半年前，我哋 32 個人做咗一個決定，一個攞若嚟辛嘅決定，呢個決定其實違背人性違背身體，身體要 (hea) 要享樂要舒服，但我哋呢個決定令身體，肌肉，筋骨半年嚟受儘訓練嘅折磨，傷痛，撕裂，勞累，少咗同家人愛侶相處時間嘅內疚感，呢一堆辛苦感覺其實我一管禿筆寫唔出十份之一，但正因為呢一份辛苦，我哋開始發現，瞭解肌肉筋骨嘅細微變化，從捱辛苦到享受辛苦，一而再再而三地測試自己底線，多一公里多五公里多十公里再多十公里，快五秒快十秒分廿秒再快多一分鐘，不知不覺懵查查之間不斷把我哋嘅底線推到一個自己一向以為無可能達到嘅極限！呢一份 攞嚟賤 嘅快感筆墨難以形容，玄之又玄，未曾經歷過的只覺蹺蹊大惑也不解！
歲月彈指過，半年後，台東鐵人三項比賽日當天！
凌晨四點零，天空仍然是黑漆一片，大伙各自起床㧧洗後到餐廳食早餐，為著儲存體力，各人都儘力食碗飯，麵包等等，再每人攞定一兩個飯團準備轉項時補充。餐廳內無咗尋晚嘅喧嘩，畢竟大家都有點緊張！還好MidageonG精神領袖，教主 Kim sir 依舊談笑風生令大家輕鬆不少！
五點零天色微亮，全體隊員換上戰衣慢慢踩單車到達比賽現場，各自揾番自己號碼位置放好單車，依次序擺放妥當轉項物件好似單車鞋，頭盔，手套然後係跑步鞋，護膝等等！再將飯團， Power gel ，清水等放喺最就手最方便嘅位置！再三檢視一切停當之後，大家著住膠衣開始吹水 ……. ,
” 點情況？展唔展張？”
” 好 X 展張，我真心擔心我踩唔晒 90 ！”
” X！我好驚會抽筋！話時話我而家都好似有少少想抽添，頂！”
” 喂喂喂，我想問如果超時 DQ ，仲可唔可以玩落去㗎？X，DQ 無所謂，我山長水遠飛過嚟你唔俾我玩落去我真係打佢老母喎！”
” 仆街，我急屎！廁所條龍咁長，點 X 算？而家唔痾有排無得痾喎！”
” 妖！我有啲腳軟 ………，點死？”
輪到本人發言忍唔 X 住話 : ” 你班百佳，個個十足十細時讀書考試前，個個都話無讀書唔X 識，但結果就個個九十幾分一X 樣！”
語罷大伙爆笑，緊張心情輕鬆不少！
環顧四週，如果你以為參加鐵人三項嘅選手全部一唔係虎背熊腰，一唔係倒三角黃金比例六舊腹肌鏗鏗聲，再唔係就骨格精奇殺手咁嘅款 ………. Sorry，喺職業鐵人賽可能係，但呢類業餘比賽你見到嘅參賽選手同去街市買餸去夜塲唱 K 嘅相差唔太遠，一副運動員身材嘅當然有 ………… 尐！更多嘅係甩皮甩骨高矮肥瘦大中小肚腩百花齊放嘅人仕！外型不儘相同，相似嘅係眼內都彷彿有團火！
----- 廣告 Ad -----
七點十五分比賽開始，不同組別分時間落水，本人因為屬於中高老年組別，有幸七點四十五分先至同所有女子組一齊落水！好老實，我已經好多年無俾咁多女圍住嘞！嘿嘿！同數以百計嘅人一齊游水嘅感覺好特別亦都相對舒服，轉瞬上水，因為之前幾次比賽影啲相太衰嘅教訓，今次本人已經醒目，記緊步伐次序，上水除泳鏡泳帽，反手拉低膠衣拉鏈，膠衣除一半到胸口之下，用力谷實胸肌肩膀斜方肌二三頭肌，於電光火石間尋找照相機位置，揾到之後馬上 Chok 樣或微笑！然後儘量保持優美姿勢跑到轉項區！
跑到轉項區自己位置之後根據 Kim sir 及 Philip 大人吩咐第一件事，食嘢！把飯團啪入口中，同時脫下膠衣換上單車褲，襪，鞋，手套，最後頭盔眼鏡，啪埋最後一啖飯團飲啖水即刻出發！把單車推到起跑線後，上車，Lock 鞋，GoGoGo ，漫長嘅 90 公里開始！為排遣空虛也好放鬆心神也好自我麻醉也好，我開始一面轉波一面踩，一面自己同自己喺心裡面講嘢，再一面轉波一面踩 ………,
” 仆街，踩咁耐先 5K，個 Garmin 係咪壞很咗？”
” 好X 熱！使唔使咁鬼曬？冚家鈴今晚要敷多次 Mask 先得 ！”
” 咦！前面條女屁股咁鬼靚，踩快啲下乜樣先 …….. 頂！個屁股咁靚妳倒鈒牙大肚腩你對得住個屎忽無呀妳？”
期間，大量其貌不揚肥屍大隻或者骨瘦如柴一岩一忽嘅肥佬，阿叔，茂利，師奶 蓬一聲過咗我，蓬一聲又過咗我，但本人已經無暇兼顧，繼續自言自語 …….
