追尋粉紅色的天花 | 希望世人記得她是三鐵選手的粉紅大佬司徒兆殷

呢個大佬遠在澳洲工作，專程回港跑渣馬，輕鬆心情2小時49分完賽 (攞埋男人份萬金)，成為港女二 (佢真係女人嚟)，比去年快了10分鐘，去到一個新天花。人稱粉紅大佬的司徒兆殷 Leanne，是三鐵港隊代表，更是畫畫、書法、鋼琴 (演奏級) 和芭蕾舞 (八級) 高手，surprise? 又係位飛機工程師 (佢真係女人嚟)，仲要樣子甜美、人見人愛、家庭溫馨 – 上天會唔會重手咗?

(其實一直好想訪問 Leanne，想寫佢奮鬥堅毅嘅故事，OKOK 我認，有百分之五十係貪圖美色。)

“Once again…..I push to a new limit.” Leanne 在渣馬 PB 後出 post 的第一句。盛裝著先天一份體藝雙存的厚禮，由堅持樂天的雙手打開，繁花綻放，閃亮耀目。這樣的示範單位，她的天花會在那裡?

睇個look就知打得，仲要prove?

從胡桃夾子的腳步到三鐵的夢

「我3歲開始學芭蕾舞，後來考入演藝學院的芭蕾舞團，100人申請，收兩個，我係其中一個。演出過胡桃夾子、天鵝湖等經典項目，夢想成為芭蕾舞家。也是因為舞衣多是粉紅色，覺得好靚，從此情陷粉紅的世界。」

「到咗中學，我讀女校 (真光)，見到有同學玩三鐵獲獎，覺得佢哋好型，好想試下。於是問屋企，爹啲媽咪反對，佢哋係較為傳統，想個女讀書叻，學啲斯斯文文嘅嘢。」

「中二時，趁住爹啲媽咪外出旅行，偷偷地跟同學去玩。後來佢哋都由得我，反正當運動。其實咁細年紀玩三鐵，一定要屋企 support，又要買單車，又要晨咁早去山旯旮嘅地方比賽，所以好感恩。」

「玩三鐵之餘我仍然 keep 住學不同的興趣，因為我一開始一樣事情，係唔會放棄，好想知道自己可以去到什麼水平。我有學中國舞，記得有次表演跳千手觀音，大家都要露對手臂出嚟，觀眾好疑惑點解其中一對特別大隻特別黑。」

「操三鐵導致身形體態都有改變，而且時間分配唔到，要在跳舞同三鐵之間二選一，我最後揀左三鐵，不過冇後悔。」有點似一係做警察，一係入黑社會咁極端。

Leanne 13歲已成為港隊三鐵運動員，「其實我果時並唔係隊中最 top 的，不過得我堅持留下來。我中四轉往澳洲讀書，大學畢業後 (航天工程學)，決定回港用兩年時間，全身投入三鐵。目標清晰，就是在日本仁川亞運佔據第八的位置。」拿青春睹明天，落重注係三鐵，冒險過玩比特幣。

鏡頭一轉，就是 Leanne 入住體院，過著每天超刻苦的操練，單車、游水、跑步，全部接近人類極限，每天都向前再推遠一些。最終一幕是 Leanne 穿著粉紅色的襪衝過終點，計分牌打出香港司徒兆殷名列第八。投資了兩年的黃金歲月，換了來一個只在計分牌出現的位置，滿意嗎?

「滿意，亞洲第八就是我要去的目標。」一位好了解自己、好清楚自己想點樣的女孩。
「之後我攞到 scholarship 係 Poly U 讀 Master (科技管理)，同時開展自己的職業生涯，係國泰做飛機工程，係我好鍾意嘅工作，唔係因為型…」
「咁『型』唔係一宗罪。」係呀嗎。
「其實又真係幾型。」Leanne 一見有人附和，終於講出心底話。

「職業未來有乜嘢方向?」
「我而家做引擎維修監控，例如飛機俾雷擘中，某個地方燶左，可唔可以貼個tape就繼續飛 (應該唔係藥水膠布掛)，我係其中一個負責審批。有時維修來自香港嘅飛機，可以講番廣東話，特別有親切感。我希望約五年後可以返嚟香港工作，香港好少呢方面嘅人才。我唔鍾意長期坐定一個位。」諗起鷹鷹，相信玩三鐵的運動員冇乜邊個坐得定。

