
作為食花生的 supporter，我地見教練的 pacing 緩慢下來，好擔心，大家討論好唔好打電話俾教練，打下氣，令佢醒一醒，因為若只差少少做唔到完成者超可惜，有今生冇來世。但另一考慮，佢已經盡晒十二萬分力，再迫害佢會唔會俾佢好大壓力? 甚至責怪我地迫佢。最後我決定冒著同教練反枱風險，打電話俾佢。
「阿sir你而家點呀?」交關心戲。
「OK，不過行緊迷蹤步。」即係唔OK。
「我地見你慢左，睇係你有冇事?」
「唔講啦。」跟住收線。
我知佢唔係發老脾，不過想專心跑，亦緊張唔想被人追過，所以叫其他同學都唔好聯絡佢。事後同教練講番呢個片段，佢輕輕說:「果度我有同你通過電話咩?」
到了羌山，突然收到教練voice mail:「羌山好大風，吹到企唔穩，唔知上到鳳頂會點?」證明佢清醒番少少。原來係佢去羌山頭突然刮起大風，溫度急降有5度，又有雨，情況好惡劣。
「去到昂坪要揾路上彌勒山郊遊徑，又慢番，又冇晒水，心裡有些急。去廁所斟了水，急步上鳳凰，果段堅博晒命，但超大風，可以吹郁個人，我要單手襟住個頭，如果唔係頭燈同帽都會吹走。落鳳開摩打腳，好像跳舞般衝落去，其實好危險，不過我覺得是在鳳徑做得最好的一段。」
教練上鳳頂真係好快，追番不少。約半夜3時45分到伯公坳，有兩個半小時由大東跑去梅窩，9K，應該沒有大問題了。
碼頭 – 家人同學接放學
我和教練太太，由有大嶼山 license 的同學駕車去碼頭，與坐半夜3點船入梅窩接教練放學的同學會合。有約30位同學在寒風凜凜下聚集，熱情高漲 (當然又見到敏儀在走來走去)。C大嬸當日下午已設計好了迎接教練由地獄折返人間的歡迎口號，正忙於與同學綵排。
零晨5時45分，Andre 響起了鈴聲，在嶼南道遠處，一盞頭燈漸漸迫近，步大力雄。經歷了59小時30分，走了298K (+5K)，教練昂起頭，跑向綠色的郵筒，走進人群喧鬧的掌聲和歡呼聲中!
「我知道有一天，他會在一個萬眾矚目的情況下出現，身披金甲聖衣，腳踏七彩祥雲到來！」
教練親吻了郵筒，與 Andre 擁抱，再與太太熱吻 (雖然聽見太太輕聲說返屋企先)，喝了母親親手送上的愛心湯 (他不知媽咪會到來接放學)，跟住接受了 Andre 的香檳浴，白色的泡沫噴灑全身，教練成為第五位，亦是今屆最後一位四徑完成者 (60小時內)，他賽前要證明的，都證明到了!
我今日俾好多人係咁錫，其實你地有冇理會我感受 – 郵筒反眼
老公你好勁，准你今晚唔洗拖地住
一切付出都值得
此時碼頭響徹了同學齊聲叫出的口號:
「Crazy Crazy Running Club, Never Never Give Up, 豐山跑，我地支持你，千祈唔好放棄!」
像義工團體探訪街頭的露宿者 (披毛巾者)
彩蛋
今次教練成功完成四徑，起碼有三個衝擊波:
衝擊波 (一)
受到教練衝擊，數十位跑班同學自發在半夜三更冒著10度以下的嚴寒，去碼頭接教練放學。另有一位跑班同學，已決定明年申請參加四徑，他會在今年努力爭取入場券。(俾掌聲)
衝擊波 (二)
Gerald 同學，即係一日只食一餐，後來有一日佢冇死到，去左走完條衛徑果位。舊年又有一日，佢去左英國工作。教練完成四徑後，他受到衝擊，在 fb 出了個post，最後句中文是亮點，睇完有洋蔥。
衝擊波 (三)
年初四，陪新加坡來港友人去 CamX 買鞋，因為香港價廉物美 (要說好香港故事)，上到去店長立即拉著我係咁講教練走完四徑有幾厲害，又話 KK 都生還到，仲話我咁fit，應該去試下玩四徑，迷你版都好。雖然明知佢浮誇，但心中暗暗覺得佢都有啲道理。佢又推介 Speedgoat 5 減到半價$750，性價比超高，家陣入冇得輸，又啱玩長途。
受到教練 (同店長) 衝擊，我於是買了一對，臨俾錢時，店長在旁說:「阿孫，你呢對彩藍色係新返嚟，要$899。不過仲有優惠，送你一張XX Health Care 集團 $500 coupon，你可以用嚟做衝激波。」
唔怪得CamX愈做愈大。
可以用嚟做衝激波的coupon
KK是教練的師傅，他用生命活出四徑精神，致敬