” 咁鬼耐先至 25K ，都好，終於完成四份之一！”
” 今晚食乜好呢，魯肉飯定打邊爐？咁多人，打邊爐好能煩喎！”
” X！30K！三份一！仲有 60 ！仆街，仲有 60 ！”
” 好 X 辛苦，我踩唔 X 郁嘞，妖，唔記得食 Power gel 添，快尐食至得 ……. 嘩，頂，差啲炒車，好在救番！”
” 對面線同我打招呼嗰個咪 Carol ？唉，俾條女快過我咁多，顏面何存？以後點見人？超，阿 Rol 後生我咁多，又係前香港游泳冠軍，快過我好平常啫！無問題吖！”
” 好熱好口渴，前面有水站喎，仲有寶鑛力派，正！老西都停車飲先！”
” Yeah 終於翻轉頭，45K！仲有 45K ，正！”
----- 廣告 Ad -----
期間，一班肥佬，阿叔，茂利，師奶 依然係咁起勢蓬蓬聲過我！
“小那巴，點解我要參加啲咁嘅嘢，我條頸好酸好疼條腰就斷好那辛苦 ……. 仲有 30K？點那樣踩呀？”
” 75！仲有 15K ！咦，前面條女嘅背影幾正喎！咦，有人影相，落番下手 Chok 住先！”
” 仲有 5K ，好辛苦好 X 辛苦，我發誓以後唔再玩呢啲嘢！”
” 你老母吖，終於見到終點，咦，前面滿面鬍鬚籃色衫揸相機嘅咪攝影師 YS ，妖，轉下手 Chok 住過終點先！”
捱完 90公里單車，番到去轉項區腳踏實地之後我忐忑惶恐嘅心終於完全踏實落嚟，事關我一直最驚最怕嘅只係單車，路跑本人基本上胸有成竹！再啪幾粒 Power candy 之後開始起跑，頭幾 K 謹遵 Philip 大人吩咐，先慢慢鬆下對腳以防抽筋，過咗 5K 第一個水站飲啖水食舊蕉之後開始發力，遂步用番我自己個 pace 一個一個追番哂前面嘅隊友，15K 最後一個水站食咗兩碗咸粥一杯可樂之後，再發力追番最前嘅生果隊友同保安主管隊友，差不多到終點時其實已經接近腳軟，但因為怕俾佢哋追番上嚟，唯有一直保持 pacing 直奔終點，點 Q 知入到直路原來仲有 K 幾先到衝線點！我一面爆粗一面鼓其餘勇再衝，終於終於聽見人聲沸騰，見到一班 MidageOnG 隊友喺終點前高呼大叫本人名字，腎上腺素急升衝過終點，113公里路程完成！I am Ironman !
之後隊友一個一個凱旋而歸，歡呼聲此起彼落，但時間一點一滴過去，尚有一名非常重要嘅隊友未番嚟，MidageOnG 嘅傳統係，每次比賽我哋一定會等齊所有隊友完賽先會一齊離開一個不漏！於是我哋兵分幾路跑回頭去尋覓，最後我哋幾十人一齊陪佢衝過終點線完事！
第二日，一班隊員參加 515 賽事，另外有幾名不正常人類隊員參加 Linda 賽事，Linda 唔係人名唔係英文係中文，即係 連打！意思係第一日先參加一次 113 賽事，第二日連隨參加一個 515 奧運標準賽事為之 連打，Linda ！所有隊員順利完成賽事！
其實除咗今次台東普悠瑪 32 個人之外，MidAgeOnG 兩年前已經有十幾廿人成功完成咗另一次鐵人比賽，但如果你以為我洋洋灑灑塗鴉一萬幾千字係想話俾你聴我幾威我哋 MidAgeOnG 幾巴之閉幾架勢嘅話，Sorry，咁易俾你估到就唔好玩啦！雖則本人嘅座右銘一直係 腌臢腥悶 姣斯躉篤！但咁囂張嘅事情唔係本人嘅風格！
剛好相反，我最最最想講嘅係，呢一大班人裡面，其實只有 Kim sir 同某幾位係隔十條街你都會睇得出擺到明一副運動員身材，體脂低過 10，其餘嘅成員雖則唔係凌斜，奀挑鬼命，撟口摻手但真係乜人都有 …….. ,
有嬌小玲瓏索索中環金融 OL，
有呆呆滯滯叔父型機械工程師，
有斯斯文文紳士型保安主管，
有小小肚腩咸咸哋毒男型建築師，
有文質彬彬書生型行政人員，
有靚靚溜溜空中小姐，
有墎墎厚厚洋行經理，
有正正常常公務員，
有踏踏實實會計師
有情緒病康復者 ……….
當然，仲有我呢個年過半百已知天命嘅中年大叔，套用番香港著名哲學泰斗 史提芬周嘅名句 :
” 呢個世界根本就無鐵人，因為人人都可以係鐵人！”
無論你幾甩皮甩骨，竹竿咁瘦滔滔咁肥姚明咁高哈比人咁矮，看似弱不禁風或者肥頭耷耳善解人意，只要你肯下決心苦練，努力咁接受恆久規律訓練，半年至九個月廢枕忘餐流嘅汗水，罄竹難書筆墨難寫嘅勞累，若即若離繾綣不休嘅肌肉疼痛，你妳您都可以係鐵人！
----- 廣告 Ad -----
下一個真正鐵人賽 Ironman 70.3 見！
全文完，不喜勿插！終わり
更多：
Fitz.hk Facebook專頁
[Road to Ironman] 蝦兵蟹將闖台東，由淆底到好那興奮之間!
[Road to Ironman] 甩皮甩骨但自強不息的邪教教眾!
[Road to Ironman] 我加入了一個邪教叫 MidAgeOnG
鐵人之門
[鐵人之單車指南] 裝備正確騎車安全又順暢
美國里奧絕色武器: 註冊會計師
本文屬作者意見，不代表Fitz立場。