而家唔博幾時博

「剛剛出來工作之後，開始覺得自己的運動水平在後退，去唔番最 top。其實到左我這個年紀，好難再同年青運動員去爆短途，好辛苦。我開始轉玩長距離的 full Ironman 三鐵 (游3.9K，踩180.2K，跑42.2K)。世界級的 full Ironman 選手都係 around 35 歲最peak。我想利用我而家呢個age去佔一個 Ironman 的世界排名。」

「即係乜嘢位置?」
「我三鐵專業選手資格剛剛係今年 renew 番，嚟緊兩年想係 half Ironman 嘅職業賽爭取世界排名。係亞洲 Ironman 或 full Ironman，我諗我而家應該係頭三位。想去到亞洲第一。我嘅主要亞洲對手係日本選手。」有實力有藍圖有鬥心有團火，好期待香港女亞一的誕生。

「你好細個已經係港隊成員，咁多年都係同高水平的運動員進行激烈的競爭，有冇諗過呢個成長過程點樣影響你?」

「係 junior age 時，我游水好差，經常最後一個上水，靠跑步追番。我好享受從後趕上來的感覺。玩三鐵 inspire 我唔能夠 keep 係一個位置就滿足，要不斷追求下一個目標。我呢個年紀唔博幾時博!」
Leanne 在 FB 寫她最愛的一句格言 “Don’t choose to be at ease when it’s time that you can bear the most struggles.” 有望不見天花的鬥心。

什麼是人生贏家?

「無論讀書、藝術、運動，你都係top level，令人欣羨，你覺得你有乜嘢優勢？」

「我勝在肯磨，堅持唔放棄。以前13歲時港隊三鐵的隊友，只剩得我仍然堅持繼續玩。」所以被稱為大佬。

「精英運動員果種艱辛訓練，刻板重覆，每天都在衝擊自己極限，但唔保證成功，你點樣說服自己捱落去，唔放棄?」我呢哋地球人永遠入唔到外星人的世界，亦可能係業餘運動愛好者同全職運動員的一堵鴻溝。

「係呀，如果你只係望住個頒獎台去跑，會好易放棄。但如果你嘅目標係用一年時間去跑快5分鐘，聽落好奢侈，但呢5分鐘means a lot (我記得怪獸仔同我有個約定，用一年時間把跑馬時間推前10分鐘)。以前跟 program 做，辛苦到險些想死，但現在做同一 program 輕而易舉，呢種成功感係其他生活層面搵唔到。」

「我係一個好正面、好少後悔嘅人，唔覺得失敗好需要放大。可能我比其他人優勝的地方，就係好快放下挫折，忘記失敗。」Leanne 是部冇後波的超跑。

「我係好有規律嘅人，享受 routine。我會100% 跟足計劃好的 program 做，好似我準備呢場渣馬，過去兩個月我係冇偷過懶，連拉筋、休息做得好足，當我企係起跑線上，我係冇擔心，有信心跟番原定的目標去做。名次是次要，但時間係完全掌握之內。」

令我想起小強、阿歹、樂仔….等我訪問過的跑手，都是有紀律，肯跟 program 做，享受達成時間目標，係成功的公式，但不是 short cut。

「我細個對好多藝術都好有興趣，見到素描、書法好靚，去學；見到跳舞好美，去學；父母好 support，只要你分配到時間就OK，所以我要學識 discipline 學識計劃，將時間完美分配，用有限時間做無限嘅嘢。」

「你覺唔覺得自己係人生贏家?」

「其實我覺得自己仲有好多嘢未做到，比起同年紀嘅朋友我有幸接觸好多我有興趣嘅事情。要視乎你點定義成就，對我來說，當講起某項運動，會記得我個名，說起 Ironman，會講 Leanne Szeto 係亞洲女子top 3，提及今屆渣馬，粉紅大佬是女二，已經係好好嘅成就。」

「渣馬令全城起鬨，相對跑步，香港對三鐵的報導很少，參加三鐵嘅 World Championship 其實難度高好多，不過冇乜人會留意。好多人都只知道我係一個跑手，我嘅 sponsor 都主要因為我嘅跑步成績。」

「就好似欣宜好想人記得佢係香港嘅歌手，而唔係某個明星個女 (驚講沈澱霞冇乜人識)。」我加個註腳。
「對，我都希望人記得我曾經係香港三鐵代表。」

所以趁機會要提下，2022年 Leanne 連續三個星期在澳洲參加三項三鐵比賽，獲得全場一冠兩亞的亮麗成績。2023年10月於夏威夷 Ironman World Championship 三鐵的光明頂，完成了她的首個 full Ironman，她的戰衣寫上 Szeto HKG。希望大家記得。

情繫香港

「當你代表香港出賽時有冇乜嘢感覺?」
「有，好強烈嘅使命感。雖然三鐵港隊在國際舞台是nobody，但我穿起港隊件衫，好想證明俾外國人，無論是金髮的、黑膚色的，都不要小窺我哋，我雖然係細粒啲，但係亞洲都係 top，I come from Hong Kong!」

「香港三鐵總會 authorize 我用專業選手資格代表香港出去鬥 Ironman，上線時會逐個介紹專業選手，當講到 Leanne Szeto from Hong Kong，我即時會起雞皮，成個人緊張晒，其實我素來的情緒控制都好好，但果刻真係激動。」

When they say #YouAreAnIronman Leanne Szeto from Hong Kong at the finish line It means the most.

「其實近年政府投入體育嘅資源算唔錯，特別是在奧運同亞運港隊有唔錯嘅成績之後。但要一個運動員投放10-20年青春在爭取成績，係好困難，當過了黃金歲月，當成績下滑，你就要退下來，咁跟住點? 體院有照顧退休運動員 (其實仲好年青) 計劃，但只能惠及小部份精英選手，家長唔會放心俾子女走呢條路。」

「當年我離開體院時有啲徬徨，我急要搵間屋，要忙於搵錢，當我做全職飛機工程時，我嘅運動做唔到成績。」

「其實運動係學校應該佔重要席位，當我同人講我係玩三鐵，別人就會覺得你會好捱得，好有毅力，運動幫一個人成長係好重要。」絕對認同，如果我係HR請人，若申請者係有玩越野跑，仲完成過Trans乜乜，UT物物，一定會加廿分先，有信心佢工作時唔會輕易DNF。

彩蛋 – 傾女人嘢

我哋從香港公園，沿纜車徑、舊山頂道，行到山頂。寒風凜凜，在廣場前的「奈雪X茶」戶外坐椅，嘆熱騰騰的珍珠奶茶，咁鬼chill，我哋轉傾啲女人嘢。

「講下你先生?」我哋都好想知大佬的老公係點樣。
「我先生係大學教書同做 sports science 嘅研究，佢當然有運動，但唔係我呢個水平，我亦唔需要一個世界級嘅選手做另一半 (好彩亦唔需要一個鍾意粉紅色嘅男人)，但佢會陪我去操練、比賽，我需要同佢分享感受，佢要好明白我。對於一個返全職工嘅人，如果佢另一半唔玩運動係好難相處。Weekend 同佢講要去踩6個鐘單車，佢唔會理解到。」等於男人玩高達，女人唔明白一樣?

「你係唔係都幾貪靚? 見你每次出賽都襯晒色，又經常補防曬。」
「都係架，不過靚有好多層次同角度，如果因做運動有咁嘅膚色，咁嘅身形，我覺得好靚。」

「芭蕾舞是表演，不是比賽。我跳咗15年芭蕾舞，已入左血液裡面，當我轉玩三鐵時，我有個心態，將比賽變為一場 performance，所以會著好靚嘅戰衣，襯晒成套 gear，執靚個樣，我享受呢個過程。當每項細節都力求完美，自然會做出不錯的成績，名次不過係 bonus。」

「自細圍繞你身邊的人都咁錫你，咁支持你，咁重視你，你各方面又咁出色，會唔會引發公主病，要好多嘅寵愛，要依賴?」
「女仔應該係被人錫，不過我自細玩運動，變得好獨立。我覺得就算有公主病係冇問題，如果你嘅另一半好錫你，就係鍾意你有公主病，有啲男士係鍾意 take care 人，而你發病得嚟又好靚，又氹得人好開心，大家夾到係冇問題。好似我同先生，我哋係好有條理同紀律嘅人，互相配合到。」

「每個女仔都會有些 proud of 嘅嘢，我自己好 proud of 經過努力奮鬥取得一些成果。有些女孩會 proud of 可以做靚靚太，有老公的寵愛，容許佢攤係屋企，佢唔需要有好大成就，但佢有嘅，係幸福！」

坐在我前面的 Leanne，獲上天的厚愛，具後天的自強，沿途還有許多看守的天使，難怪她擁有對識得笑的眼睛。她好幸福，但冇公主病 (或者病徵輕微?)，她懷抱藝術天賦，精英體能，感性與理性，溫柔興剛毅，粉紅與大佬。好難想像她的天花會在那裡，stay tuned，season II。

---